Sumario del Diario Oficial de Galicia

Diario Oficial de Galicia

xoves, 12 de xullo de 2007

III. OUTRAS DISPOSICIÓNS

Número do Dog:

135

Páxina do Dog:

11.971

Data da Disposición:

4 de xullo de 2007

Sección:

III. OUTRAS DISPOSICIÓNS

Organismo:

VICEPRESIDENCIA DA IGUALDADE E DO BENESTAR

Rango:

Orde

Título:

Orde do 4 de xullo de 2007 pola que se convocan axudas á conciliación da vida familiar e laboral como medida de fomento da corresponsabilidade para os traballadores que se acollan á redución da súa xornada de traballo.

A incorporación da muller ao mundo laboral e académico é un feito indubidable que supuxo unha transformación social. A evolución que tivo lugar durante o século XX e principios do XXI deixa patente que cómpre un cambio no contexto social, xa que os roles de xénero asignado póñense en cuestión posto que sufriron unha importante evolución ata o momento actual. Polo tanto son necesarios novos elementos que axuden nesta transformación, proporcionando un desenvolvemento axeitado, coherente e sostible no tempo.

Por este motivo, a Vicepresidencia da Igualdade e do Benestar, consciente de que a responsabilidade é un aspecto que, polo seu impacto social, require abordarse a través de accións concretas a nivel particular e coherentes no seu conxunto, promoveu a elaboración dun Plan de fomento da corresponsabilidade coa vontade de proporcionar respostas ás novas demandas, no ámbito da promoción da corresponsabilidade. Sen dúbida o plan trata de enfocar os esforzos na dirección dunha política de igualdade que incremente a corresponsabilidade das galegas e galegos e impulse a implantación de mecanismos que a fomenten.

É ben sabido que existe, en xeral, unha percepción de que resulta difícil compatibilizar a vida familiar e laboral, sendo ademais concebidas as responsabilidades familiares, na maior parte dos casos como propias das mulleres o cal actúa unha vez máis como factor de desigualdade. Os poderes públicos deben adoptar medidas que favorezan o desfrute de permisos familiares sen que isto afecte negativamente as posibilidades de acceso ao emprego e as condicións de traballo das mulleres promocionando que os homes asuman tamén estas responsabilidades.

Deste xeito, a Vicepresidencia da Igualdade e do Benestar, como unha medida de fomentar a corresponsabilidade e de impulsar así o cambio dos roles diferenciados entre mulleres e homes, implicando a estes últimos na atención e coidado dos seus fillos e fillas, establece unha axuda económica destinada a aqueles traballadores que se acollan a unha redución da súa xornada de traballo motivada pola atención e coidado dos seus fillos e fillas menores de tres anos, comprendendo tamén a situación das familias monoparentais, que neste primeiro ano ten, en certo modo, un carácter experimental.

En consecuencia, a través desta orde establécense as bases reguladoras do procedemento a través de convocatoria pública para a concesión destas axudas, a través da modalidade de pagamento único. As axudas que se establecen no articulado desta orde financiaranse con cargo á aplicación orzamentaria 05.20.312G.480.0, recollida na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007. O importe destinado ás axudas ascenderá como máximo a 400.000 euros.

No Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, modificado pola Lei 14/2004, do 29 de decembro, de medidas tributarias e de réxime administrativo; no Decreto 287/2000, do 21 de novembro, polo que se desenvolve o réxime de axudas e subvencións públicas pola Comunidade Autónoma de Galicia, establécense os réximes para as concesións de axudas e subvencións públicas pola Comunidade Autónoma de Galicia, a cuxa normativa se adaptará a presente orde, tendo en conta en todo caso os principios de publicidade e obxectividade, agás o réxime xeral de concorrencia competitiva establecido no artigo 78.8º do Decreto lexislativo 1/1999, do 7 de outubro. Así mesmo, seralle de aplicación a Lei 38/2003, do 17 de novembro, xeral de subvencións.

