Diario Oficial de Galicia
martes, 31 de xullo de 2007
III. OUTRAS DISPOSICIÓNS
Número do Dog:
147
Páxina do Dog:
13.043
Data da Disposición:
20 de xullo de 2007
Sección:
III. OUTRAS DISPOSICIÓNS
Organismo:
CONSELLERÍA DE INNOVACIÓN E INDUSTRIA
Rango:
Orde
Título:
Orde do 20 de xullo de 2007 pola que se establecen as bases reguladoras para a concesión, en réxime de concorrencia competitiva, de 36 bolsas para a formación de dinamizadores da Sociedade da Información na Comunidade Autónoma de Galicia e se procede á súa convocatoria para 2007 (código procedemento IN526A).
Orde do 20 de xullo de 2007 pola que se establecen as bases reguladoras para a concesión, en réxime de concorrencia competitiva, de 36 bolsas para a formación de dinamizadores da Sociedade da Información na Comunidade Autónoma de Galicia e se procede á súa convocatoria para 2007 (código procedemento IN526A).
O desenvolvemento da Sociedade da Información constitúe no momento actual unha das prioridades dos gobernos de todas as comunidades e nacións do noso contorno máis próximo. A Unión Europea vén manifestando reiteradamente a necesidade de promover políticas públicas orientadas á eliminación da chamada fenda dixital que se produce entre as comunidades máis avanzadas e aqueloutras cun menor nivel de desenvolvemento, así como entre diferentes colectivos que poden ter especiais dificultades de acceso ao coñecemento e uso das novas tecnoloxías da información e as comunicacións.
Na Comunidade Autónoma de Galicia, as competencias para o desenvolvemento da SI corresponden á Consellería de Innovación e Industria. Entre estas competencias están as de coordinación das actuacións dos diferentes entes públicos e das distintas administracións. A suma de esforzos considérase fundamental para poder alcanzar un desenvolvemento harmónico en todos os sectores, lograr a alfabetización dixital de toda a poboación e achegar nos próximos anos a comunidade autónoma aos niveis das comunidades máis avanzadas, corrixindo as deficiencias observadas que fan que, no momento actual, Galicia estea situada nos últimos lugares en relación coas demais comunidades autónomas do Estado español.
Co obxectivo de formar recursos humanos que dinamicen os diferentes colectivos que aínda non se achegaron á Sociedade da Información, a Consellería de Innovación e Industria puxo en marcha no ano 2006 o proxecto da Rede de Dinamización da Sociedade da Información en Galicia, co cal se formaron un total de 100 bolseiros dinamizadores, para que, unha vez adquirida a capacitación necesaria, sexan capaces de motivar a poboación do contorno dunha aula conformada como punto de acceso á Sociedade da Información, no emprego das novas tecnoloxías da información e as comunicacións e especialmente no uso da internet.
Esta convocatoria ten por finalidade avanzar no proxecto da Rede de Dinamización da Sociedade da Información en Galicia, ampliando o número de bolseiros capacitados para desempeñar as tarefas de dinamización da sociedade galega.
O desenvolvemento deste programa precisa, para a súa correcta execución, da participación doutros órganos da Xunta de Galicia, dos entes locais e das entidades que posúen as infraestruturas ás cales antes se fixo referencia, colaborando na formación dos dinamizadores, así como en actuacións complementarias que sirvan para difundir e fomentar o desenvolvemento da Sociedade da Información na comunidade autónoma.
Esta orde establece as bases para a concesión de bolsas de formación para dinamizadores que se desenvolverá en dúas fases: unha teórica e outra práctica, esta última desenvolverase nos centros dos organismos e entidades con que a Consellería de Innovación e Industria alcanzase un acordo de colaboración, en que se terá en conta, como unha prioridade, que os ditos organismos prevexan nos seus cadros de persoal algunha praza co perfil de dinamizador da Sociedade da Información.
Con esta finalidade e no uso das facultades que me foron conferidas,
DISPOÑO:
Artigo 1º.-Convocatoria e bases reguladoras.
1. Esta orde ten por obxecto aprobar as bases polas que se rexerá a concesión de bolsas para a formación de dinamizadores da Sociedade da Información na Comunidade Autónoma de Galicia (código procedemento IN526A) que se inclúen como anexo I.
