Orde do 20 de decembro de 2007 pola que se establecen as bases que rexen as axudas para adquisición de equipamento e actividades programadas por asociacións xuvenís e entidades prestadoras de servizos á xuventude e se procede á súa convocatoria.

Diario Oficial de Galicia

xoves, 17 de xaneiro de 2008

III. OUTRAS DISPOSICIÓNS

Número do Dog:

Páxina do Dog:

1.151

Data da Disposición:

20 de decembro de 2007

Sección:

III. OUTRAS DISPOSICIÓNS

Organismo:

VICEPRESIDENCIA DA IGUALDADE E DO BENESTAR

Rango:

Orde

Título:

Orde do 20 de decembro de 2007 pola que se establecen as bases que rexen as axudas para adquisición de equipamento e actividades programadas por asociacións xuvenís e entidades prestadoras de servizos á xuventude e se procede á súa convocatoria.

O Estatuto de autonomía de Galicia establece no seu artigo 27.22º que lle corresponde á Comunidade Autónoma galega a competencia exclusiva nas materias do deporte e a axeitada utilización do lecer, así como a promoción do desenvolvemento comunitario.

Polo Decreto 285/1989, do 16 de decembro, asúmense as funcións e servizos transferidos pola Administración do Estado á Comunidade Autónoma de Galicia en materia de promoción sociocultural, no ámbito da xuventude e desenvolvemento comunitario.

Coa aprobación do Decreto 211/2005, do 3 de agosto, establécese a estrutura orgánica da Xunta de Galicia e co Decreto 232/2005, do 11 de agosto, a dos seus departamentos, establecendo no seu artigo 1º a estrutura básica da Vicepresidencia da Igualdade e do Benestar, que conta coa Secretaría Xeral do Benestar á cal lle corresponde o exercicio das competencias e funcións en materia de xuventude, a través da Dirección Xeral de Xuventude e Solidariedade, desenvolvido polo Decreto 517/2005, do 6 de outubro.

As entidades xuvenís desempeñan un papel fundamental nos diversos ámbitos da actividade social, contribuíndo a un exercicio activo da cidadanía e á consolidación dunha democracia avanzada representando os intereses da mocidade ante os poderes públicos e desenvolvendo unha función esencial e imprescindible na política de xuventude, para o cal a lei prevé o outorgamento de axudas e subvencións por parte das diferentes administracións públicas conforme o marco legal e regulamentario de carácter xeral que as recolle.

A Vicepresidencia da Igualdade e do Benestar da Xunta de Galicia considera como obxectivos prioritarios, contribuír á promoción da participación da mocidade desta comunidade e á súa inserción na vida social de forma participativa, mediante a dotación de axudas económicas para a realización de actividades e desenvolvemento de iniciativas e programas, que incidan na consecución dos obxectivos propostos, ao mesmo tempo que se promove a calidade das accións destas entidades favorecendo a utilización de ferramentas de planificación.

Neste sentido, nesta orde, establécense as bases que deberán rexer as convocatorias de subvencións ás asociacións xuvenís e ás entidades prestadoras de servizos á xuventude, distinguíndose en cada unha delas as finalidades e beneficiarios a que van destinadas. Esta diferenciación vén xustificada pola necesidade de cubrir obxectivos de diversa consideración, sendo todos eles de capital importancia para o desenvolvemento do tecido asociativo xuvenil e da participación e dinamización da mocidade que se resumen nos seguintes:

* Fomentar a vida asociativa das organizacións especificamente xuvenís como recursos idóneos de expresión dos intereses da xuventude e de aprendizaxe de valores de cooperación, solidariedade e civismo, a través da concesión de subvencións a asociacións e federacións xuvenís para o seu plan de actividades anual e para a adquisición de bens inventariables.

* Potenciar a realización de proxectos dirixidos á mocidade que contribúan á mellora das condicións sociais, culturais e educativas desta, favorecendo a súa participación activa como elemento pedagóxico, a través da concesión de subvencións a asociacións xuvenís e a entidades prestadoras de servizos á xuventude.