Na súa virtude, en uso das facultades que teño atribuídas,

DISPOÑO:

Artigo 1º.-Obxecto.

O obxecto desta orde é a regulación do réxime de concesión de axudas económicas a aqueles traballadores que se acollan á redución da súa xornada de traballo así como a convocatoria destas para o ano 2007.

Artigo 2º.-Actuacións subvencionables.

As axudas, na modalidade de pagamento único, serán concedidas aos traballadores que, a partir do día 1 de xaneiro de 2007, se acollan a unha redución da xornada de traballo de ata un máximo da metade da duración daquela para o coidado dun/dunha fillo/a menor de 3 anos.

Artigo 3º.-Persoas beneficiarias.

Poderán ser beneficiarios das axudas previstas nesta orde:

a) Homes traballadores por conta allea, tanto da empresa privada como das administracións públicas, organismos autónomos, entes públicos de dereito privado e empresas públicas dependentes destas, con independencia de que o seu vínculo sexa laboral, funcionarial ou estatutario e os socios das sociedades cooperativas, que se acollan á redución de xornada á que se alude no artigo 2º desta orde.

b) Familias monoparentais nas que a persoa solicitante, home ou muller, sexa traballadora por conta allea e se acolla á redución de xornada á que se alude no artigo 2º desta orde.

En ningún caso poderán ser beneficiarios os proxenitores privados da patria potestade dos seus fillos/as, ou se a tutela ou garda fose asumida por unha institución pública.

Artigo 4º.-Requisitos.

Para poder acollerse ás axudas previstas na presente orde deberán cumprirse os seguintes requisitos:

a) As persoas que desexen solicitar a axuda económica regulada nesta orde deberán estar inscritas no padrón de calquera municipio dos integrados no territorio da Comunidade Autónoma galega, polo menos cun ano de antelación á presentación da solicitude de subvención.

b) No caso das familias non monoparentais, o outro membro da unidade familiar deberá ser traballadora por conta allea ou ben autónoma.

c) Que na data da solicitude o/a fillo/a conviva coa persoa solicitante.

d) Que o período solicitado non coincida co permiso por maternidade.

Artigo 5º.-Contía das axudas.

A contía desta axuda concederase a través dun pagamento único e estará en función da porcentaxe de redución de xornada laboral que se solicite e da duración desta, que será como máximo de 8 meses. Deste xeito, as contías son as seguintes:

1. Cando a redución de xornada sexa de ata o 33% da xornada laboral e a súa duración sexa polo tempo máximo de 8 meses:

a) 2.400 euros se é a/o primeira/o filla/o.

b) 2.700 euros se é a/o segunda/o filla/o ou se son xemelgas/os.

c) 3.000 euros se é a/o terceira/o filla/o ou se son trillizas/os.

2. Cando a redución de xornada sexa superior ao 33% e ata o 40% da xornada laboral e a súa duración sexa polo tempo máximo de 8 meses:

a) 2.700 euros se é a/o primeira/o filla/o.

b) 3.000 euros se é a/o segunda/o filla/o ou se son xemelgas/os.

c) 3.300 euros se é a/o terceira/o filla/o ou se son trillizas/os.

3. Cando a redución de xornada sexa superior ao 40% e ata o 50% da xornada laboral e a súa duración sexa polo tempo máximo de 8 meses:

a) 3.000 euros se é a/o primeira/o filla/o.

b) 3.300 euros se é a/o segunda/o filla/o ou se son xemelgas/os.

c) 3.600 euros se é a/o terceira/o filla/o ou se son trillizas/os.

As contías citadas nos puntos anteriores son as máximas aplicables aos casos en que a redución de xornada corresponda a unha persoa contratada a xornada completa. Cando a persoa que solicita a redución estivese contratada para unha xornada laboral de duración inferior, as contías das axudas diminuiranse proporcionalmente.

Do mesmo xeito, cando a redución de xornada non se solicite polo período máximo de 8 meses, as contías antes citadas reduciranse proporcionalmente.

