Orde do 18 de setembro de 2007 pola que se establecen as bases e se convocan axudas para financiar o mantemento dos servizos de comedor escolar xestionados polas asociacións de nais e pais de alumnos/as de centros públicos dependentes da Consellería de E

Diario Oficial de Galicia

martes, 25 de setembro de 2007

III. OUTRAS DISPOSICIÓNS

Número do Dog:

186

Páxina do Dog:

15.775

Data da Disposición:

18 de setembro de 2007

Sección:

III. OUTRAS DISPOSICIÓNS

Organismo:

CONSELLERÍA DE EDUCACIÓN E ORDENACIÓN UNIVERSITARIA

Rango:

Orde

Título:

Orde do 18 de setembro de 2007 pola que se establecen as bases e se convocan axudas para financiar o mantemento dos servizos de comedor escolar xestionados polas asociacións de nais e pais de alumnos/as de centros públicos dependentes da Consellería de Educación e Ordenación Universitaria para o curso académico 2007-2008.

O Estatuto de autonomía de Galicia declara no seu artigo 31, a competencia plena da Comunidade Autónoma galega para o regulamento e administración do ensino en toda a súa extensión, niveis e graos, modalidades e especialidades, sen prexuízo das limitacións impostas polos artigos 27 e 149 da Constitución española.

O Decreto 585/2005, do 29 de decembro, polo que se establece a estrutura orgánica da Consellería de Educación e Ordenación Universitaria, enumera dentro das súas funcións o deseño e elaboración de campañas de mellora dos recursos educativos complementarios.

Pola súa banda, o artigo 82.2º da Lei orgánica 2/2006, do 3 de maio, de educación, LOE (BOE do 4 de maio), establece que as administracións educativas prestarán, en determinados supostos, de forma gratuíta os servizos escolares de transporte e, se é o caso, comedor.

A rede de comedores escolares en centros públicos financiados pola Administración educativa creouse na década dos anos 70, para poder levar a cabo a concentración do alumnado nos centros comarcais, e o seu funcionamento regulouse polo Decreto 16/1984, do 9 de febreiro, no que se manifestaba o seu carácter de servizo complementario na rede de centros comarcais. Porén, a partir do ano 1998 moitos centros escolares do medio rural desapareceron por falta de alumnado que se foron integrando nos centros públicos do núcleo urbano máis próximo.

Este feito, xunto coa circunstancia de que moitos centros teñen unha área de influencia cada vez maior en zonas de crecemento urbanístico e da necesidade de conciliar a vida familiar e laboral, desembocou na implantación do servizo de comedor escolar en centros públicos financiados e xestionados integramente polas asociacións de pais e nais de alumnos/as, que contratan, pola súa conta, o servizo con empresas hostaleiras.

O tempo transcorrido desde a publicación do Decreto 16/1984, e a realidade social actual descrita anteriormente desembocaron na publicación do Decreto 10/2007, do 25 de xaneiro (DOG nº 26, do 6 de febreiro), polo que se regula o funcionamento dos comedores escolares nos centros docentes públicos non universitarios dependentes da Consellería de Educación e Ordenación Universitaria e que derrogou a normativa anteriormente vixente.

Dentro das modalidades de prestación do servizo reguladas no novo decreto, o artigo 2.3º establece que excepcionalmente, a Administración educativa poderá colaborar na xestión e organización do servizo de comedor escolar coas asociacións de nais e pais de alumnos e as súas federacións.

Para dotar de eficacia o disposto no citado artigo a Consellería de Educación e Ordenación Universitaria establece nesta orde un programa de axudas económicas coa finalidade de financiar, apoiar e potenciar a prestación do servizo de comedor escolar xestionado polas asociacións de nais e pais de alumnos/as de centros públicos dependentes dela.

Polo exposto, esta consellería dispón:
Artigo 1º.-Obxecto.
1. Esta orde ten por obxecto establecer as bases e convocar axudas económicas ás asociacións, federacións ou confederacións de nais e pais de alumnos/as legalmente constituídas, e que xestionan comedores escolares en centros públicos dependentes da Consellería de Educación e Ordenación Universitaria.