2. Así mesmo, por medio desta orde convócanse as devanditas bolsas para o ano 2007.
Artigo 2º.-Solicitudes.
Para poder ser beneficiario da subvención deberá presentarse unha solicitude axustada aos modelos normalizados que se inclúen como anexos II e III desta orde, que irá acompañada dos documentos que se especifican no artigo 6.2º 2 das bases reguladoras.
Os formularios de solicitude de axuda regulados nesta orde cubriraos e obteraos, necesariamente, o solicitante a través da aplicación informática Internet Expres (procedemento IN526A) establecida na oficina virtual desta consellería, sita no enderezo da internet http//www.conselleriaiei.org. Tamén pode accederse desde o enderezo http//www.xunta.es da Xunta de Galicia, e mesmo neste sitio web facendo uso do Rexistro Telemático e do enlace dispoñible co procedemento IN526A.
Para cubrir correctamente os formularios de solicitude, no citado enderezo da internet disporase de instrucións de axuda que deberán ser observadas en todo momento polos solicitantes.
Poderanse cubrir e obter só formularios ata as 24 horas do día anterior á data de finalización do prazo de presentación de solicitudes.
En caso de dúbida, dificultades técnicas ou necesidade de máis información, poderán dirixirse á Dirección Xeral de Promoción Industrial e da Sociedade da Información, a través dos teléfonos 981 54 55 83 ou 981 54 55 35, do número de fax 981 54 47 06 ou do enderezo de correo electrónico axudas.dxpisi@xunta.es, que adoptará as medidas necesarias para facilitar a presentación por escrito de solicitudes.
Os anexos II e III desta convocatoria publícanse no DOG exclusivamente para efectos informativos, sendo necesario empregar a aplicación informática indicada para a obtención dos formularios de solicitude. A presentación de solicitudes que non cumpra o aquí indicado será motivo de inadmisión a trámite da solicitude.
Para formalizar a solicitude, logo de obter e cubrir os formularios de acordo co previsto neste artigo, o interesado presentará a documentación sinalada no artigo 6.2º das bases reguladoras dirixida ao conselleiro de Innovación e Industria.
Artigo 3º.-Lugar e prazo de presentación das solicitudes.
As solicitudes presentaranse preferentemente no rexistro da Consellería de Innovación e Industria, así como nos de calquera outro órgano da Administración xeral do Estado, das comunidades autónomas ou das entidades que integran a Administración local, sempre que neste último caso se teña subscrito o oportuno convenio, ou polos restantes medios previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
A data límite para a presentación de solicitudes será o día 31 de agosto de 2007.
Artigo 4º.-Prazo de duración do procedemento de concesión.
Unha vez rematado o prazo para a presentación de solicitudes, estas serán tramitadas e valoradas de acordo co procedemento establecido nas bases reguladoras, que non poderá ter unha duración superior a 6 meses.
Dentro deste prazo, e dado o carácter de concorrencia competitiva da convocatoria, poderanse realizar os requirimentos de emenda das solicitudes mediante publicación no DOG.
Artigo 5º.-Información aos interesados.
Sobre este procedemento administrativo, que ten o código IN526A, poderase obter documentación normalizada ou información adicional na Dirección Xeral de Promoción Industrial e Sociedade da Información, a través dos seguintes medios:
a) Páxina web oficial da consellería (www.conselleriaiei.org) no seu enlace de axudas e na oficina virtual.
b) Nos teléfonos 981 54 55 83 e 981 54 55 35 da devandita dirección xeral.
c) No enderezo electrónico axudas.dxpisi@xunta.es.
d) Presencialmente.
Así mesmo, para cuestións xerais sobre este ou outro procedemento, poderá facerse uso do teléfono de información xeral da Consellería de Innovación e Industria 981 54 43 41.
Disposicións derradeiras
Primeira.-Habilitación para o desenvolvemento.
Facúltase a directora xeral de Promoción Industrial e Sociedade da Información para que dite as resolucións necesarias que sexan precisas para o desenvolvemento e aplicación desta orde.