Esta convocatoria axústase ao disposto na Lei 9/2007, do 13 de xuño, de subvencións de Galicia e, en concreto, no relativo aos principios de obxectividade, concorrencia e publicidade na concesión das axudas e subvencións e no establecido na Lei 14/2006 pola que se aproban os orzamentos xerais da Comunidade Autónoma de Galicia para o ano 2007, así como ás disposicións aplicables da Lei 38/2003, do 17 de novembro, xeral de subvencións, a Lei 4/2006, do 30 de xuño, de transparencia e de boas prácticas na Administración pública galega e o Decreto 132/2006, do 27 de xullo, polo que se regulan os rexistros públicos de axudas, subvencións e convenios e de sancións.

Así mesmo, na súa tramitación, obsérvase o disposto na Orde do 11 de febreiro de 1998 da Consellería de Economía e Facenda, modificada polas ordes do 27 de novembro de 2000 e do 25 de outubro de 2001, pola que se regula a tramitación anticipada de expedientes de gasto.

Por todo isto,

DISPOÑO:

Artigo 1º.-Obxecto.

Esta orde ten por obxecto establecer as bases reguladoras que deberán rexer os procedementos de concesión de subvencións a asociacións xuvenís e a entidades prestadoras de servizos á xuventude da Comunidade Autónoma de Galicia para os seguintes fins:

Modalidade A: realización do programa anual de actividades e gastos de funcionamento, entendido como o conxunto de actividades planificadas con coherencia co fin de acadar os obxectivos estatutarios dunha asociación.

Modalidade B: adquisición de equipamento e material inventariable.

Modalidade C: realización de proxectos de promoción xuvenil, entendidos como aqueles proxectos con carácter puntual e extraordinario que unha entidade realiza co obxectivo xeral da promoción da mocidade e como obxectivos específicos os descritos no artigo 5º, punto 3 b) desta orde.

Artigo 2º.-Orzamento.

Para o financiamento destas axudas, existe crédito suficiente e adecuado no proxecto de lei de orzamentos da comunidade autónoma para 2008, aprobado polo Consello da Xunta de Galicia o 18 de outubro de 2007, consignado nas aplicacións orzamentarias 05.32.313A.481.0, cunha contía de 500.000 euros, que financiará as axudas para a realización do programa anual de actividades e gastos de funcionamento, así como para a realización de proxectos de promoción xuvenil e na 05.32.313A.781.0, cunha contía de 300.000 euros, que financiará a adquisición de equipamento e material inventariable.

Artigo 3º.-Destinatarios.

1. Poderán solicitar subvención, ao abeiro destas bases reguladoras, as asociacións xuvenís e as entidades prestadoras de servizos á xuventude da Comunidade Autónoma de Galicia que carezan de interese lucrativo.

1.1. Cando se trate da realización do programa anual de actividades e gastos de funcionamento:

a) As asociacións xuvenís constituídas conforme a lexislación vixente.

b) As federacións de asociacións xuvenís constituídas conforme a lexislación vixente.

1.2. Cando se trate de adquisición de equipamento e material inventariable:

a) As asociacións xuvenís constituídas conforme a lexislación vixente.

b) As federacións de asociacións xuvenís constituídas conforme a lexislación vixente.

1.3. Cando se trate da realización de proxectos de promoción xuvenil:

a) As asociacións xuvenís constituídas conforme a lexislación vixente.

b) As federacións de asociacións xuvenís constituídas conforme a lexislación vixente.

c) As entidades prestadoras de servizos á xuventude.

d) As federacións de entidades prestadoras de servizos á xuventude.

Artigo 4º.-Requisitos.

Para ser beneficiarios das subvencións a que se refire esta orde, os solicitantes deberán reunir os seguintes requisitos:

1. Estar inscritas no censo oficial dependente organicamente da Dirección Xeral de Xuventude e Solidariedade, regulado no Decreto 50/2000, do 20 de xaneiro, polo que se refunde e actualiza a normativa vixente en materia de xuventude, o día da publicación desta orde no Diario Oficial de Galicia, e cumprir a legalidade vixente no referente ás idades nas asociacións xuvenís (Real decreto 397/1988).

2. Non estar incurso en ningunha das prohibicións establecidas no artigo 10 da Lei 9/2007, do 13 de xuño, de subvencións de Galicia.

3. Será requisito imprescindible para poder solicitar a subvención ter xustificadas debidamente as axudas recibidas no último ano, se é o caso.