Artigo 6º.-Duración das axudas.

A concesión da axuda terá efecto dende o día do inicio do período de redución de xornada.

O tempo máximo polo que se poderá conceder a axuda á redución de xornada para fomento da corresponsabilidade será de 8 meses.

O tempo mínimo de duración da redución de xornada deberá ser de 60 días naturais.

Artigo 7º.-Solicitudes: prazo de presentación, documentación preceptiva e lugar de presentación.

1. As solicitudes de axuda á redución de xornada poderán presentarse dende o día seguinte ao da publicación da presente orde no Diario Oficial de Galicia e ata o 31 de outubro de 2007.

2. As solicitudes de axuda debidamente cubertas deberán achegarse xunto coa seguinte documentación:

a) Solicitude oficial segundo modelo anexo I.

b) Fotocopia do DNI ou NIE.

c) Fotocopia do libro de familia ou certificación literal de nacemento do Rexistro Civil do/a fillo/a menor de tres anos.

d) Copia da sentenza de nulidade, separación ou divorcio e do convenio regulador, se é o caso.

e) Nos supostos de adopción ou tutela, copia do auto xudicial de adopción ou da resolución xudicial de constitución da tutela.

f) No caso de proxenitores solteiros con fillo/a recoñecido polo outro proxenitor pero sen que exista convivencia entre pai e nai, declaración xurada que recolla este extremo (anexo II).

g) Certificación de empadroamento en que se acredite a data de empadroamento da persoa solicitante dentro do territorio da Comunidade Autónoma galega.

h) Fotocopia da folla da libreta de aforros en que conste o número de conta no que desexa percibir o ingreso e na que deberá figurar como titular a persoa solicitante da axuda. No caso de non dispoñer de libreta de aforros, presentarase unha certificación bancaria que indique expresamente que a persoa solicitante é titular da conta a que se refire.

i) Unha declaración do conxunto de todas as axudas solicitadas ou concedidas por este mesmo concepto por calquera Administración pública, ou calquera dos seus organismos autónomos, entes ou sociedades (anexo III).

j) Declaración de que o período de redución solicitado non coincide co permiso por maternidade (anexo III).

k) Certificación da empresa acreditativa da redución de xornada, ou, se é o caso, da Administración pública correspondente (anexo IV).

l) Fotocopia de TA 2/R (variación de datos na Seguridade Social).

m) Certificación de vida laboral emitida pola Tesouraría Xeral da Seguridade Social relativa ao cónxuxe ou parella, no caso das familias non monoparentais.

n) Anexo V relativo a recollida de datos para a análise de resultados.

3. As solicitudes, xunto coa documentación requirida, deberán presentarse no rexistro da Vicepresidencia da Igualdade e do Benestar, mediante instancia normalizada debidamente cuberta, ben directamente ou ben a través de calquera dos medios previstos no artigo 38.4º da Lei 30/1992, de réxime xurídico das administracións públicas e do procedemento administrativo común.

4. Se as solicitudes non están debidamente cubertas ou non se achega a documentación preceptiva relacionada nos anexos, requirirase á persoa solicitante para que, no prazo de 10 días, emende a falta ou achegue os documentos preceptivos, con indicación de que, se así non o fixese, se entenderá que desiste da súa petición, logo da resolución que deberá ser ditada nos termos previstos no artigo 42 da Lei 30/1992, do 26 de novembro, de réxime xurídico das administracións públicas e do procedemento administrativo común.

Artigo 8º.-Xestión, resolución, recursos, prazo para resolver e procedemento de publicidade.

1. O órgano competente para a xestión da axuda á redución de xornada será a Secretaría Xeral da Igualdade da Vicepresidencia da Igualdade e do Benestar.

2. A concesión e, se é o caso, a denegación da axuda por redución de xornada realizarase mediante resolución expresa e individualizada do vicepresidente da Igualdade e do Benestar. Este proceso efectuarase de forma continuada segundo a orde de recepción de solicitudes das axudas.

