Diario Oficial de Galicia
mércores, 1 de agosto de 2007

III. OUTRAS DISPOSICIÓNS

Número do Dog:

148


Páxina do Dog:

13.124


Data da Disposición:

28 de xuño de 2007


Sección:

III. OUTRAS DISPOSICIÓNS


Organismo:

CONSELLERÍA DE MEDIO AMBIENTE E DESENVOLVEMENTO SOSTIBLE


Rango:

Orde


Título:

Orde do 28 de xuño de 2007 pola que se establecen as bases e se convoca a I edición dos Premios Galicia á Pequena e Mediana Empresa Sustentable.



Orde do 28 de xuño de 2007 pola que se establecen as bases e se convoca a I edición dos Premios Galicia á Pequena e Mediana Empresa Sustentable.

A sustentabiildade empresarial é o novo punto de referencia e apoio para as empresas que desexan prosperar tendo moi en conta nas súas actuacións o respecto ambiental e a utilización das mellores tecnoloxías dispoñibles (MTD) a través de proxectos que repercutan na sociedade como exemplificadores de comportamento respectuoso co ambiente.


A día de hoxe e no futuro máis tenderá a realizarse unha xestión empresarial sometida ademais de a criterios de rendibilidade, a parámetros de transparencia, comportamento ético, responsabilidade ambiental e sensibilidade social. Desde esta perspectiva, a Consellería de Medio Ambiente e Desenvolvemento Sostible pretende fomentar a contribución da empresa á mellora social, ao respecto ambiental e á rendibilidade, impulsando unha conciencia de mellora da actuación empresarial de cara ao seu contorno de xeito integral.


Co obxecto de recoñecer publicamente aquelas pequenas e medianas empresas máis innovadoras e servir de exemplo ao noso tecido empresarial, a Consellería de Medio Ambiente e Desenvolvemento Sostible crea os Premios Galicia á Pequena e Mediana Empresa Sustentable como estímulo para animar as empresas con sede social na Comunidade Autónoma de Galicia a iniciar un camiño de boas prácticas e de introdución da sustentabilidade.


En virtude do anterior, en consonancia co disposto no artigo 27.15º do Estatuto de autonomía de Galicia e no uso das atribucións que me confire o artigo 34 da Lei 1/1983, do 22 de febreiro, reguladora da Xunta e do seu presidente,


DISPOÑO:

Artigo 1º.-O obxecto desta orde é a creación dos Premios Galicia á Pequena e Mediana Empresa (en adiante PEME) Sustentabilidade, así como a convocatoria da I Edición dos Premios Galicia á PEME Sustentable para o ano 2007.


Artigo 2º.-Outorgaranse 3 premios coa seguinte dotación económica:

-1º premio: dotado de 5.000 euros e o galardón Galicia á PEME sustentable.

-2º premio: dotado de 3.000 euros e o galardón Galicia á PEME sustentable.

-3º premio: dotado de 2.000 euros e o galardón Galicia á PEME sustentable.

Os premios financiaranse con cargo á partida orzamentaria 15.04.541E-770.1, dos orzamentos xerais da Comunidade Autónoma de Galicia para o ano 2007.


Artigo 3º.-A concesión dos premios tramitarase baixo o réxime de concorrencia competitiva e axustarase no seu desenvolvemento ás seguintes bases:


Primeira.-Obxecto.

Os premios obxecto desta convocatoria teñen por obxecto premiar a implementación do desenvolvemento sustentable no ámbito da pequena e mediana empresa de Galicia, amosando unha mellora para o ambiente e para o contorno en xeral, nos termos que se recollen na base terceira desta orde.


Segunda.-Beneficiarios.

1. Poderán participar nesta convocatoria de premios calquera pequena ou mediana empresa con sede social na Comunidade Autónoma de Galicia.


2. Non poderán ter condición de beneficiarios das axudas previstas nesta orde, as persoas ou entidades en que se produza algunha das circunstancias previstas no artigo 13.2º da Lei 38/2003, do 17 de novembro, xeral de subvencións.


Terceira.-Premios.