Artigo 5º.-Actividades e bens subvencionables.

As actividades e bens para os que se solicite subvención deberán responder aos seguintes criterios:

1. Para a realización do programa anual de actividades, estas deberán ter coherencia cos fins establecidos nos estatutos da entidade solicitante e que se realicen no ano en que se efectúe a convocatoria correspondente.

2. Bens subvencionables na solicitude de adquisición de equipamento e material inventariable da sede social:

a) Poderase subvencionar a adquisición de equipamento e/ou material inventariable de uso necesario para o funcionamento interno da entidade e para o desenvolvemento das actividades habituais, sempre e cando se xustifique convenientemente a necesidade.

b) Cando o gasto subvencionable supere a contía de 12.000 euros, a entidade deberá solicitar, como mínimo, tres ofertas de diferentes provedores.

c) En ningún caso o custo de adquisición dos gastos subvencionables poderá ser superior ao valor de mercado.

Para optar á adquisición de equipamento e/ou material inventariable é condición indispensable presentar declaración xurada de que a asociación ten local propio, sexa por arrendamento, cesión, doazón, compra, etc.

3. Para a realización de proxectos de promoción xuvenil, estes deberán cumprir algunha das seguintes finalidades:

a) Promover a participación social da xuventude na súa comunidade, mediante actividades que potencien a educación para a participación e que fomenten valores cívicos e democráticos.

b) Fomentar a aprendizaxe intercultural, educación en valores, coeducación, igualdade, dereitos humanos, autoestima persoal e colectiva; tamén intercambios con asociacións xuvenís doutras comunidades autónomas ou países estranxeiros.

As asociacións xuvenís poderán solicitar un máximo dun proxecto e as entidades prestadoras de servizos á xuventude un máximo de dous.

4. Quedan excluídos, para os efectos de subvención os programas docentes e deportivos previstos nos plans regulados de ensino e deporte escolar e federativo.

5. Subvencionaranse as actividades realizadas desde o 1 de xaneiro de 2008, tendo en conta os límites establecidos no artigo 13º.

Artigo 6º.-Solicitude e prazo de presentación.

1. A solicitude, segundo o modelo oficial que figura no anexo I desta orde, poderá presentarse no rexistro xeral da Vicepresidencia da Igualdade e do Benestar, nos rexistros das súas delegacións provinciais ou por calquera dos procedementos previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

2. O prazo de presentación de solicitudes será dun mes, contado a partir do día seguinte ao da publicación desta orde no Diario Oficial de Galicia, segundo o disposto no artigo 43 da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007.

3. Se o expediente se remite por correo, presentarase en sobre aberto para que a solicitude sexa datada e selada polo/a funcionario/a de correos antes de proceder á súa certificación.

4. A presentación da solicitude comportará a autorización á Dirección Xeral de Xuventude e Solidariedade e ás delegacións provinciais da Vicepresidencia da Igualdade e do Benestar para solicitaren as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

Artigo 7º.-Documentación.

As solicitudes deberán acompañarse con carácter xeral de:

a) Fotocopia compulsada do DNI da persoa que subscribe a solicitude e acreditación da súa lexitimación como representante da entidade, mediante certificación do secretario da entidade ou fotocopia compulsada da acta en que se recolla a composición do órgano de dirección.

b) Fotocopia compulsada do CIF da entidade.

c) Certificado dunha conta bancaria aberta a nome da entidade.

d) Declaración de non estar incurso nas prohibicións do artigo 10 da Lei 9/2007, de subvencións de Galicia (anexo II).

e) Os anexos III, IV e V correspondentes á modalidade solicitada (A, B ou C) debidamente cubertos.

f) Declaración do conxunto de todas as solicitudes de axuda efectuadas ou concedidas, para un mesmo proxecto ou actividade, perante as administracións públicas competentes ou outros entes públicos (anexo II).

Artigo 8º.-Emenda de defectos.