3. A resolución á que se refire o punto anterior esgota a vía administrativa e contra esta as persoas interesadas poderán interpoñer recurso contencioso-administrativo ante o Tribunal Superior de Xustiza de Galicia, no prazo de dous meses a partir do día seguinte ao da notificación da resolución, de conformidade co disposto na Lei 29/1998, do 13 de xullo, reguladora da xurisdición contencioso-administrativa.

Potestativamente, e con anterioridade á interposición do referido recurso contencioso-administrativo, poderá interpoñerse recurso de reposición ante o órgano que ditou o acto, no prazo dun mes a partir do día seguinte ao da notificación da dita resolución. Neste caso non poderá interpoñerse recurso contencioso-administrativo ata que sexa resolto expresamente ou por desestimación presunta o recurso de reposición.

4. O prazo máximo para resolver e notificar as solicitudes de axudas será de dous meses, transcorrido o cal se entenderá desestimada a petición de subvención se non recae resolución expresa.

5. Para dar cumprimento ao principio de publicidade, e sen prexuízo da notificación expresa e individualizada das resolucións de concesión, mediante resolución da Vicepresidencia da Igualdade e do Benestar publicarase no Diario Oficial de Galicia a relación das persoas beneficiarias das axudas concedidas ao abeiro desta orde, con expresión das contías percibidas.

Artigo 9º.-Forma de pagamento e xustificación da axuda.

1. A contía da axuda concedida será aboada nun pagamento único polo importe que corresponda segundo as contías determinadas no artigo 5º da presente orde, unha vez notificada a resolución de concesión. O pagamento farase unicamente na conta que as persoas solicitantes fagan constar no anexo I.

2. No prazo dun mes desde a data na que remate o período acollido á subvención deberase xustificar o mantemento da situación subvencionada mediante remisión á Secretaría Xeral da Igualdade dunha certificación da empresa ou da Administración pública correspondente, se é o caso, na que se acredite que se permaneceu coa redución de xornada que deu dereito á axuda durante o período solicitado, debendo ser expedida esa certificación con data igual ou posterior á do período que se certifica, e unha certificación de vida laboral emitida pola Tesouraría Xeral da Seguridade Social. Así mesmo poderán requirirse outros documentos que a Vicepresidencia da Igualdade e do Benestar considere necesarios.

3. O incumprimento pola persoa beneficiaria do establecido no artigo 9º.2 dará lugar ao reintegro da axuda percibida.

Artigo 10º.-Modificación da axuda.

1. Se unha vez concedida a axuda, a persoa solicitante que exercita o dereito da redución de xornada amplía o período polo que solicitou a subvención, dentro do límite dos 8 meses establecido no artigo 6º, para que poida acollerse á axuda por un novo período, deberá presentar outra solicitude no prazo de dous meses desde a data na que se producise esta modificación.

2. Se antes do remate do período subvencionado a persoa que está exercitando o dereito á redución de xornada decide renunciar ao exercicio dese dereito deberá comunicalo á Secretaría Xeral da Igualdade debendo achegar una certificación da empresa que acredite os termos exactos nos que se realizou a redución da xornada, en relación coa súa duración e a porcentaxe de redución. A Secretaría Xeral da Igualdade, logo da comprobación da dita documentación procederá a iniciar o expediente de reintegro regulamentado no artigo 15º no suposto de que derivase a devolución de parte da subvención concedida.

3. No suposto de que, durante o período que tivese sido subvencionado, a persoa que se acollerase a unha redución de xornada diminúa ou amplíe a porcentaxe da dita redución, dentro dos límites exixidos nesta orde, entenderase que na data en que se produciu o cambio ten finalizado a actuación subvencionada e comeza un novo período subvencionable, debendo comunicalo a Secretaría Xeral da Igualdade e achegando una certificación da empresa que acredite os termos exactos nos que se realizou a redución da xornada, en relación coa súa duración e a porcentaxe de redución. A Secretaría Xeral da Igualdade, revisada a documentación, procederá a liquidar as axudas anteriormente concedidas mediante unha nova resolución ou a iniciar o correspondente expediente de reintegro regulado no artigo 15º, no suposto de que derivase a devolución de parte da subvención concedida. Para poder acollerse á subvención polo período correspondente á nova redución de xornada deberán presentar outra solicitude, no prazo de dous meses desde a data na que se producise esta modificación.

