Resolución do 19 de novembro 2007, da Secretaría Xeral de Comunicación, pola que se establecen, para o ano 2008, axudas económicas, en réxime de concorrencia competitiva, destinadas a empresas xornalísticas e de radiodifusión.

Diario Oficial de Galicia

xoves, 27 de decembro de 2007

III. OUTRAS DISPOSICIÓNS

Número do Dog:

249

Páxina do Dog:

20.257

Data da Disposición:

Sección:

III. OUTRAS DISPOSICIÓNS

Organismo:

CONSELLERÍA DE PRESIDENCIA, ADMINISTRACIÓNS PÚBLICAS E XUSTIZA

Rango:

Resolución

Título:

Resolución do 19 de novembro 2007, da Secretaría Xeral de Comunicación, pola que se establecen, para o ano 2008, axudas económicas, en réxime de concorrencia competitiva, destinadas a empresas xornalísticas e de radiodifusión.

En cumprimento do disposto no Decreto 96/2004, do 13 de maio, polo que se modifica o Decreto 71/1999, do 18 de marzo, polo que se regulan as axudas a empresas xornalísticas e de radiodifusión e, en uso das facultades que teño conferidas,

DISPOÑO:

Artigo 1º.-Obxecto.

Esta resolución ten por obxecto o establecemento de subvencións ás empresas xornalísticas e de radiodifusión radicadas en Galicia que estean debidamente inscritas no Rexistro Mercantil ou no que corresponda segundo a forma empresarial que adopten.

Para os efectos desta resolución entenderase:

a) Por empresas xornalísticas e de radiodifusión, as que teñan por obxecto da súa actividade, entre outras, a edición e distribución de xornais diarios co mesmo título e numeración sucesiva, as empresas radiofónicas privadas e aquelas que transmitan a súa actividade informativa diaria a través da internet, vía satélite ou por calquera outro sistema que empregue soportes das novas tecnoloxías da comunicación.

b) Por empresas radicadas en Galicia, aquelas que conten cun cadro de persoal estable de cando menos cinco traballadores que presten os seus servizos no ámbito territorial de Galicia e que elaboren e difundan toda ou parte da súa produción informativa de forma específica no territorio da comunidade autónoma.

Artigo 2º.-Actuacións subvencionables.

1. Poderán solicitar as axudas obxecto desta resolución as empresas que publiquen, ou difundan informacións, programas, artigos, reportaxes, colaboracións ou seccións orientadas a alentar a defensa da identidade de Galicia, a promoción dos seus valores, a normalización da lingua e a difusión da súa cultura. Na súa produción informativa deberá ter un especial protagonismo o idioma galego.

2. As empresas xornalísticas e de radiodifusión que se acollan ás axudas reguladas nesta resolución, comprometeranse a: respectar, nas informacións redactadas en castelán a lingua das declaracións da fonte ou da persoa entrevistada, sempre que as citas sexan transcritas en estilo directo, e a introducir a oferta positiva establecida no plan xeral de normalización da lingua galega, cando menos na relación xornalística cos representantes cidadáns e cargos de responsabilidade pública. A oferta positiva consiste na adopción do galego como lingua de contacto inicial entre a empresa e a persoa entrevistada.

3. Quedan excluídos da concesión de axudas:

a) Os boletíns interiores de institucións.

b) As publicacións de partidos políticos, asociacións relixiosas ou entidades públicas.

c) As publicacións de distribución gratuíta.

d) As empresas que emitan a través de sinal de televisión.

e) As que, ao longo do ano 2007, incluísen publicidade que non se ateña ao disposto no artigo 10 da Lei 3/1983, do 15 de xuño, de normalización lingüística, en materia de toponimia.

Artigo 3º.-Financiamento.

A concesión das subvencións reguladas nesta resolución financiarase con cargo á aplicación orzamentaria 04.30.461A.470.1, que dispón de crédito adecuado e suficiente no proxecto de orzamentos xerais da comunidade autónoma para o ano 2008, por unha contía inicial máxima de 86.336,00 €, sen prexuízo de ulteriores variacións producidas como consecuencia de modificacións orzamentarias nos termos do artigo 31.2º da Lei 9/2007, do 13 de xuño, de subvencións de Galicia.

Esta resolución de axudas tramítase de conformidade co establecido na orde da Consellería de Economía e Facenda do 11 de febreiro de 1998, modificada polas ordes do 27 de novembro de 2000 e do 25 de outubro de 2001, pola que se regula a tramitación anticipada de expedientes de gasto.

Artigo 4º.-Solicitudes.

As solicitudes, axustadas ao modelo oficial que se publica como anexo desta resolución, dirixiranse ao secretario xeral de Comunicación e deberán ir acompañadas da seguinte documentación:

A) Empresas xornalísticas:

1. Copia do documento nacional de identidade da empresa solicitante ou do seu representante legal.

2. Testemuño auténtico da escritura de poder cando o solicitante actúe en representación da persoa física ou xurídica titular do medio.