1. Se na solicitude se apreciasen defectos ou falta de documentación, a Dirección Xeral de Xuventude e Solidariedade ou as delegacións provinciais da Igualdade e do Benestar, requirirán o solicitante para que nun prazo de dez días emende a falta ou achegue os documentos preceptivos. Se así non o fixese considerarase que desistiu da súa petición, de acordo co previsto no artigo 71 da Lei 30/1992, do 26 de novembro, modificada pola Lei 4/1999, do 13 de xaneiro, de réxime xurídico das administracións públicas e do procedemento administrativo común, logo de resolución que será ditada nos termos do artigo 42 da referida lei.

2. A Dirección Xeral de Xuventude e Solidariedade ou as delegacións provinciais da Igualdade e do Benestar, poderán demandar do solicitante a modificación ou mellora voluntaria dos termos contidos na solicitude. Deles levantarase acta sucinta, que se incorporará ao procedemento.

Artigo 9º.-Contía máxima da subvención.

1. O importe da subvención en ningún caso poderá ser de tal contía que, illadamente ou en concorrencia con subvencións ou axudas doutras administracións públicas ou doutros entes públicos ou privados, nacionais ou internacionais, supere o custo da actividade que vai desenvolver o beneficiario ou, se é o caso, a porcentaxe máxima do gasto subvencionable que legalmente se estableza.

2. A contía da axuda concedida non poderá superar o 75% do orzamento total das actividades subvencionadas.

Artigo 10º.-Comisión de avaliación.

1. No caso de entidades de ámbito autonómico a comisión de avaliación estará formada polos seguintes membros:

a) Presidenta: a subdirectora xeral de Programas ou persoa en quen delegue.

b) Secretario/a: un/ha funcionario/a da Dirección Xeral de Xuventude e Solidariedade.

c) Vogais:

-A xefa do Servizo de Asociacionismo.

-Un/ha técnico/a da Dirección Xeral de Xuventude e Solidariedade.

-Un/ha representante do Consello da Xuventude de Galicia.

1.1. A comisión de avaliación poderá solicitar dos interesados a achega de cantos datos e documentos se consideren necesarios ou convenientes para a avaliación.

1.2. Unha vez avaliadas todas as solicitudes admitidas a trámite, a comisión de avaliación elaborará un informe proposta de resolución que elevará ao director xeral de Xuventude e Solidariedade. Con anterioridade a ditar a proposta de resolución, deberase acreditar que os beneficiarios que superen os 1.500 euros, para a adquisición de equipamento e material inventariable, están ao día das súas obrigas tributarias estatais e autonómicas e da Seguridade Social, así como que non teñen pendente de pagamento ningunha outra débeda coa Administración da Comunidade Autónoma de Galicia.

1.3. Se por calquera causa, no momento en que a comisión de avaliación teña que examinar as solicitudes, algún dos compoñentes non puidese asistir, será substituído pola persoa que para o efecto se nomee.

2. No caso de entidades de ámbito provincial ou inferior, a devandita comisión terá a seguinte composición:

a) O/a secretario/a da delegación provincial da Igualdade e do Benestar que actuará como presidente.

b) O/a xefe/a do Servizo de Xuventude e Solidariedade.

c) Un/ha representante do Servizo de Administración e Contratación.

d) Un/ha representante do Consello da Xuventude de Galicia.

e) Actuará como secretario/a un/ha funcionario/a da delegación provincial.

2.1. A comisión de avaliación poderá solicitar dos interesados a achega de cantos datos e documentos se consideren necesarios ou convenientes para a avaliación.

2.2. Unha vez avaliadas todas as solicitudes admitidas a trámite, a comisión de avaliación elaborará un informe proposta de resolución que elevará ao/á delegado/a provincial da Igualdade e do Benestar. Con anterioridade a ditar a proposta de resolución, deberase acreditar que os beneficiarios que superen os 1.500 euros para a adquisición de equipamento e material inventariable están ao día das súas obrigas tributarias estatais e autonómicas e da Seguridade Social, así como que non teñen pendente de pagamento ningunha outra débeda coa Administración da Comunidade Autónoma de Galicia.

2.3. Se por calquera causa, no momento en que a comisión de avaliación teña que examinar as solicitudes algún dos compoñentes non puidese asistir, será substituído pola persoa que para o efecto se nomee.

Artigo 11º.-Criterios de avaliación.