Segunda.-Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 20 de xullo de 2007.
Fernando Xabier Blanco Álvarez
Conselleiro de Innovación e Industria
ANEXO I
Bases reguladoras para a concesión, en réxime de concorrencia competitiva, de 36 bolsas para a formación de dinamizadores da Sociedade da Información na Comunidade Autónoma de Galicia.
Artigo 1º.-Obxecto e réxime da subvención.
1. As bolsas reguladas por estas bases teñen por obxecto proporcionarlles ás persoas seleccionadas a capacitación necesaria para propiciar o achegamento dos cidadáns ás aulas de recursos para a Sociedade da Información, para que se familiaricen co uso das novas tecnoloxías, para guialos no proceso da súa alfabetización dixital, informalos das oportunidades que brindan as administracións para a adquisición de tecnoloxía de acceso á internet, detectar as necesidades de servizos e contidos que poden ser útiles para a poboación con que están en contacto, xestionar a aula de acceso á Sociedade da Información, programar e impartir obradoiros formativos adecuados aos distintos colectivos que integran a poboación do territorio en que estea situado e colaborar en rede coa Dirección Xeral de Promoción Industrial e Sociedade da Información e co resto do persoal doutras aulas de recursos para a Sociedade da Información.
2. O procedemento de concesión desta subvención tramitarase en réxime de concorrencia competitiva.
Artigo 2º.-Beneficiarios.
Poderán optar á concesión destas bolsas as persoas que reunan os seguintes requisitos:
a) Estar domiciliado na Comunidade Autónoma de Galicia.
b) Ter nacido no ano 1977 ou con posterioridade e ser maior de dezaoito anos na data de remate do prazo de presentación de solicitudes.
c) Ter coñecemento da lingua galega que se acreditará co certificado do curso de iniciación ou perfeccionamento de galego ou equivalente, debidamente homologado polo órgano competente en materia de política lingüística da Xunta de Galicia, así como con títulos expedidos pola escola oficial de idiomas.
d) Posuír algunha das seguintes titulacións:
- Técnico ou técnico superior da área de servizos socioculturais e a comunidade.
- Diplomado universitario en Educación Social.
-Diplomado universitario en Traballo Social.
Non poderán obter a condición de beneficiario aqueles nos cales concorra algunha das circunstancias previstas no artigo 13 da Lei 38/2003, do 17 de novembro, xeral de subvencións. A acreditación de non estar incursos nas ditas prohibicións realizarase mediante declaración responsable do interesado (anexo III).
Artigo 3º.-Características e duración das bolsas.
O programa de formación desenvolverase nas seguintes fases:
-Fase I.-Formación teórica.
Terán acceso a esta fase un total de 36 bolseiros/as que realizarán un curso que terá unha duración mínima de 240 horas, a razón de 30 horas semanais, en que se cubrirán os seguintes obxectivos:
-Coñecemento dos efectos que a Sociedade da Información produce sobre a sociedade en xeral, sobre o movemento asociativo e sobre o tecido empresarial.
-Estratexias de dinamización dos diferentes colectivos sociais.
-Manexo das ferramentas informáticas máis usuais: sistemas operativos, ofimática, mantemento de equipamentos, software de seguridade, mantemento e creación de redes, páxinas web, tratamento de imaxes, etc.
-Coñecemento das características de diferentes servizos electrónicos tales como administración electrónica, sinatura electrónica, comercio electrónico, etc.
-Xestión da documentación propia dun punto de acceso á Sociedade da Información: programas de xestión, elaboración de relatorios e memorias, lexislación, etc.
-Programación de accións de formación, tendo en conta todos os parámetros necesarios: destinatarios, recursos, metodoloxía, avaliación, etc.
-Elaboración de propostas de material didáctico para empregar como recurso formativo nos obradoiros e charlas-coloquio.
-Habilidades sociais: atención ao público, captación de usuarios, resolución de problemas, dirección de grupos, etc.
-Elaboración de propostas de novos servizos e novos contidos.
-Perfeccionamento do uso e coñecemento da lingua galega con especial incidencia na terminoloxía que deberá ser empregada no ámbito das TIC.