3. Certificación da inscrición no Rexistro Mercantil ou no do órgano correspondente.

4. Memoria en que se fagan constar os números publicados desde o 1 de xaneiro ao 31 de decembro de 2007, número de traballos ou artigos escritos en lingua galega durante o mesmo período e porcentaxe de publicacións, informacións ou emisións encamiñadas á normalización da lingua galega e difusión da identidade e cultura de Galicia.

5. Copia do pagamento do imposto sobre actividades económicas (IAE) . No caso de que a entidade estea exenta, deberá xustificar a causa de exención.

6. Informe da Tesouraría Xeral da Seguridade Social do número anual medio de traballadores en situación de alta durante o ano 2007.

7. Declaración do número de exemplares difundidos da publicación de que se trate durante o período do 1 de xaneiro ao 31 de decembro de 2007, acompañada da documentación que o acredite. No caso de empresas que emitan a través da internet, presentarán declaración do número de visitas ou consultas efectuadas no período citado anteriormente. Incidirá especialmente na valoración a certificación expedida pola Oficina da Xustificación da Difusión (OXD) , coa difusión no período do 1 de xaneiro ao 31 de decembro de 2007.

8. Declaración xurada do representante da empresa responsabilizándose de que vai incrementar o uso da lingua galega un mínimo dun dez por cento sobre o existente en galego no ano 2007, en cada cabeceira.

9. Declaración responsable subscrita por quen asine a solicitude en que se faga constar, tanto no que se refire ás persoas físicas como ás xurídicas solicitantes, que non están incursas en ningunha das prohibicións recollidas no artigo 10.2º da Lei 9/2007, do 13 de xuño, de subvencións de Galicia (DOG nº 121, do 25 de xuño).

10. Os peticionarios das axudas presentarán, coa solicitude inicial, unha declaración de conxunto de todas as solicitudes efectuadas ou concedidas, para esta mesma finalidade, das distintas administracións públicas.

B) Empresas de radiodifusión:

1. Memoria en que se faga constar a programación, especificando que parte dela se realiza en lingua galega. Este último extremo acreditarase mediante declaración xurada.

2. A que se establece nos números 1, 2, 3, 5, 6, 9 e 10 da epígrafe A) deste artigo.

3. Informe do estudo xeral de medios relativo á audiencia acumulada da emisora solicitante durante o período do 1 de xaneiro ao 31 de decembro de 2007.

4. Declaración xurada do representante da empresa responsabilizándose de que continuará realizando as emisións en galego ata o 31 de decembro de 2008 no caso de ser beneficiaria da axuda.

A presentación da solicitude implica o coñecemento e aceptación do réxime contido nesta resolución. De conformidade co artigo 43 da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, a presentación da solicitude da axuda pola persoa interesada comportará a autorización para que a Secretaría Xeral de Comunicación obteña de forma directa a acreditación do cumprimento das súas obrigas tributarias co Estado, coa comunidade autónoma e coa Seguridade Social, a través de certificados telemáticos.

Artigo 5º.-Prazo e presentación de solicitudes.

O prazo de presentación de solicitudes será dun mes a partir do día seguinte á publicación desta resolución.

As solicitudes poderán presentarse no rexistro xeral da Consellería de Presidencia, Administracións Públicas e Xustiza, sito no edificio administrativo de San Caetano, Santiago de Compostela, directamente ou a través dos procedementos establecidos nos artigos 38.4º e 38.5º da Lei 30/1992, do 26 de novembro, de réxime xurídico das administracións públicas e do procedemento administrativo común.

Artigo 6º.-Tramitación dos expedientes.

As solicitudes presentadas serán tramitadas polo servizo competente da Secretaría Xeral de Comunicación. As ditas solicitudes serán avaliadas por unha comisión integrada polos seguintes membros:

Presidente: o secretario xeral de Comunicación.

Vogais:

-A secretaria xeral de Política Lingüística.

-Un funcionario da Secretaría Xeral de Comunicación con categoría non inferior á de xefe de servizo.

-Un funcionario proposto pola Secretaría Xeral de Política Lingüística con categoría non inferior á de xefe de servizo.

Secretario: un funcionario da Secretaría Xeral de Comunicación, por proposta do presidente, que actuará con voz pero sen voto.

Artigo 7º.-Criterios de valoración.

A valoración das solicitudes presentadas basearase nos seguintes criterios:

a) Criterio referido á difusión: tiraxe de exemplares, número de lectores ou oíntes e número de visitas ou consultas.

b) Criterio referido ao emprego regular do galego por parte do medio, seguindo o establecido no Decreto 172/1982, do 17 de novembro, de normas sobre uso e ensino da lingua galega e na disposición adicional da Lei 3/1983, do 15 de xuño, de normalización lingüística, e de acordo coas normas aprobadas pola Real Academia Galega en sesión plenaria do 12 de xullo de 2003.

c) Criterio referido á porcentaxe de publicacións, informacións ou emisións encamiñadas á normalización da lingua galega e á difusión da identidade e cultura de Galicia.