A concesión da subvención tramitarase en réxime de concorrencia competitiva. Para acceder á subvención requirirase unha puntuación mínima en cada un dos puntos sinalados nos criterios, que será establecida pola comisión de avaliación unha vez baremados todos os proxectos. A comisión de avaliación aplicará os seguintes criterios e baremos para a valoración das solicitudes:

Modalidade A. Cando se trate da realización do programa anual de actividades:

1. Criterios cualitativos:

1.1. Fundamentación das actividades: ata 10 puntos.

1.2. Obxectivos. Adecuación entre estes e as actividades que se van desenvolver: ata 10 puntos.

1.3. Metodoloxía. Aspectos innovadores e participación activa da mocidade na organización das actividades: ata 10 puntos.

1.4. Participación de mozos/zas desfavorecidos/as ou con menos oportunidades: ata 7 puntos.

1.5. Beneficiarios: se as actividades se dirixen exclusivamente a membros da asociación valorarase ata 5 puntos. Se as actividades se dirixen a mozos/as en xeral e as realizan os membros da asociación valorarase ata 20 puntos.

2. Criterios cuantitativos:

2.1. Número de beneficiarios directos: ata 5 puntos.

2.2. Recursos económicos. Existencia doutras achegas para o cofinanciamento do proxecto: ata 5 puntos.

Modalidade B. Cando se trate da adquisición de equipamento e material inventariable da sede social:

-O maior número de socios da entidade, acreditado con certificación desta: ata 5 puntos.

-A existencia de cofinanciamento para a adquisición do equipamento: ata 5 puntos.

-As actividades realizadas pola entidade no ano natural anterior á súa solicitude: ata 5 puntos.

-A accesibilidade doutras asociacións ou público en xeral a este material: ata 5 puntos.

-Que a asociación dispoña de local propio: ata 5 puntos.

Modalidade C. Cando se trate da realización de proxectos de promoción xuvenil:

1. Criterios cualitativos:

1.1. Análise da situación e fundamentación da actuación que xustifiquen o seu interese social: ata 15 puntos.

1.2. Adecuación dos obxectivos específicos do proxecto á finalidade e obxectivos xerais expostos no artigo 5º desta orde: ata 5 puntos.

1.3. Programa detallado de actividades. Coherencia entre estas e os obxectivos formulados: ata 15 puntos.

1.4. Metodoloxía. Desenvolvemento de procesos de participación da xuventude na realización do proxecto, incluídas as fases de elaboración, execución e avaliación. Neste sentido, considerarase imprescindible que os/as mozos/as participen na toma de decisións: ata 20 puntos.

1.5. Impacto local. Repercusión na comunidade. Implicación doutras entidades e colectivos sociais no desenvolvemento do proxecto: ata 15 puntos.

1.6. Avaliación. Obxecto, técnicas e indicadores: ata 10 puntos.

2. Criterios cuantitativos:

2.1. Número de mozos/as que interveñan na realización do proxecto e distribución de responsabilidades e tarefas: ata 10 puntos.

2.2. Número de beneficiarios directos e indirectos: ata 5 puntos.

2.3. Recursos económicos. Existencia doutras achegas para o cofinanciamento do proxecto: ata 5 puntos.

Artigo 12º.-Resolución.

1. Serán órganos competentes para resolver, por delegación do vicepresidente da Igualdade e do Benestar:

a) No caso de entidades de ámbito autonómico: o director xeral de Xuventude e Solidariedade.

b) No caso de entidades de ámbito provincial ou inferior: os delegados provinciais da Igualdade e do Benestar.

2. A resolución da solicitude de subvención seralles notificada a todos os solicitantes, no prazo máximo de nove meses, contados desde o día seguinte ao da publicación desta orde no Diario Oficial de Galicia. Transcorrido o dito prazo sen que recaia resolución expresa, deberá entenderse desestimada a petición correspondente. A dita resolución esgota a vía administrativa e contra ela poderá interpoñerse potestativamente recurso de reposición ante o mesmo órgano que a ditase no prazo dun mes contado a partir do día seguinte á notificación da resolución, se o acto fose expreso, ou no prazo de tres meses contado a partir do día seguinte a aquel en que se produza o acto presunto, ou ser impugnados directamente ante o Tribunal Superior de Xustiza, órgano contencioso-administrativo competente, no prazo de dous meses se o acto é expreso e de seis meses se é presunto, a partir do día seguinte ao da notificación da resolución, de conformidade co disposto na Lei 29/1998, do 13 de xullo, reguladora da xurisdición contencioso-administrativa.