-Elaboración, ao finalizar este primeira fase de formación, e a partir dos coñecementos adquiridos nela, dun proxecto de dinamización da Sociedade da Información que logo se porá en marcha na fase II da formación.
O curso ten previsto o seu comezo no mes de outubro de 2007 e desenvolverase simultaneamente en Lugo e na Coruña, en xornadas de mañá e/ou tarde, de luns a venres, ata completar as horas programadas.
O calendario do curso, así como os lugares onde se realizará seralles comunicado ás persoas seleccionadas cun mínimo de cinco días de antelación ao inicio do curso.
O curso será titorizado por un profesor/a experto/a e con experiencia na materia que realizará unha avaliación continua do proceso de formación e emitirá, en función do aproveitamento do curso, a cualificación final dos alumnos/as.
Para superar o curso será preciso superar todos os módulos en que se estruture o programa e que as faltas de asistencia, incluso xustificadas, non superen o 10% das horas programadas. Calquera circunstancia extraordinaria será avaliada pola comisión de selección
A comisión de selección garantirá a homoxeneidade no proceso de avaliación feito polos titores e a homoxeneidade das probas que se realicen ao longo desta primeira fase de formación.
Fase II.-Formación práctica.
Terán acceso a esta fase os 36 candidatos, sempre que superasen todos os módulos en que se estruture o programa da fase I da formación. As cualificacións finais da fase I serán as que determine a comisión de selección logo de estudadas as avaliacións feitas polos correspondentes titores. Esta fase da formación realizarase nalgún centro que dispoña dunha aula de recursos para a Sociedade da Información, tales como os puntos de acceso á Sociedade da Información (PASI), aulas de asociacións de empresarios de polígonos empresariais ou outras similares de asociacións ou institucións de carácter público ou privado, da comunidade autónoma, cos cales a Consellería de Innovación e Industria alcanzase un acordo de colaboración. Estes centros poden estar situados en calquera dos concellos da Comunidade Autónoma de Galicia.
Os bolseiros escollerán os destinos que se lles oferten para realizar as prácticas pola orde de puntuación acadada no curso de formación. Para o caso de empate nas puntuacións aplicaranse os mesmos criterios que figuran no artigo 10º destas bases reguladoras. No acto de escolla indicaráselles a data en que deben presentarse no centro escollido. De non facelo así entenderase que renuncian á bolsa de prácticas que lles puidese corresponder.
Durante esta fase, que terá un horario de trinta e cinco horas semanais, os/as bolseiros/as, contarán co asesoramento, orientación e dirección dun coordinador e un titor, designados pola Dirección Xeral de Promoción Industrial e Sociedade da Información que serán os responsables de definir as tarefas que deban realizar e as reunións de seguimento ás que deben asistir. A duración desta fase será de nove meses.
Nesta fase II, os gastos ocasionados con motivo dos desprazamentos necesarios para que os bolseiros poidan realizar as prácticas que lles son encomendadas no ámbito xeográfico correspondente, serán pagados, logo da certificación expedida pola Dirección Xeral de Promoción Industrial e Sociedade da Información acreditativa dos gastos producidos, sen que estes poidan superar a contía establecida para o grupo II do Decreto 144/2001, do 7 de xuño, sobre indemnizacións por razón de servizo ao persoal con destino na Administración autonómica de Galicia.
Segundo a Resolución do 29 de decembro de 2005 pola que se ordena a publicación do acordo do Consello da Xunta de Galicia do 29 de decembro de 2005, sobre a revisión da contía da indemnización por uso do vehículo particular e das axudas de custo en territorio nacional, a contía da indemnización por desprazamento será de 0,19 euros por quilómetro percorrido.
Estes gastos de desprazamento aboaraos a Dirección Xeral de Promoción Industrial e Sociedade da Información con cargo á aplicación orzamentaria 10.04.571A.480.0 dos orzamentos do ano 2008.
Artigo 4º.-Dotación económica.
O pagamento das bolsas realizarase da seguinte forma: o correspondente á fase I, unha vez finalizada esta, segundo o disposto no artigo 3º destas bases reguladoras. Durante a fase II, por períodos mensuais vencidos e despois de que o titor correspondente expida certificación en que se faga constar que se cumpriu o programa inicialmente proxectado e se acadaron os obxectivos previstos.