Artigo 11º.-Obrigas das persoas beneficiarias.

1. As persoas beneficiarias desta axuda quedan obrigadas a someterse ás actuacións de comprobación que deba efectuar a entidade concedente e ás de control financeiro que correspondan á Intervención Xeral da Comunidade Autónoma, así como ás previstas na lexislación do Tribunal de Contas e do Consello de Contas no exercicio das súas funcións de fiscalización e control do destino destas axudas.

2. Así mesmo están obrigadas as persoas beneficiarias desta axuda á comunicarlle ao órgano concedente calquera eventualidade que altere substancialmente o obxecto ou natureza da actividade subvencionable.

Artigo 12º.-Compatibilidades con outras subvencións ou axudas.

A axuda por redución de xornada prevista nesta orde será compatible con calquera outra que, coa mesma finalidade, teñan establecidas ou puidesen establecer calquera das administracións públicas, dos seus organismos autónomos, entes ou sociedades, así como por calquera entidade privada.

Artigo 13º.-Modificación da resolución de concesión.

Toda alteración das condicións tidas en conta para a concesión da axuda, sempre que se entenda cumprido o obxecto desta, dará lugar á modificación da resolución e concesión da axuda, sempre que se cumpran os requisitos mínimos establecidos nesta orde para ser persoa beneficiaria. Para estes efectos a Secretaría Xeral da Igualdade ditará resolución de liquidación, na que se axustarán os importes das axudas concedidas, aplicándose os criterios e límites establecidos para a o seu outorgamento, quedando obrigadas as persoas beneficiarias á devolución dos importes percibidos en exceso. No suposto de que de tal alteración das condicións puidese derivar a devolución da totalidade ou parte da subvención concedida, iniciarase o correspondente expediente de reintegro regulado no artigo 15º.

Artigo 14º.-Recursos económicos.

1. Os recursos económicos destinados ao cumprimento do obxecto da presente orde procederán dos correspondentes créditos orzamentarios establecidos para estes efectos nos orzamentos xerais da Comunidade Autónoma de Galicia. O importe total das axudas a conceder dentro deste exercicio orzamentario non superará a dita consignación orzamentaria ou a que se resulte da súa actualización, no caso de que se aproben modificacións orzamentarias de conformidade coa lexislación vixente.

2. No caso de que neste exercicio económico se esgote o crédito orzamentario consignado para a concesión da axuda por redución de xornada, e para os efectos de dar publicidade a esta circunstancia, pola Vicepresidencia da Igualdade e do Benestar ditarase resolución administrativa na que se sinalará a data na que se produciu o esgotamento do crédito, publicándose no Diario Oficial de Galicia.

Artigo 15º.-Revogación da axuda e procedemento do reintegro.

Procederá o reintegro, total ou parcial, da subvención ou da axuda pública percibida e dos xuros de mora devengados desde o momento do seu pagamento ata a data na que se acorde a procedencia do reintegro nos seguintes casos:

a) Incumprimento da obriga de xustificación ou xustificación insuficiente nos termos establecidos no artigo 30 da Lei 38/2003, do 17 de novembro, xeral de subvencións, e, se é o caso, nas normas reguladoras da subvención.

b) Obtención da subvención sen reunir os requisitos exixidos para a súa concesión con falsificación das condicións requiridas para isto ou ocultación daquelas que o impedisen.

c) Incumprimento total ou parcial do obxectivo, da actividade, do proxecto ou non adopción do comportamento que fundamentou a concesión da subvención.