2. A concesión das axudas realizarase en réxime de concorrencia competitiva de acordo co disposto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, modificada pola Lei 14/2004, do 29 de decembro, de medidas tributarias e réxime administrativo.

3. As axudas económicas irán destinadas a sufragar os seguintes conceptos:
a) Custo diario do menú por comensal e polos días de asistencia destes ao comedor, así como, se é o caso, o desenvolvemento de programas de promoción da saúde e habilidades persoais como complemento ao servizo de comedor, que irá incluído no prezo, durante o curso académico 2007/2008.

b) Gastos correntes nos que incorran as asociacións, federacións ou confederacións de nais e pais de alumnos/as como consecuencia da xestión do comedor, cun máximo do 2 % do importe total da axuda concedida e sen que, en ningún caso, a citada porcentaxe supere os 1.500 euros.

c) Gastos orixinados pola contratación de persoal que desenvolva o labor de atención ao alumnado con necesidades específicas, ata un máximo do 50% do seu custo.

Artigo 2º.-Crédito orzamentario.
1. Para a concesión das axudas regulamentadas nesta orde destinaranse 1.000.000 con cargo á aplicación orzamentaria 09.01.423A.481.0 dos orzamentos xerais da Comunidade Autónoma de Galicia para o ano 2007, de acordo coa seguinte distribución:

-427.008,10 € con cargo á anualidade do ano 2007.
-572.991,90 € con cargo á anualidade do ano 2008.
2. A percepción destas axudas é compatible coa doutras subvencións, axudas, ingresos ou recursos para a mesma finalidade, procedentes de calquera outra Administración ou ente, público ou privado, aínda que o importe da subvención concedida en ningún caso poderá, en concorrencia con outras subvencións ou axudas, superar o custo da actividade a desenvolver polo beneficiario.

Artigo 3º.-Actividade subvencionable.
As axudas poderán sufragar ata un máximo do 50% do custo do servizo de comedor do centro escolar correspondente, de acordo cos criterios de valoración reflectidos no artigo 8 desta orde. Para iso terase en conta o orzamento que o/a solicitante debe achegar no momento de presentar a súa solicitude, e que deberá reunir os requisitos establecidos no artigo 5 a) desta orde. En todo caso, a Consellería de Educación e Ordenación Universitaria velará polo axuste dos orzamentos aos prezos de mercado, e poderá, motivadamente, rexeitar os orzamentos que non se correspondan a tales prezos.

A concesión das axudas está subordinada á existencia de crédito axeitado e suficiente, tendo como límite o fixado no artigo 2.1º desta orde.

No caso de solicitantes que sexan perceptores doutras axudas para o mesmo fin concedidas por outra entidade, deberán acreditar documentalmente a súa natureza e contía e percibirán, se é o caso, a axuda cos límites expresados no artigo 2.2º.

Artigo 4º.-Destinatarios.
1. Poderán solicitar estas axudas as asociacións, federacións e confederacións de nais e pais de alumnos/as que, con anterioridade ao remate do prazo de presentación de solicitudes, estean inscritas no censo da Consellería de Educación e Ordenación Universitaria ou ben presentasen a correspondente solicitude de inscrición e que xestionen o servizo do comedor no centro escolar correspondente ou teñan solicitado a autorización de apertura e funcionamento.

2. Poderán acollerse a esta orde as actuacións a realizar que se describen no parágrafo anterior, sempre que se desenvolvan durante o curso académico 2007/2008.

Artigo 5º.-Solicitudes.
1. As solicitudes, segundo o modelo que figura como anexo I a esta orde, subscrita pola persoa que teña a representación legal da entidade solicitante, achegaranse coa seguinte documentación:

a) Orzamento do custo do servizo de comedor, no que se especifiquen o centro público onde se presta o servizo, os prezos por menú e día, nº de días de prestación do servizo e nº de alumnos usuarios deste.

b) Memoria explicativa na que se detalle o carácter continuado e non ocasional do servizo, así como a calidade, orixinalidade e carácter innovador do programa de promoción da saúde e habilidades persoais.