No caso de producirse a incorporación ou o cesamento nun día distinto ao primeiro ou ao último de cada mes, o/a bolseiro/a percibirá o importe que proporcionalmente lle corresponda ao número de días que gozase da bolsa. Así mesmo, no caso de faltas de asistencia inxustificadas, o bolseiro percibirá o importe proporcional correspondente ao tempo de formación efectivo.
1. Durante a fase I, formación teórica, as persoas seleccionadas recibirán unha axuda económica total de 1.000 € que lles serán aboados á finalización do curso. Non serán aboados pagamentos parciais aos bolseiros/as que non rematasen o curso ou superen as faltas de asistencia permitidas.
2. Durante a fase II de formación práctica, percibirán unha axuda de 900 € mensuais brutos.
3. As persoas que obteñan a bolsa terán dereito a un seguro de asistencia médica e a un seguro de accidentes.
Artigo 5º.-Financiamento e concorrencia.
1. Para a concesión destas bolsas destínase un crédito de 327.600 €, que serán imputado á aplicación orzamentaria 10.04.571A.480.0 dos orzamentos xerais da comunidade autónoma distribuído nas seguintes anualidades:
-Para a anualidade de 2007: 36.000 €.
-Para a anualidade de 2008: 291.600 €.
2. A percepción destas bolsas é incompatible con calquera outra bolsa ou axuda financiada por calquera administración, institución ou ente público, así como con soldos ou salarios que impliquen vinculación contractual ou estatutaria dos interesados.
3. As bolsas reguladas nesta convocatoria serán incompatibles con ter sido beneficiario con anterioridade doutra bolsa de formación de dinamizadores convocada pola Consellería de Innovación e Industria.
Artigo 6º.-Solicitudes.
1. As solicitudes para participar no procedemento de concesión da subvención presentaranse na forma e no prazo que se indican nos artigos 2º e 3º desta convocatoria.
2. As solicitudes estarán compostas pola seguinte documentación en único exemplar:
2.1. Formularios normalizados de solicitude compostos polos anexos II e III, obtidos necesariamente a través da aplicación informática sinalada no artigo 2º da convocatoria, debidamente asinados.
a) Anexo II (modelo normalizado da solicitude).
-Solicitude.
b) Anexo III (modelo de declaración xurada).
-Declaración expresa sobre a concesión ou solicitude doutras axudas ou subvencións para o mesmo proxecto e conceptos, procedentes de calquera administración ou entes públicos, nacionais ou internacionais.
-Declaración expresa de non estar incurso en ningunha das circunstancias previstas no artigo 13 da Lei 38/2003, do 17 de novembro, xeral de subvencións.
2.2. Orixinal ou copia cotexada da seguinte documentación:
a) Fotocopia do DNI do solicitante.
b) Fotocopia do DNI do representante, de ser o caso.
c) Documento do poder con que actúa o representante, de ser o caso.
d) Certificado de empadroamento.
e) Acreditación do coñecemento da lingua galega.
f) Acreditación do coñecemento da lingua inglesa.
g) Certificacións de asistencia a cursos de formación.
h) Copia do correpondente título académico.
i) Certificación académica completa en que se detallen as cualificacións e a nota media obtida no correspondente título, conforme o modelo oficial de certificación académica da Resolución do 15 de marzo de 2005 da Secretaría Xeral da Consellería de Educación e Ordenación Universitaria (Diario Oficial de Galicia número 57, do 23 de marzo).
Os/as solicitantes con algún grao de discapacidade deberán sinalalo no formulario de solicitude, indicando o grao de discapacidade que teñan recoñecido e, de ser o caso, solicitar as adaptacións de tempo e medios que consideren necesarias.
Artigo 7º.-Consentimentos e autorizacións.
1. A presentación da solicitude implica o coñecemento e a aceptación destas bases reguladoras e da orde de convocatoria. De conformidade co artigo 43 da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, a presentación da solicitude de concesión da subvención comportará a autorización do solicitante para que o órgano concedente obteña de forma directa a acreditación do cumprimento das súas obrigas tributarias co Estado, coa Comunidade Autónoma e coa Seguridade Social, a través de certificados telemáticos.