1. Outorgaranse 3 premios coa dotación económica establecida no artigo 2º desta orde.


2. O importe dos premios estará suxeito a retención fiscal, de acordo coa lexislación vixente.


Cuarta.-Accións que se premiarán.

1. Os premios nesta orde convocados galardoarán as Pemes galegas que incorporasen o desenvolvemento sustentable na súa xestión empresarial. Así mesmo, os premios valorarán as accións que fosen implementadas pola empresa e que supoñan unha mellora conxunta nos tres piares do desenvolvemento sustentable: o ambiental, o social e o económico. Os aspectos que se van valorar son os seguintes:


-Respecto ambiental: que a PEME levase a cabo accións a favor da preservación e difusión dos valores ambientais, actividades orientadas á aplicación de medidas de prevención da contaminación, redución do impacto ambiental ou desenvolvemento de novas tecnoloxías de produción, entre outras que se consideren adecuadas ao obxecto desta orde no eido ambiental.


-Vantaxes sociais: que puxese en marcha medidas que repercutan nunha maior igualdade de oportunidades e mellora social, que posibiliten a conciliación familiar e laboral dos seus traballadores, a inserción social de colectivos minoritarios, medidas de fomento da estabilidade no emprego, seguridade e medidas para atallar a sinistralidade laboral, ou outras neste sentido.


-Vantaxes económicas: que as accións realizadas mellorasen a súa rendibilidade e solvencia económica.


2. Non serán valoradas aquelas solicitudes que non amosen accións nos tres piares da sustentabilidade mencionados.


Quinta.-Prazo de presentación.

O prazo de presentación comezará o día seguinte ao da publicación desta orde no Diario Oficial de Galicia e finalizará o día 1 de setembro do 2007, debendo xuntarse a memoria para avaliar e a demais documentación que se exixe na base sexta desta orde.


Sexta.-Presentación de solicitudes e documentación.

1. Para a participación nesta convocatoria será necesaria a presentación da seguinte documentación:


a) Instancia dirixida á Dirección Xeral de Desenvolvemento Sostible segundo modelo normalizado que se recolle no anexo I desta orde.


b) Memoria explicativa da acción de mellora integradora, en que se inclúa as seguintes epígrafes:


-Período de execución da acción, só serán tidas en conta as accións desenvoltas antes da data límite de presentación de instancias recollida nesta orde.


-Obxectivos fixados.

-Persoas da empresa implicadas.

-Achega financeira.

-Resultados obtidos e plans vindeiros en relación co proxecto.

-Detalle da acción en que se amosen as actuacións desenvoltas pola empresa, para o que poderá xuntarse o material adicional que se considere pertinente para a presentación e avaliación da proposta, como fotografías, vídeos, etc…


-Políticas e sistemas de xestión ambiental e/ou social adoptados.

-Transparencia da xestión socialmente responsable, desagregación das actuacións levadas a cabo para contribuír a unha sociedade máis equitativa, información sobre códigos de conduta que teña explicitado a PEME, elaboración de memorias de sustentabilidade, etc…


-Así como outra información non prevista e que se considere de interese para unha mellor avaliación da candidatura.


2. De conformidade co artigo 13.3º e 4º da Lei 4/2006, do 30 de xuño, de transparencia e de boas prácticas na Administración pública galega, a Consellería de Medio Ambiente e Desenvolvemento Sostible publicará na súa páxina web oficial a relación de beneficiarios e o importe das axudas concedidas, polo que a presentación da solicitude leva implícita a autorización para o tratamento necesario dos datos dos beneficiarios e da súa publicación na citada páxina web.


Sétima.-Comisión de valoración.

Os proxectos presentados que se axusten a esta convocatoria serán valorados por unha comisión presidida polo director xeral de Desenvolvemento Sostible, ou persoa en quen delegue, e integrada polos seguintes vogais:


-O subdirector/a xeral de Fomento do Desenvolvemento Sostible.

-Un representante da Dirección Xeral de Calidade e Avaliación Ambiental.

-Tres vogais en representación da Confederación de Empresarios de Galicia, designados polo seu presidente.


-Un vogal da Federación Ecoloxista Galega, designado polo seu presidente.