O crédito destinado a financiar estar axudas distribuirase proporcionalmente en aplicación dos ditos criterios.

Artigo 8º.-Resolución.

1. As solicitudes de axuda realizadas ao abeiro desta resolución serán resoltas polo secretario xeral de Comunicación ao abeiro do establecido na disposición adicional segunda, alínea c), do Decreto 44/2006, do 2 de marzo, de estrutura orgánica dos órganos superiores dependentes da Presidencia da Xunta de Galicia.

2. As axudas concedidas ao abeiro desta resolución daráselles publicidade nos termos do establecido no artigo 15 da Lei 9/2007, do 13 de xuño, de subvencións de Galicia. No suposto de que a contía individualmente considerada sexa inferior a 3.000 euros publicarase no taboleiro de anuncios da Secretaría Xeral de Comunicación.

3. Os datos relativos a estas axudas e as sancións, que como consecuencia delas puidesen interpoñerse, serán publicados de acordo co previsto no artigo 9 do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006.

Os datos identificativos das entidades solicitantes, beneficiarias e participantes, integraranse en ficheiros informáticos para os efectos oportunos, e as persoas interesadas poderán exercer os dereitos recoñecidos con carácter xeral na Lei orgánica 15/1999, do 13 de decembro, de protección de datos de carácter persoal e demais normativa de desenvolvemento.

4. A comisión poderá solicitar todos os informes que considere necesarios, realizando proposta, para que se adopte a resolución que proceda. Contra a dita resolución poderá interpoñerse potestativamente recurso de reposición nos prazos estipulados no artigo 117 da Lei 30/1992, do 26 de novembro, de réxime xurídico das administracións públicas e do procedemento administrativo común, ou acudir directamente á xurisdición contencioso-administrativa no prazo de dous meses desde a súa notificación perante o Tribunal Superior de Xustiza de Galicia.

5. A concesión ou denegación desta liña de subvencións, axustarase aos artigos 42 e 44 da Lei 30/1992, do 26 de novembro, de réxime xurídico das administracións públicas e do procedemento administrativo común. No prazo de seis meses desde a data de publicación desta convocatoria, ditarase resolución expresa, e notificarase a cada unha das empresas ou entidades solicitantes, de non producirse a notificación no referido prazo e de conformidade co artigo 44.1º da citada lei, as persoas interesadas poderán entender desestimadas as súas pretensións por silencio administrativo.

Artigo 9º.-Obrigas das empresas beneficiarias.

1. As empresas beneficiarias das axudas quedan obrigadas:

a) A aceptar expresamente a subvención e a atoparse ao día das súas obrigas tributarias e sociais, e a non ter pendente de pagamento ningunha débeda coa Facenda da comunidade autónoma.

b) Ao reintegro, total ou parcial, da axuda pública percibida no suposto de incumprimento das condicións establecidas para a súa concesión, e en todo caso nos supostos regulados no artigo 33 da Lei 9/2007, do 13 de xuño, de subvencións de Galicia.

c) A someterse ás actuacións de comprobación que poida efectuar a Secretaría Xeral de Comunicación, así como calquera outra comprobación e control financeiro que poidan realizar a Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control do destino das axudas, para o que achegarán canta información lles sexa requirida.

d) A non estar incursas en ningunha das prohibicións para obter a condición de empresa beneficiaria das axudas recollidas no artigo 10.2º da Lei 9/2007, do 13 de xuño, de subvencións de Galicia.

e) A comunicarlle á Secretaría Xeral de Comunicación no momento en que se coñeza e, en todo caso, con anterioridade á xustificación da aplicación dos fondos, a obtención doutras subvencións, axudas, ingresos ou recursos que financien as actuacións subvencionadas, así como a modificación das circunstancias que fundamentasen a concesión da axuda.

2. Para os efectos de xustificar o compromiso establecido no artigo 2º.2 desta resolución, as empresas beneficiarias deberán achegar declaración do representante da empresa responsabilizándose de respectar as declaracións da fonte ou da persoa entrevistada e a introdución da oferta positiva, nos termos recollidos no citado artigo.

Toda alteración das condicións tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.

O pagamento farase efectivo na súa totalidade unha vez adoptada a resolución a que se refire o artigo anterior.

As empresas beneficiarias destas axudas quedan suxeitas ao réxime de infraccións e sancións previsto no título IV da Lei 9/2007, do 13 de xuño, de subvencións de Galicia.

Disposición derradeira

Única.-Nos aspectos non contidos nesta resolución aplicarase o Decreto 71/1999, do 18 de marzo, modificado polo Decreto 96/2004, do 13 de maio, e o disposto na Lei 9/2007, do 13 de xuño, de subvencións de Galicia.

Santiago de Compostela, 19 de novembro de 2007.

P.D. (Disposición adicional segunda
do Decreto 44/2006, do 2 de marzo)
Fernando Salgado García
Secretario xeral de Comunicación
Ver referencia pdf "24900D002P009.PDF"

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es