Igualmente, de conformidade co mesmo artigo, se o solicitante indica que certa documentación que se deba usar neste procedemento xa está no poder da Administración, a presentación da solicitude implica a autorización ao órgano instrutor para acceder a ela. Para estes efectos, a documentación debe manterse vixente e identificarse no formulario de solicitude o procedemento administrativo para o cal foi presentada.
2. De acordo co establecido na disposición adicional primeira do Decreto 132/2006, do 27 de xullo, de creación dos rexistro de axudas, subvencións e convenios e de sancións da Xunta de Galicia, a persoa solicitante da subvención consentirá expresamente a inclusión e publicidade dos datos relevantes referidos ás axudas e subvencións recibidas, así como ás sancións impostas, no devandito rexistro, feito que terá lugar agás nos supostos legalmente establecidos.
3. De conformidade co artigo 13.4º da Lei 4/2006, do 30 de xuño, de transparencia e boas prácticas na Administración pública galega, esta consellería publicará na súa páxina web oficial a relación dos beneficiarios e o importe das axudas concedidas, polo que a presentación da solicitude leva implícita a autorización para o tratamento necesario dos datos dos beneficiarios e a súa publicación na citada páxina web, coas excepcións previstas nas leis.
Artigo 8º.-Órganos competentes.
A Dirección Xeral de Promoción Industrial e Sociedade da Información será o órgano competente para a instrución do procedemento de concesión das bolsas e correspóndelle ao conselleiro de Innovación e Industria ditar a resolución de concesión.
Artigo 9º.-Instrución dos procedementos.
1. De conformidade co establecido no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, se a solicitude non reúne algún dos requisitos exixidos nestas bases reguladoras ou na correspondente convocatoria, requirirase o interesado para que, nun prazo de dez días hábiles, emende a falta ou achegue os documentos preceptivos. Neste requirimento farase indicación expresa de que, se así non o fixese, terase por desistido na súa petición, logo da correspondente resolución.
Este requirimento de emenda tamén se fará se das certificacións obtidas de conformidade co artigo 7º.1 das bases reguladoras resulta que o solicitante non se atopa ao día no pagamento das súas obrigas tributarias e sociais co Estado, coa Comunidade Autónoma e coa Seguridade Social.
2. Por tratarse dun procedemento de concorrencia competitiva, e de conformidade co establecido nos artigos 59.6º b), 60 e 61 da indicada Lei 30/1992, os requirimento citados de emenda poderanse facer mediante publicación no DOG, e producirán os mesmos efectos que a notificación individualizada. A dita publicación tamén se realizará no taboleiro de anuncios da páxina web da Consellería de Innovación e Industria. Se a instrución do procedemento o aconsellase, o órgano competente poderá substituír esta publicación no DOG e na web, pola notificación individualizada de conformidade co establecido no artigo 59 da Lei 30/1992, do 26 de novembro.
3. Sen prexuízo do disposto nos parágrafos anteriores, poderá requirirse ao solicitante que achegue cantos datos, documentos complementarios e aclaracións resulten necesarios para a tramitación e resolución do procedemento.
4. Unha vez revisadas as solicitudes e as emendas feitas, aqueles expedientes administrativos que reúnan todos os requisitos e a documentación necesaria serán remitidos á comisión encargada da súa valoración, de acordo co establecido no artigo seguinte.
5. Os expedientes que non cumpran as exixencias contidas nestas bases ou na normativa de aplicación, ou que non conteñan a documentación necesaria, quedarán á disposición do órgano instrutor para que formule a proposta de resolución de inadmisión, na que se indicarán as causas desta.
Artigo 10º.-Comisión de valoración.
1. A comisión de valoración será o órgano colexiado encargado de valorar as solicitudes de acordo cos criterios obxectivos fixados neste mesmo artigo, así como de propoñer a concesión ou denegación das subvencións aos interesados.