-Un vogal do Instituto Galego de Promoción Económica.

-Un vogal de cada un dos seguintes sindicatos: CC.OO, UGT e CIG.

-O xefe/a do Servizo de Promoción da Sostibilidade, que actuará de secretario/a con voz pero sen voto.


Oitava.-Criterios de valoración.

1. Os criterios específicos de avaliación estarán baseados nas características da acción, porén, os aspectos que se terán en conta serán:


-Os resultados efectivos da súa implementación.

-O carácter innovador da acción para o progreso da implementación do desenvolvemento sustentable.


-Os beneficios ambientais que amosen unha maior eficacia no uso dos recursos.

-As vantaxes sociais que atinxen a acción, mellora de condicións laborais, oportunidades de emprego, etc….


-A calidade e detalle na presentación da acción de mellora.

-A dimensión da PEME: canto máis pequena sexa a empresa, máis se valorará o esforzo da acción desenvolta.


2. Así mesmo, terase en conta o feito de que a empresa candidata teña memoria de sustentabilidade.


3. Os premios convocados poderán quedar desertos no suposto de que as solicitudes non alcancen o obxecto desta orde, cando así o propoña a comisión de valoración.



Novena.-Resolución.

1. A proposta de concesión dos premios emitida pola comisión de valoración elevarase ao conselleiro de Medio Ambiente e Desenvolvemento Sostible, para a súa resolución e publicación no Diario Oficial de Galicia.


2. O prazo máximo de resolución do procedemento será de tres meses. Transcorrido este prazo sen que se ditase resolución expresa, os participantes poderán entender desestimadas as súas solicitudes.


Décima.-Concesión e entrega de premios.

1. Os premios, unha vez resoltos, serán entregados en acto público que se anunciará oportunamente. O nome dos gañadores será publicado e difundido nos medios de comunicación social que se determinen.


2. Os beneficiarios están obrigados a facilitar toda a información que lles sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control do destino das axudas.


Undécima.-Aceptación das bases.

A participación nesta convocatoria supón a total aceptación destas bases.

Décimo segunda.-Autorización para certificacións.

Antes da concesión e pagamento do premio, o órgano xestor da Consellería de Medio Ambiente e Desenvolvemento Sostible deberá comprobar que o beneficiario se atopa ao día no cumprimento das súas obrigas tributarias estatais coa Axencia Estatal Tributaria, coa Seguridade Social e, que non ten pendente de pagamento ningunha outra débeda por ningún concepto, coa Administración pública da comunidade autónoma. Para tal efecto, a presentación da solicitude supón a autorización á consellería para obter tal información.


Décimo terceira.-Aplicación orzamentaria.

No exercicio de 2007, os premios que se concedan con cargo a esta orde financiaranse con cargo á aplicación orzamentaria 15.04.541E-770.1, ata un importe máximo de dez mil euros (10.000€).


Disposición adicional

Única.

1. As axudas a empresas e particulares que se poidan conceder ao abeiro desta orde sométense ao réxime de minimis, polo que cada galardoado non poderá recibir máis de 200.000 euros de axudas sometidas ao antedito réxime, durante calquera período de tres exercicios fiscais.


2. Para tal efecto, os posibles galardoados deberán xuntar, coa súa solicitude, declaración sobre calquera axuda sometida ao devandito réxime de minimis recibida nos dous exercicios fiscais anteriores e durante o exercicio en curso, tal e como figura no anexo II.


3. Na resolución de concesión farase constar o importe do premio, expresado en equivalente bruto de subvención, así como sobre a súa natureza de minimis, segundo o regulamento (CE) 1998/2006, da Comisión, do 15 de decembro.


Disposición derradeira

Única.-Esta orde entrará en vigor o día seguinte ao da súa publicación no Diario Oficial de Galicia.


Santiago de Compostela, 28 de xuño de 2007.

Manuel Vázquez Fernández
Conselleiro de Medio Ambiente e Desenvolvemento Sostible
Ver referencia pdf "14800D010P028.PDF"
Ver referencia pdf "14800D011P033.PDF"




[Páx. Anterior][Sumario D.O.G.][Páx. Seguinte]


© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es