c) Certificación do acordo do órgano competente da entidade solicitante polo que se decide solicitar a axuda.

d) Relación de asociacións de nais e pais de alumnos/as que integran a federación ou das federacións que integran a confederación, se é o caso.

e) Declaración xurada de ter solicitado, ou non, outras axudas para a mesma finalidade doutras administracións ou entes públicos, con indicación do nº de alumnos/as que serían beneficiarios/as desas axudas (anexo II).

f) Certificación bancaria a nome da entidade solicitante, na que conste o número de conta na que se ingresaría o importe da axuda.

g) Copia do CIF da asociación, federación ou confederación correspondente.
h) Declaración de non estar incursa en ningunha das prohibicións para a obtención de subvención recollidas no artigo 13 da Lei 38/2003, do 17 de novembro, xeral de subvenciónes.

2. Os documentos a que se fai referencia nas letras f) e g) deste artigo non é preciso que se acheguen se xa están en poder da Administración.

Artigo 6º.-Lugar e prazo de presentación das solicitudes e documentación.
1. As solicitudes e demais documentación presentaranse no rexistro xeral da Consellería de Educación e Ordenación Universitaria, edificio administrativo San Caetano s/n, 15780 Santiago de Compostela; así como nos lugares establecidos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

2. O prazo de presentación de instancias será dun mes contado a partir da publicación desta orde no Diario Oficial de Galicia.

Artigo 7º.-Instrución do procedemento.
Rematado o prazo de presentación de solicitudes, o Servizo de Recursos Educativos Complementarios realizará de oficio cantas actuacións considere necesarias para a determinación, coñecemento e comprobación dos datos en virtude dos que se deba pronunciar a resolución, conforme o establecido nesta orde, a normativa xeral e específica de subvencións e de acordo coas normas de procedemento administrativo común.

O órgano xestor examinará a documentación presentada polos solicitantes e, segundo o disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, se a solicitude de iniciación non reúne os requisitos que sinala o artigo 70 desta lei e os exixidos na propia orde de convocatoria, requirirase o interesado que, no prazo de dez días, emende a falta ou acompañe os documentos preceptivos, con indicación de que, se non o fixese así terase por desistido da súa petición previa resolución que deberá ser ditada nos termos previstos no artigo 42 da citada Lei 30/1992.

O órgano instrutor realizará finalmente un informe no que conste que da documentación que existe no seu poder despréndese que os solicitantes cumpren os requisitos para acceder ás axudas.

Artigo 8º.-Valoración.
1. Unha vez instruído o procedemento, os expedientes serán enviados para o seu informe preceptivo á comisión de valoración, que efectuará a proposta de resolución e enviaraa á Secretaría Xeral da Consellería de Educación e Ordenación Universitaria.

Para tal efecto constituirase unha comisión que estará integrada polos seguintes membros:

-O subdirector xeral de Xestión Orzamentaria e Recursos Educativos Complementarios, que actuará como presidente.

-O xefe do servizo de Recursos Educativos Complementarios.
-Un xefe dos servizos provinciais de Recursos Educativos Complementarios.
-Un representante da Subdirección Xeral de Inspección, Avaliación e Calidade do Sistema Educativo.

-Un/unha funcionario/a do Servizo de Recursos Educativos Complementarios, que actuará como secretario/a.

2. Para os efectos de valoración seguiranse os criterios que se detallan:
a) Maior implicación dos concellos no financiamento do servizo obxecto de subvención, ata 15 puntos repartidos do seguinte xeito:

5 puntos cando o concello se faga cargo da vixilancia no comedor escolar.
5 puntos cando o concello dispoña de bolsas de servizos sociais para o alumnado do comedor escolar correspondente.