2. A composición da comisión de valoración será a seguinte:
a) Presidenta: a directora xeral de Promoción Industrial e da Sociedade da Información.
b) Dous vogais: o subdirector xeral de Desenvolvemento da Sociedade da Información e a xefa do Servizo de Desenvolvemento da Sociedade da Información.
c) Secretario/a: un funcionario da Dirección Xeral de Promoción Industrial e Sociedade da Información.
3. Os/as suplentes serán designados/as pola Dirección Xeral de Promoción Industrial e Sociedade da Información.
4. Así mesmo, a comisión poderá dispoñer a constitución dunha subcomisión técnica para os efectos de colaborar na revisión e valoración dos documentos achegados xunto coa solicitude. Tanto os membros da comisión como os membros da subcomisión técnica poderán percibir axudas de custo por asistencia e axudas para gastos de locomoción por concorrer ás sesións conforme o Decreto 144/2001, do 7 de xuño (DOG do 25 de xuño).
5. A selección de aspirantes realizarase mediante a valoración dos méritos acreditados conforme o seguinte baremo:
a) Expediente académico: ata 5 puntos.
b) Coñecemento da lingua galega: ata 3 puntos.
c) Coñecemento de inglés: ata 2 puntos.
d) Outros méritos do currículo: ata 2 puntos.
6. A comisión de selección elaborará a relación de candidatos por orde de puntuación, que se publicará na páxina web: www.conselleriaiei.org, concedendo aos solicitantes un prazo de dez días desde a data de publicación na web para que formulen as alegacións que consideren oportunas, de conformidade co establecido no artigo 84 da Lei 30/1992, do 26 de novembro, co obxecto de realizar o trámite de audiencia anterior á proposta de resolución.
7. Para o caso de empate na puntuación obtida, este resolverase aplicando os seguintes criterios: en primeiro lugar, terán preferencia as mulleres e de persistir o empate, os/as candidatos/as de maior idade e, en último termo, resolverase por orde alfabética comezando polo primeiro apelido. Para este último caso, a comisión de selección escollerá ao chou, en acto público ao que serán invitados todos os afectados, e que será anunciado a través da web www.conselleriaiei.org, a letra de inicio da relación alfabética de apelidos.
Artigo 11º.-Resolución e notificación.
1. Despois de analizar as alegacións presentadas, se for o caso, a comisión de selección elevaralle ao conselleiro de Innovación e Industria, a través da Dirección Xeral de Promoción Industrial e Sociedade da Información, a relación de 36 persoas propostas para a concesión das bolsas e a lista de reserva para o caso de non-aceptación ou renuncia dalgunha das propostas.
2. O conselleiro de Innovación e Industria ditará resolución que será publicada no DOG, na web: www.conselleriaiei.org e notificada aos adxudicatarios/as.
3. O prazo máximo para resolver e notificar a resolución ao interesado será de seis meses contados a partir do seguinte ao da publicación da orde de convocatoria no Diario Oficial de Galicia. Se transcorrese o prazo máximo para resolver sen que recaese resolución expresa, os interesados poderán entender desestimadas as súas solicitudes por silencio administrativo.
4. O conselleiro de Innovación e Industria, por proposta xustificada da Dirección Xeral de Promoción Industrial e Sociedade da Información, poderá revogar a concesión da bolsa se a persoa beneficiaria incumprise as condicións impostas con motivo da súa concesión.
5. Todas as resolucións serán notificadas de acordo co establecido na Lei 30/1992, do 26 de novembro, de réxime xurídico das administracións públicas e do procedemento administrativo común. Non obstante, e de conformidade co establecido no artigo 59.6º b) da indicada lei, poderase substituír a notificación individual pola publicación no Diario Oficial de Galicia e na páxina web Consellería de Innovación e Industria. Nesta publicación especificarase a data da convocatoria, o beneficiario, a cantidade concedida e a finalidade da subvención outorgada. Coa publicación no DOG poderá remitirse aos beneficiarios a que consulten información detallada da resolución nun taboleiro da citada web.
Artigo 12º.-Réxime de recursos.