3. A Vicepresidencia da Igualdade e do Benestar reserva para si o dereito de orientar tecnicamente o proxecto de actividades e comprobar a súa execución, cando o considere conveniente, así como de divulgar e dar a coñecer publicamente as actividades subvencionadas.

4. As entidades solicitantes ás cales non lles fose concedida a subvención disporán dun mes de prazo, contado a partir da recepción da notificación, para retiraren a documentación presentada. Transcorrido este prazo, arquivarase.

Artigo 13º.-Xustificación e pagamento da subvención.

Unha vez notificada a resolución da concesión da subvención procederase á xustificación e pagamento na forma en que se indica a continuación.

A xustificación das axudas efectuarase ata o día 31 de outubro de 2008.

1. As entidades beneficiarias presentarán para xustificar a axuda:

a) Anexo VI das modalidades A, B ou C debidamente cuberto.

b) Facturas orixinais. As entidades que teñan concedida subvención para máis dunha modalidade (programa de actividades, proxecto de promoción xuvenil ou equipamento e material inventariable), deberán facer unha xustificación para cada unha delas e cada factura só valerá para unha modalidade, tendo en conta ademais que as facturas de compra de material inventariable ou equipamento só son válidas para a modalidade B descrita no artigo 1º.

c) Declaración complementaria do conxunto das axudas solicitadas para o mesmo programa de actividades e gastos de funcionamento, adquisición de equipamento ou material inventariable ou proxecto de promoción xuvenil, tanto as aprobadas ou concedidas como as pendentes de resolución, das administracións públicas competentes ou calquera dos seus organismos, entes ou sociedades. Modelo no anexo VI.

2. Unha vez recibida e comprobada a documentación poderase proceder ao pagamento da subvención. Aboarase o 75 % do gasto certificado con data do 31 de outubro, ata o límite do importe concedido.

2.1. Nos casos das subvencións concedidas para o programa anual de actividades e gastos de funcionamento e para os proxectos de promoción xuvenil:

a) Poderánselles facer anticipos de pagamento do 50%, a aquelas entidades que non superen de importe concedido os 6.010,12 euros, e librarase o importe restante no momento da completa xustificación.

b) Para as entidades que superen os 6.010,12 euros, poderá acordarse un pagamento parcial de ata o 50%, sempre que xustifiquen a realización da actividade e o gasto realizado segundo se especifica nas alíneas a) e b) do punto 1, e librarase o importe restante no momento da completa xustificación.

2.2. Nos casos das subvencións concedidas para a adquisición de equipamento e material inventariable, poderá acordarse un pagamento parcial de ata o 50%, sempre que xustifique o investimento segundo se especifica nas alíneas a) e b) do punto 1, e librarase o importe restante no momento da completa xustificación. Non obstante, naquelas axudas que superen os 30.050,60 euros, a realización destes pagamentos parciais á conta da liquidación definitiva, quedará condicionada a que concorran as circunstancias especificadas no artigo 16.Dous.2 do Decreto 287/2000, do 21 de novembro, en especial a que se xustifique non só o investimento senón os pagamentos efectuados na mesma proporción que represente o pagamento parcial respecto da subvención concedida ata ese momento con cargo ao proceso de investimento aprobado.

No caso de que o importe concedido supere os 30.050,60 euros, o beneficiario está obrigado á presentación dunha garantía mediante seguro de caución prestado por entidade aseguradora ou mediante aval solidario da entidade de crédito ou sociedade de garantía recíproca, no que cubrirá o importe do anticipo xunto cos xuros deste calculados ao tipo de xuro legal do diñeiro no momento da concesión e polo prazo que medie entre a data da solicitude e, como mínimo, aquela en que se cumpran dous meses da do remate do prazo de xustificación. A presentación da garantía realizarase perante o órgano concedente no prazo de quince días a partir da notificación da resolución de concesión. Unha vez xustificada a subvención a garantía será liberada.

Artigo 14º.-Obrigas dos beneficiarios.