Ata 5 puntos por calquera outra achega económica do concello.
b) Carácter continuado e non ocasional do servizo, ata 5 puntos repartidos do seguinte xeito: 1 punto por curso, cun máximo de 5 cursos consecutivos excluído o curso obxecto da orde.

c) Número de comensais: ata 5 puntos, repartidos do xeito seguinte:
Comensais: ata 75. Puntuación: 5.
Comensais: de 76 a 150. Puntuación: 4.
Comensais: de 151 a 190. Puntuación: 3.
Comensais: de 191 a 275. Puntuación: 2.
Comensais: máis de 275. Puntuación: 1.
d) Programa de promoción da saúde, promoción de hábitos alimentarios saudables e do desenvolvemento das habilidades persoais do alumnado do comedor. A documentación xustificativa do devandito programa deberá contar, cando menos, cos seguintes aspectos (sen prexuízo de que se recollan outros diferentes):

-Nome do programa.
-Entidade organizadora do programa.
-Descrición das actividades que se desenvolven nel.
-Programación diaria, semanal ou mensual das actividades a desenvolver.
-Descrición do persoal encargado do seu desenvolvemento, con referencia expresa ao número e á súa cualificación.

-Descrición do material que se achegue ao alumnado usuario do comedor para o desenvolvemento do programa.

Os programas recollidos nesta epígrafe valoraranse cun máximo de 10 puntos repartidos do seguinte xeito:

Ata 2 puntos pola orixinalidade, carácter innovador e creatividade do programa.
Ata 2 puntos polo seu carácter continuado e non ocasional.
Ata 2 puntos pola calidade do material achegado para o seu desenvolvemento.
Ata 4 puntos cando o programa sexa impartido por persoal cualificado.
3. A concesión das axudas farase mediante pro rateo de todas as solicitudes de acordo cos citados criterios de valoración e, en ningún caso, poderá superar o límite sinalado no artigo 3 desta orde.

Artigo 9º.-Resolución e formalización das subvencións.
1. Completado o expediente, o secretario xeral elevará á conselleira a proposta da comisión de valoración para a resolución do procedemento e notificación das resolucións no prazo máximo de seis meses contados a partir da publicación desta convocatoria.

2. Transcorrido o prazo de seis meses sen que fose notificada resolución expresa, entenderase desestimada a concesión da subvención, podendo presentar os interesados recurso de reposición no prazo de tres meses ou acudir directamente ante a orde xurisdicional contencioso-administrativa.

3. As resolucións recaídas serán notificadas aos interesados de acordo co disposto no artigo 58 da Lei 30/1992, do 26 de novembro, de réxime xurídico das administracións públicas e do procedemento administrativo común.

4. Toda alteración das circunstancias tidas en conta para a concesión da subvención e, en todo caso, a obtención concorrente da subvención ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución da concesión.

5. As resolucións recaídas porán fin á vía administrativa e poderán ser obxecto de recurso potestativamente en reposición ante o mesmo órgano que as ditou, no prazo dun mes, ou ser impugnadas directamente ante a orde xurisdicional contencioso-administrativa, no prazo de dous meses, de conformidade coa Lei 29/1998, do 13 de xullo, reguladora da xurisdición contencioso-administrativa.

Artigo 10º.-Pagamento das axudas.
1. O pagamento da subvención realizarase logo de xustificación, polo beneficiario, da realización da actividade subvencionada. Atendendo á natureza da subvención poderán realizarse pagamentos á conta, logo de xustificación dos gastos realizados en atención ao calendario de prestación do servizo de comedor escolar e consonte o disposto nos parágrafos segundo e terceiro deste artigo.

2. A subvención correspondente á anualidade 2007 exixirá a presentación polo beneficiario da documentación á que se refire o artigo 11.2º desta orde. Os xustificantes de gasto referiranse aos incorridos no período comprendido entre os meses de setembro e decembro de 2007.

3. A xustificación dos gastos deberá ser presentada antes do día 7 de decembro de 2007 ante á Subdirección Xeral de Xestión Orzamentaria e de Recursos Educativos Complementarios da Consellería de Educación e Ordenación Universitaria, edificio administrativo San Caetano s/n, 15781 Santiago de Compostela.

Artigo 11º.-Xustificación da axuda.
1. A rendición de conta xustificativa total enviarase antes do 20 de outubro de 2008 á Subdirección Xeral de Xestión Orzamentaria e de Recursos Educativos Complementarios da Consellería de Educación e Ordenación Universitaria, edificio administrativo San Caetano s/n, 15781 Santiago de Compostela.