As resolucións ditadas ao abeiro da correspondente orde de convocatoria poñerán fin á vía administrativa e contra elas poderán interpoñerse os seguintes recursos, sen prexuízo de que os interesados poidan exercer calquera outro que consideren procedente:
a) Recurso potestativo de reposición ante o conselleiro de Innovación e Industria, no prazo dun mes contado a partir do día seguinte ao da notificación da resolución, se esta fose expresa, ou de tres meses contados a partir do seguinte a aquel no que se produza o acto presunto.
b) Recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da notificación da resolución, se esta fose expresa, ou de seis meses contados a partir do seguinte a aquel no que se produza o acto presunto.
Artigo 13º.-Modificación da resolución.
Toda alteración das condicións tidas en conta para a concesión da bolsa e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.
Artigo 14º.-Obrigas dos beneficiarios.
Son obrigas das persoas beneficiarias das bolsas:
a) Presentar, no momento da toma de posesión, declaración de non percibir outras bolsas ou axudas así como soldos ou salarios que impliquen vinculación contractual ou estatutaria dos interesados.
b) Presentar ao remate da bolsa unha memoria detallada das actividades realizadas, na que especificará o programa desenvolvido e os obxectivos acadados.
c) Comunicar a súa renuncia, no caso de se producir con posterioridade ao inicio da formación, á Dirección Xeral de Promoción Industrial e Sociedade da Información, con cinco días de antelación á data de cesamento.
d) Comunicarlle á Dirección Xeral de Promoción Industrial e Sociedade da Información a obtención doutras bolsas ou axudas así como de calquera outra alteración dos requisitos impostos aos beneficiarios/as para o outorgamento destas bolsas.
Artigo 15º.-Natureza xurídica da relación.
A condición de beneficiario/a destas bolsas non xerará relación laboral ou contractual de ningún tipo coa Xunta de Galicia, nin cos organismos ou entidades nas que realizasen o período de formación práctica, nin a súa inclusión na Seguridade Social.
Artigo 16º.-Incumprimento, reintegros e sancións.
1. O incumprimento das obrigas contidas nestas bases reguladoras, na convocatoria ou na demais normativa aplicable, así como das condicións que, se é o caso, se establezan na resolución de concesión, dará lugar á obriga de devolver total ou parcialmente a/s subvención/s percibida/s, así como os xuros de demora correspondentes.
2. Para facer efectiva a devolución a que se refire o número anterior tramitarase o oportuno procedemento de reintegro, que se axustará ao previsto no artigo 78.10º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, e na súa normativa de desenvolvemento.
3. Aos beneficiarios da/s subvención/s reguladas nestas bases seralles de aplicación o réxime de infraccións e sancións previsto no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, e na súa normativa de desenvolvemento e no capítulo VII do Decreto 287/2000, do 21 de novembro.
4. Así mesmo, procederá o reintegro do exceso percibido nos supostos nos que o importe da subvención, illadamente ou en concorrencia con subvencións ou axudas doutras administracións públicas ou doutras entidades públicas ou privadas, nacionais ou internacionais, supere o importe da bolsa.
Artigo 17º.-Control.
1. A Consellería de Innovación e Industria poderá facer as actividades de inspección que considere oportunas para controlar o cumprimento das subvencións.
2. Alén do anterior, as subvencións estarán sometidas á función interventora e de control financeiro exercido pola Intervención Xeral da Comunidade Autónoma, nos termos que establece o Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, e a súa normativa de desenvolvemento. Así mesmo, estará sometida ás actuacións de comprobación previstas na lexislación do Tribunal de Contas e do Consello de Contas.
Artigo 18º.-Remisión normativa.
Para todo o non previsto nestas bases estarase ao previsto no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, e no resto de normativa que resulte de aplicación.
Santiago de Compostela, 20 de xullo de 2007.
O conselleiro de Innovación e Industria.
Ver referencia pdf "14700D007P027.PDF"
Ver referencia pdf "14700D009P035.PDF"
![[Páx. Anterior]](15x_archivos/f_izqda.gif)
![[Sumario D.O.G.]](15x_archivos/f_arriba.gif)
![[Páx. Seguinte]](15x_archivos/f_dercha.gif)
© Xunta de Galicia
Información mantida pola Xunta de
Galicia
Servizo prestado pola Consellería de Presidencia, AA.PP. e
Xustiza
Correo electrónico: webdoga
xunta.es