Diario Oficial de Galicia
xoves, 27 de setembro de 2007

III. OUTRAS DISPOSICIÓNS

Número do Dog:

188


Páxina do Dog:

15.965


Data da Disposición:

21 de setembro de 2007


Sección:

III. OUTRAS DISPOSICIÓNS


Organismo:

CONSELLERÍA DO MEDIO RURAL


Rango:

Orde


Título:

Orde do 21 de setembro de 2007 pola que se establecen as bases das axudas para a mellora da eficiencia da xestión técnico-económica das explotacións agrarias e se convocan para o ano 2007 e 2008.



Orde do 21 de setembro de 2007 pola que se establecen as bases das axudas para a mellora da eficiencia da xestión técnico-económica das explotacións agrarias e se convocan para o ano 2007 e 2008.

O coñecemento dos distintos índices técnico-económicos das explotacións e da súa evolución permite diagnosticar os problemas de manexo e xestión das explotacións e, en consecuencia, suxerir medidas correctoras para reducir os custos de produción e facilitar a toma de decisións nas explotacións. Ao mesmo tempo, constitúe unha fonte de información de indubidable importancia para analizar a situación en cada orientación produtiva, de modo que se poidan elaborar políticas sectoriais e planos de actuación que melloren a competitividade e permitan incrementar a renda das explotacións.


Por esa razón, desde hai anos, a Xunta de Galicia vén financiando os servizos de xestión para aumentar a formación técnico económica dos agricultores, fomentando a implantación de programas de xestión e contabilidade entre as explotacións agrarias, no marco do disposto no Regulamento (CE) 1257/1999, do 17 de maio, sobre axuda ao desenvolvemento rural, modificado polo previsto na Lei 19/1995, do 4 de xullo, de modernización de explotacións agrarias e do disposto no Real decreto 613/2001, do 8 de xuño, sobre melloras estruturais e modernización das explotacións agrarias, modificado polo Real decreto 1650/2004, do 9 de xullo.


Este proceso de formación e de implantación de sistemas contables nas explotacións galegas é moi lento e dista moito dos niveis alcanzados polos países de referencia no seo da Unión Europea. Por esta razón, seguirá sendo necesario apoiar este tipo de actuación nos vindeiros anos, especialmente no segmento das pequenas explotacións que é o máis numeroso e onde o uso da contabilidade segue sendo insuficiente e a información de xestión moi escasa. Por outra parte, onde con máis urxencia cómpre corrixir estas carencias é nas explotacións que colaboran con proxectos de investigación ou de demostración. As axudas ás agrupacións de xestión técnico-económica das explotacións agrarias para formación e contratación de persoal técnico que permita a prestación destes servizos parece a forma idónea de conseguir este obxectivo.


As actuacións previstas nesta orde son cofinanciadas polo Feoga nun 75% e pola Comunidade Autónoma de Galicia no 25% restante, conforme o Programa Operativo Integrado de Galicia, aprobado pola Comisión da Unión Europea e ao Regulamento (CE) nº 1320/2006 da Comisión do 5 de setembro de 2006 polo que se establecen normas para a transición á axuda ao desenvolvemento rural establecida no Regulamento (CE) nº 1698/2005 do Consello.


En virtude do exposto, de conformidade co artigo 30.1.3 do Estatuto de autonomía de Galicia, e no uso das facultades que me confire a Lei 1/1983, do 22 de febreiro, reguladora da Xunta e da súa Presidencia, modificada pola Lei 11/1988, do 20 de outubro; pola Lei 12/1989, do 4 de outubro e pola Lei 7/2002, do 27 de decembro,


DISPOÑO:

Artigo 1º.- Obxecto.

O obxecto desta orde é establecer as bases reguladoras e efectuar a convocatoria para 2007, en réxime de concorrencia competitiva, de axudas destinadas a financiar a creación ou adecuación dos servizos prestados polas agrupacións de xestión de explotacións (AXE).