2. Os beneficiarios deberán xustificar a xestión do servizo de comedor a través dun certificado do secretario da asociación, federación ou confederación correspondente, co visto e prace do seu presidente, acompañado da conta xustificativa na que se deberán incluír, baixo a responsabilidade do declarante, os xustificantes de gasto que permitan acreditar o cumprimento obxecto da subvención.

3. A conta xustificativa incluirá a declaración das actividades realizadas que foron financiadas coa subvención e o seu custo, coa desagregación de cada un dos gastos incorridos. Os gastos acreditaranse mediante copias compulsadas das facturas orixinais que deberán estar a nome do solicitante ou do seu beneficiario. A conta xustificativa deberá incluír o importe, procedencia e aplicación dos fondos propios e doutras subvencións ou axudas destinadas ás accións subvencionadas.

4. Cando o importe do gasto subvencionado supere os 12.000 €, no suposto de prestación de servizos por empresas, o beneficiario deberá solicitar como mínimo tres ofertas de diferentes provedores nos termos do establecido no artigo 31 da Lei estatal 38/2003, do 17 de novembro, xeral de subvencións, salvo que o contrato se realizase con anterioridade á concesión da subvención. A elección entre as ofertas presentadas, que deberán achegarse na xustificación, ou, se é o caso, na solicitude da subvención, realizarase conforme a criterios de eficiencia e economía, debendo xustificarse expresamente na memoria a elección cando non recaia na proposta económica máis vantaxosa.

5. Se os beneficiarios non xustificasen a totalidade da axuda concedida en relación ao orzamento presentado na solicitude, esta minorarase proporcionalmente á xustificación presentada por eles.

Artigo 12º.-Outras obrigas dos beneficiarios das axudas.
1. Os beneficiarios estarán sometidos ao disposto no artigo 78.4º do Decreto lexislativo 1/1999, do 7 de outubro, modificado pola Lei 14/2004, do 29 de decembro, de medidas tributarias e réxime administrativo:

Acreditar ante a entidade concedente a realización da actividade e o cumprimento dos requisitos e das condicións que se determinan na concesión da subvención.

Comunicar á Consellería de Educación e Ordenación Universitaria a obtención de subvencións, axudas, ingresos ou recursos que financien as actividades subvencionadas. Esta comunicación efectuarase tan pronto como se coñeza, e en todo caso con anterioridade á xustificación da aplicación dada aos fondos percibidos.

Facilitar toda a información que lle sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control do destino das axudas.

2. Ademais, e para os efectos do disposto na disposición adicional do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, os solicitantes deberán consentir expresamente á Administración concedente a incluír e facer públicos, nos rexistros regulados no citado decreto, os datos relevantes referidos ás axudas recibidas.

A reserva que o peticionario poida facer no senso de non autorizar a obtención de datos ou a publicidade dos datos nos rexistros, que, en todo caso, terá que se expresar, poderá dar lugar á exclusión do proceso de participación para obter a axuda ou subvención ou, noutro caso, á revogación do acto de outorgamento e, se procede, ao reintegro do importe concedido.

Artigo 13º.-Revogación e reintegro.
Procederá o reintegro, total ou parcial, da subvención ou axuda pública percibida e dos xuros de demora devengados desde o momento do seu pagamento ata a data na que se acorde a procedencia do reintegro, nos supostos establecidos no artigo 78.10º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, modificado pola Lei 14/2004, do 29 de decembro, de medidas tributarias e réxime administrativo, e no suposto sinalado no derradeiro parágrafo do artigo 12 desta orde.

Artigo 14º.-Infraccións e sancións.
No relativo a esta materia haberá que aterse ao disposto no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, modificado pola Lei 14/2004, do 29 de decembro, de medidas tributarias e réxime administrativo.

Disposicións derradeiras
Primeira.-Facúltase o secretario xeral da Consellería de Educación e Ordenación Universitaria para ditar os actos necesarios para o desenvolvemento e aplicación desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 18 de setembro de 2007.
Laura Sánchez Piñón
Conselleira de Educación e Ordenación Universitaria

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es