d) Incumprimento das condicións impostas ás entidades colaboradoras e ás persoas beneficiarias con motivo da concesión da subvención ou da axuda pública, así como dos compromisos por estes asumidos, sempre que afecten ou se refiran ao modo no que deben acadarse os obxectivos, realizar a actividade, executar o proxecto ou adoptar o comportamento que fundamente a concesión da subvención, ou daqueles distintos dos anteriores, cando disto derive a imposibilidade de verificar o emprego dado aos fondos percibidos, o cumprimento do obxectivo, a realidade e a regularidade das actividades subvencionadas.

e) Incumprimento da obriga de adoptar as medidas de difusión contidas no apartado 8º do artigo 78 do texto refundido da Lei de réxime financeiro e orzamentario de Galicia, segundo a redacción dada pola Lei 14/2004, do 29 de decembro, de medidas tributarias e de réxime administrativo.

f) Resistencia, escusa, obstrución ou negativa ás actuacións de comprobación e control financeiro previstas nos números 4º e 6º do artigo 78 do texto refundido da Lei de réxime financeiro e orzamentario de Galicia, segundo a redacción dada pola Lei 14/2004, do 29 de decembro, de medidas tributarias e de réxime administrativo, así como o incumprimento das obrigas contables, rexistrais ou de conservación de documentos, cando disto derive a imposibilidade de verificar o emprego dado aos fondos percibidos, o incumprimento do obxectivo, a realidade e regularidade das actividades subvencionadas ou a concorrencia de subvencións, axudas, ingresos ou recursos para a mesma finalidade procedente de calquera Administración ou ente público ou privado, nacionais, da Unión Europea ou de organismos internacionais.

g) A adopción, en virtude do establecido nos artigos 87 ao 89 do Tratado da Unión Europea, dunha decisión da cal derive unha necesidade de reintegro.

h) Nos demais supostos previstos na normativa reguladora da subvención.

Disposicións adicionais

Primeira.-A concesión destas axudas terá como límite global o crédito consignado no orzamento da Vicepresidencia da Igualdade e do Benestar para este fin.

Segunda.-As persoas beneficiarias atópanse suxeitas ao réxime de infraccións e sancións que en materia de subvencións establece o artigo 79 do texto refundido da Lei de réxime financeiro e orzamentario de Galicia aprobado polo Decreto lexislativo 1/1999, do 7 de outubro, modificado pola Lei 14/2004, do 29 de decembro, de medidas tributarias e de réxime administrativo.

Terceira.-De conformidade co artigo 13.4º da Lei 4/2006, do 30 de xuño, de transparencia e de boas prácticas na Administración pública galega, a Vicepresidencia da Igualdade e do Benestar publicará na súa páxina web oficial a relación das entidades beneficiarias e os importes das axudas concedidas, polo que a presentación da solicitude leva implícita a autorización para o tratamento necesario dos datos das entidades beneficiarias e da súa publicación na citada páxina web.

Cuarta.-De acordo co establecido no Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, a persoa beneficiaria autoriza aá Vicepresidencia da Igualdade e do Benestar a incluír e facer público, nos rexistros regulados neste decreto, os datos relevantes ás axudas e subvencións recibidas así como ás sancións impostas.

Disposicións derradeiras

Primeira.-Esta orde entrará en vigor o día seguinte ao da súa publicación no Diario Oficial de Galicia.

Segunda.-Facúltase a secretaria xeral da Igualdade para ditar cantas disposicións sexan precisas en relación coa presente norma.

Santiago de Compostela, 4 de xullo de 2007.

Anxo Manuel Quintana González
Vicepresidente da Igualdade e do Benestar
Ver referencia pdf "13500D002P007.PDF"
Ver referencia pdf "13500D002P007.PDF"
Ver referencia pdf "13500D002P007.PDF"
Ver referencia pdf "13500D002P007.PDF"
Ver referencia pdf "13500D002P007.PDF"

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es