Artigo 2º.-Tipo e contía da axuda.

A axuda estará destinada a sufragar o custo de contratación de axentes encargados da xestión técnica, económica, financeira e administrativa das explotacións agrarias pertencentes á AXE. A axuda non poderá superar a cantidade de 15.000 € por axente e ano nin de 45.000 € por solicitante e ano.


Artigo 3º.-Beneficiarios.

1. Poderán ter acceso a estas axudas as agrupacións de xestión de explotacións xa constituídas e as asociacións agrarias, cuxa forma xurídica sexa a de cooperativa, SAT ou agrupación de agricultores, formalmente constituída, mediante documento subscrito por todos os seus membros, que utilicen os servizos, a tempo completo, dun técnico cualificado para o desenvolvemento da xestión técnica, económica, financeira e administrativa das explotacións agrarias.


2. O número de agricultores afiliados non será inferior a 15 por cada técnico, agás naqueles casos en que, por razóns da orientación produtiva das explotacións, ou por colaborar en proxectos de investigación ligados a centros dependentes da Dirección Xeral de Investigación, Tecnoloxía e Formación Agroforestal, esta considere oportuno aceptar un número menor.


Artigo 4º.-Presentación de solicitudes, documentación e prazo.

1. As agrupacións e asociacións agrarias que, reunindo os requisitos sinalados nesta orde, desexen recibir as axudas descritas no artigo 2º, deberán formalizar a correspondente solicitude no modelo normalizado que se publica como anexo I, e que estará á disposición dos interesados nas dependencias das delegacións provinciais da Consellería do Medio Rural, nas oficinas agrarias comarcais e mais na páxina web da Consellería do Medio Rural.


2. A solicitude será subscrita polo representante legal das entidades e acompañarase da seguinte documentación:


a) Documentación acreditativa da representatividade suficiente para asinar a solicitude.


b) Copia dos estatutos e do CIF da entidade.

c) Documento subscrito por cada un dos membros participantes no programa, no cal se indiquen os seus datos de identificación, así como os das súas explotacións, a finalidade do programa de xestión empresarial que se vaia realizar e os compromisos adquiridos para levalo a cabo.


d) Programa de xestión, que inclúa unha memoria, indicando a necesidade, medios materiais e humanos para realizalo, normas de funcionamento, fins e resultados esperados. Este programa de xestión empresarial terá que considerar os seguintes obxectivos:


- Analizar os resultados das contabilidades dos agricultores, co fin de fundamentar consellos de xestión para as súas explotacións e as de agricultores con explotacións similares.


-Prestar asistencia técnica en aspectos relacionados coa actividade produtiva desenvolvida polas explotacións dos asociados, incidindo nas materias relacionadas co cumprimento da normativa das boas prácticas agrarias e ambientais, benestar animal e hixiene, así como asesoramento en materia de planificación, execución e financiamento de investimentos nas explotacións.


-Outros aspectos relacionados coa xestión técnica, económica, financeira e administrativa das explotacións e, de ser o caso, breve memoria das actividades de colaboración con proxectos de investigación dos centros dependentes da Dirección Xeral de Investigación, Tecnoloxía e Formación Agroforestal.


e) Presentar o curriculum vitae, que inclúa copia da titulación académica, de cada axente de xestión para que a Dirección Xeral de Investigación, Tecnoloxía e Formación Agroforestal poda avaliar a súa idoneidade para o desenvolvemento das funcións previstas no programa de xestión empresarial de acordo coa súa titulación e experiencia.


f) Certificación da entidade bancaria, que acredite a existencia da conta a nome da entidade solicitante.


g) Certificado de estar ao día nas súas obrigas fiscais, coa Seguridade Social e coa Administración da comunidade autónoma, de ser o caso.


h) Declaración do conxunto de todas as solicitudes de axuda, efectuadas ou concedidas, para o mesmo proxecto, polas distintas administracións públicas.