As entidades beneficiarias das axudas quedarán obrigadas a:

a) Realizar a actividade que fundamenta a concesión da subvención.

b) Acreditar perante a Dirección Xeral de Xuventude e Solidariedade ou a delegación provincial da Igualdade e do Benestar a realización da actividade, así como o cumprimento dos requisitos ou das condicións que determinan a concesión ou o desfrute da axuda. O cumprimento desta obriga de xustificación realizarase nos termos previstos no artigo 28 da Lei 9/2007, do 13 de xuño, de subvencións de Galicia, na normativa regulamentaria de desenvolvemento e no disposto nas bases reguladoras desta orde.

c) Someterse ás actuacións de comprobación que deba efectuar a Dirección Xeral de Xuventude e Solidariedade ou a delegación provincial da Igualdade e do Benestar, así como calquera outra comprobación e control financeiro que poidan realizar os órganos de control competentes, tanto nacionais coma comunitarios e achegar canta información lles sexa requirida no exercicio das actuacións anteriores.

d) Comunicarlle á Dirección Xeral de Xuventude e Solidariedade ou á delegación provincial da Igualdade e do Benestar a obtención de subvencións, axudas, ingresos ou recursos que financien as actividades subvencionadas. Esta comunicación deberá efectuarse tan axiña como se coñeza e, en todo caso, con anterioridade á xustificación da aplicación dada aos fondos percibidos.

e) Dispoñer dos libros contables, rexistros dilixenciados e demais documentos debidamente auditados nos termos exixidos pola lexislación mercantil e sectorial aplicable ao beneficiario en cada caso, coa finalidade de garantir o adecuado exercicio das facultades de comprobación e control.

f) Conservar os documentos xustificativos da aplicación dos fondos recibidos, incluídos os documentos electrónicos, mentres poidan ser obxecto das actuacións de comprobación e control.

g) Adoptar as medidas de difusión contidas no punto 3º do artigo 15 da Lei 9/2007, do 13 de xuño, de subvencións de Galicia.

h) Incluír en todo o material de divulgación das actividades obxecto desta axuda, a referencia de que esta está subvencionada pola Vicepresidencia da Igualdade e do Benestar a través da Dirección Xeral de Xuventude e Solidariedade, mediante a inclusión da súa imaxe corporativa, así como realizar todo este material (folletos, carteis, cartas, circulares, etc.) en galego.

i) Comunicar á Dirección Xeral de Xuventude e Solidariedade ou aos respectivos servizos provinciais, con 15 días de antelación, a realización das actividades para as que se pide subvención.

j) Figurar ao día do cumprimento das súas obrigas tributarias -estatais e autonómicas- e da Seguridade Social, non ser debedor en virtude de resolución declarativa da procedencia de reintegro e non ter ningunha débeda pendente, por calquera concepto, coa Administración da comunidade autónoma. En caso contrario non se fará o pagamento da subvención.

Artigo 15º.-Control e reintegro da subvención.

1. Procederá o reintegro nos termos e supostos previstos no artigo 33 da Lei 9/2007, do 13 de xuño, de subvencións de Galicia e, en concreto, nos seguintes casos:

a) Incumprimento da obriga de xustificación ou xustificación insuficiente nos termos establecidos no artigo 28 da Lei 9/2007, do 13 de xuño, de subvencións de Galicia e no establecido nesta orde.

b) Obtención da subvención sen reunir os requisitos exixidos para a súa concesión con falsificación das condicións requiridas para isto ou ocultación daquelas que o impedisen.

c) Incumprimento das condicións impostas con motivo da concesión da subvención ou da axuda pública, así como dos compromisos por estes asumidos, sempre que afecten ou se refiran ao modo en que deben acadarse os obxectivos, se realiza a actividade, se executa o proxecto ou se adopta o comportamento que fundamenta a concesión da subvención ou daqueles distintos dos anteriores, cando diso derive a imposibilidade de verificar o emprego dado aos fondos percibidos, o cumprimento do obxectivo, a realidade e regularidade das actividades subvencionadas ou a concorrencia de subvencións, axudas, ingresos ou recursos para a mesma finalidade procedentes de calquera Administración ou entes públicos ou privados, estatais, da Unión Europea ou de organismos internacionais.