3. As solicitudes presentaranse preferentemente no rexistro da Consellería do Medio Rural, en calquera das súas dependencias provinciais e comarcais ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e irán dirixidas ao conselleiro do Medio Rural.


4. O prazo para a presentación das solicitudes será dun mes, contado desde o día seguinte ao da publicación desta orde.


5. No suposto de que a solicitude non cumpra os requisitos sinalados na convocatoria, ou a documentación presentada conteña erros ou sexa insuficiente, requirirase o solicitante para que no prazo de 10 días hábiles proceda a corrixir a deficiencia detectada, mediante a presentación da documentación requirida. Se non o fixese, considerarase que desiste da súa solicitude, logo de resolución nos termos establecidos no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común.


Artigo 5º.-Tramitación e resolución.

O procedemento que se seguirá para a resolución das solicitudes é o seguinte:

1. As solicitudes presentadas coa documentación correspondente remitiranse á Dirección Xeral de Investigación, Tecnoloxía e Formación Agroforestal que será o órgano a quen competa a tramitación das axudas.


2. Para a análise e valoración das solicitudes constituirase unha comisión de avaliación, que será a encargada de realizar o informe que lle elevará ao director xeral de Investigación, Tecnoloxía e Formación Agroforestal, quen redactará a oportuna proposta de resolución.


3. A Comisión de Avaliación estará presidida polo subdirector xeral de Formación e Transferencia Tecnolóxica e dela tamén forman parte: como secretario, un funcionario do Servizo de Formación Agroforestal, e, como vogais, o xefe do Servizo de Formación Agroforestal e o xefe do Servizo de Transferencia Tecnolóxica, Estudos e Publicacións.



Se por calquera causa, no momento en que a Comisión de Avaliación teña que examinar as solicitudes, algún dos seus integrantes non puidese asistir, será substituído polo funcionario que para o efecto designe o director xeral de Investigación Tecnoloxía e Formación Agroforestal.


4. A Comisión de Avaliación valorará, en función das dispoñibilidades orzamentarias, as solicitudes recibidas, que cumpran os requisitos establecidos nesta orde, de acordo cos seguintes criterios:


a) Orientación produtiva e tamaño das explotacións: até 10 puntos.

b) Colaboración en proxectos de investigación ligados a centros dependentes da Dirección Xeral de Investigación, Tecnoloxía e Formación Agroforestal: até10 puntos.


c) Número de explotacións receptoras do servizo: até 10 puntos.

d) Número de explotacións que van informatizar a súa xestión: até 10 puntos.

e) Porcentaxe de xóvenes ao fronte das explotacións: até 10 puntos.

f) Situación das explotacións en zona de montaña ou desfavorecida: 5 puntos.

5. A resolución de aprobación ou denegación das solicitudes, logo de informe da comisión de valoración e por proposta do director xeral de Investigación, Tecnoloxía e Formación Agroforestal, correspóndelle ao conselleiro do Medio Rural, e seralle notificada aos solicitantes.


6. As solicitudes poderán entenderse desestimadas se non se ditase resolución expresa no prazo de catro meses contados desde o día seguinte ao da publicación desta orde no Diario Oficial de Galicia.


7. De acordo co establecido na disposición adicional primeira do Decreto 132/2006, do 27 de xullo, de creación dos rexistros de axudas, subvencións e convenios e de sancións da Xunta de Galicia, a persoa solicitante da axuda consentirá expresamente a inclusión e publicidade dos datos relevantes referidos ás axudas e subvencións recibidas, así como ás sancións impostas, de ser o caso.


8. A concesión ou denegación da axuda seralle notificada directamente aos interesados, a través da Dirección Xeral de Investigación, Tecnoloxía e Formación Agroforestal. As resolucións ditadas poñen fin á vía administrativa, e contra elas poderase interpor, potestativamente, recurso de reposición perante o órgano que ditou o acto, no prazo dun mes desde a súa notificación, de acordo co disposto no artigo 117, da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999 ou, directamente, recurso contencioso-administrativo perante o órgano xurisdicional competente, no prazo de dous meses, contados desde o día seguinte ao da súa notificación, de conformidade co establecido na Lei 29/1998, reguladora da xurisdición contencioso-administrativa.


Artigo 6º.-Modificación da resolución de concesión.

Toda alteración das condicións para a concesión das axudas previstas nesta orde e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.


Artigo 7º.-Obrigas das entidades beneficiarias

As entidades beneficiarias das axudas deberán cumprir as seguintes obrigas:

a) Informar os receptores do servizo de que a axuda está financiada pola Consellería do Medio Rural e o Feoga e incluír os anagramas de ambas institucións nos documentos e publicidade relativos ao dito servizo.


b) Facilitar toda a información que lles sexa requirida pola Intervención Xeral da Comunidade Autónoma, polo Tribunal de Contas ou polo Consello de Contas no exercicio das súas funcións de fiscalización e control do destino dos fondos públicos e someterse ás actuacións de supervisión e control que en calquera momento poidan acordar os servizos competentes da Dirección Xeral de Investigación, Tecnoloxía e Formación Agroforestal no relativo ao cumprimento do programa de xestión da acción financiada.


c) Cando un axente de xestión cause baixa na agrupación e sexa substituído por outro, esta circunstancia deberá ser posta en coñecemento da Consellería do Medio Rural nun prazo máximo de 30 días desde que se produciu a baixa, solicitándose a autorización para o cambio e presentando a devandita documentación referida ao novo técnico.


Artigo 8º.-Xustificación e pagamento.

1. Conforme o previsto no artigo 16.3º do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, poderán concederse anticipos de até o 50% da subvención concedida, unha vez notificada a resolución da concesión da axuda.


2. Xunto coa certificación final e as facturas e nóminas pagadas, a agrupación de xestión empresarial entregará antes do 1 de decembro de 2008, unha memoria da actividade realizada, na cal se indicarán os datos técnicos e económicos que permitan avaliar os resultados do programa de xestión. Esta memoria incluirá, ademais, unha relación das explotacións que recibiron asistencia técnica e un resumo das visitas efectuadas.


3. A AXE remitirá certificado de estar ao día nas súas obrigas fiscais, coa Seguridade Social e coa Administración da comunidade autónoma, e unha copia cotexada das nóminas percibidas polos axentes de xestión.


4. No momento da xustificación da execución total do proxecto, e antes do pagamento final, o solicitante presentará unha declaración complementaria do conxunto das axudas solicitadas, tanto as aprobadas ou concedidas como as pendentes de resolución, para o mesmo proxecto, das distintas administracións públicas competentes ou de calquera dos seus organismos, entes ou sociedades.


Artigo 9º.-Financiamento das axudas.

O importe destas axudas sufragarase con cargo á aplicación orzamentaria 11.05.712C.772.0 dos orzamentos xerais da Comunidade Autónoma de Galicia para o ano 2007 cunha dotación de cento setenta e cinco mil setecentos trinta e catro euros con setenta e nove céntimos (175.734,79 €) para o ano 2007, e de douscentos dez mil euros (210.000 €) para 2008.


Disposición adicional

Nos aspectos non regulados nesta orde, haberá que aterse ao disposto nos artigos 78 e 79 do texto refundido da Lei de réxime financeiro e orzamentario de Galicia (Decreto lexislativo 1/1999, do 7 de outubro), e no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.


Disposición derradeira

Primeira.-Facúltase o director xeral de Investigación, Tecnoloxía e Formación Agroforestal para ditar as resolucións necesarias para a execución desta orde.


Segunda.-Esta orde entrará en vigor o día seguinte ao da súa publicación no Diario Oficial de Galicia.


Santiago de Compostela, 21 de setembro de 2007.

Alfredo Suárez Canal
Conselleiro de Medio Rural
Ver referencia pdf "18800D004P013.PDF"


[Páx. Anterior][Sumario D.O.G.][Páx. Seguinte]


© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es