d) Incumprimento da obriga de adoptar as medidas de difusión contidas no artigo anterior.

e) Resistencia, escusa, obstrución ou negativa ás actuacións de comprobación e control financeiro previstas nos artigos 11 e 12 da Lei 9/2007, do 13 de xuño, de subvencións de Galicia, así como o incumprimento das obrigas contables, rexistrais ou de conservación de documentos, cando diso derive a imposibilidade de verificar o emprego dado aos fondos percibidos, o cumprimento do obxectivo, a realidade e regularidade das actividades subvencionadas ou a concorrencia de subvencións, axudas, ingresos ou recursos para a mesma finalidade procedentes de calquera Administración ou entes públicos ou privados, estatais, da Unión Europea ou de organismos internacionais.

2. Con independencia das causas de reintegro enumeradas neste artigo, a declaración xudicial ou administrativa de nulidade ou anulabilidade da resolución de concesión por concorreren as causas previstas nos artigos 62 e 63 da Lei 30/1992, do 26 de novembro, de réxime xurídico das administracións públicas e do procedemento administrativo común, cando concorra algunha das causas de reintegro antes referidas, comportará a obriga de devolver as cantidades percibidas. Non procederá a revisión de oficio do acto de concesión cando concorra causa de reintegro.

3. As cantidades que se deban reintegrar terán a consideración de ingresos de dereito público, resultando de aplicación para o seu cobramento o previsto nos artigos 19 ao 23 da Lei de réxime financeiro e orzamentario de Galicia.

Artigo 16º.-Modificación da subvención.

Toda alteración das condicións tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da subvención de conformidade co disposto no artigo 17.4º da Lei 9/2007, do 13 de xuño.

Disposicións adicionais

Primeira.-No caso de que unha vez ditada a resolución de concesión de axudas amparadas nesta orde quedase crédito sen adxudicar, poderase publicar unha segunda orde de convocatoria de subvencións. En todo caso, a concesión de axudas terá como límite a cantidade consignada na correspondente aplicación económica dos orzamentos xerais da comunidade autónoma para o ano 2008 e, dada a tramitación anticipada deste expediente de gasto, a súa efectividade queda condicionada a que unha vez aprobada a Lei de orzamentos para 2008, subsistan as mesmas circunstancias de feito e de dereito existentes no momento da convocatoria.

Segunda.-Apróbase a delegación de atribucións do vicepresidente da Igualdade e do Benestar no director xeral de Xuventude e Solidariedade e nos/as delegados/as provinciais, en función do seu respectivo ámbito competencial, para resolver a concesión, denegación, modificación ou outras incidencias das subvencións previstas nesta orde, así como para autorizar e dispoñer os gastos, o recoñecemento das obrigas e a proposta de pagamento, en relación co disposto no artigo 73.a) do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia.

Terceira.-Os beneficiarios destas axudas quedan suxeitos ao réxime de infraccións e sancións previstas para esta materia no título IV da Lei 9/2007, do 13 de xuño, de subvencións de Galicia.

Cuarta.-De conformidade co artigo 13.4º da Lei 4/2006, do 30 de xuño, de transparencia e de boas prácticas na Administración pública galega, a Vicepresidencia da Igualdade e do Benestar publicará na súa páxina web oficial a relación dos beneficiarios e o importe das axudas concedidas, polo que a presentación da solicitude autoriza expresamente para o tratamento necesario dos datos dos beneficiarios e da súa publicación na citada páxina web. Así mesmo, coa presentación da solicitude o beneficiario autoriza a Vicepresidencia da Igualdade e do Benestar a incluír e facer público nos rexistros regulados no Decreto 132/2006, do 27 de xullo, de axudas, subvencións e sancións, os datos relevantes referidos ás axudas concedidas.

Disposicións derradeiras

Primeira.-Esta orde entrará en vigor o día seguinte ao da súa publicación no Diario Oficial de Galicia.

Segunda.-Facúltase o director xeral de Xuventude e Solidariedade para ditar cantas disposicións sexan precisas para o desenvolvemento desta orde.

Santiago de Compostela, 20 de decembro de 2007.

Anxo Manuel Quintana González
Vicepresidente da Igualdade e do Benestar
Ver referencia pdf "01200D002P047.PDF"

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es