Sumario del Diario Oficial de Galicia

Diario Oficial de Galicia

mércores, 18 de xullo de 2007

III. OUTRAS DISPOSICIÓNS

Número do Dog:

139

Páxina do Dog:

12.407

Data da Disposición:

16 de xullo de 2007

Sección:

III. OUTRAS DISPOSICIÓNS

Organismo:

CONSELLERÍA DE PRESIDENCIA, ADMINISTRACIÓNS PÚBLICAS E XUSTIZA

Rango:

Resolución

Título:

Resolución do 16 de xullo de 2007, da Secretaría Xeral de Emigración, pola que se establecen subvencións para o desenvolvemento de accións formativas ligadas á inserción laboral destinadas a persoas retornadas e inmigrantes e se procede á súa convocatoria.

A Secretaría Xeral de Emigración é o órgano superior da Administración da Comunidade Autónoma de Galicia ao que lle corresponden, entre outras, as competencias en materia de política inmigratoria e de retorno en Galicia, competencias que asume en virtude do Decreto 231/2005, do 11 de agosto, que establece a citada secretaría xeral como centro directivo dependente funcionalmente da Presidencia, e organicamente da Consellería de Presidencia, Administracións Públicas e Xustiza, e do Decreto 44/2006, do 2 de marzo, de estrutura orgánica dos órganos superiores dependentes da Presidencia da Xunta de Galicia (DOG nº 53, do 16 de marzo de 2006). Así ten atribuídas, entre outras competencias, a ordenación e planificación dos programas de atención dirixidos á integración tanto das persoas inmigrantes como das emigrantes retornadas, así como a xestión das axudas e subvencións destinadas a estes colectivos.

O importante fluxo de retornados e o incremento actual da inmigración en Galicia representan un dos fenómenos socioeconómicos, con perfís específicos, que precisarán de especial atención por parte da comunidade. A promoción de políticas de integración social e laboral constitúe un dos piares básicos dunha política integral de inmigración, na que a cooperación entre as distintas administracións e outras institucións interesadas se converte en elemento clave para acordar obxectivos e desenvolver programas e actuacións coherentes que, doutra banda, poden contribuír positivamente ao desenvolvemento social e económico dunha Galicia moderna, plural, emprendedora, dinámica e creativa.

Nas políticas de inmigración e retorno a inserción laboral é un factor clave de integración social das persoas inmigrantes e retornadas. Neste eido, a formación ligada ao emprego é unha ferramenta especialmente eficaz na procura da adaptación ao mercado de traballo galego e da mellora das condicións de empregabilidade e ocupabilidade das persoas traballadoras migrantes. Neste sentido, na convocatoria do ano 2007 contémplase unha nova orientación dos programas de integración laboral centrada no apoio a proxectos formativos con impacto no mercado de traballo, de xeito que se establecen axudas para o desenvolvemento de accións no eido da formación para o emprego que prevexan obxectivos certos de inserción laboral para as persoas que participan nelas.

As bases reguladoras e a convocatoria das subvencións previstas nesta resolución axústanse ao disposto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, na súa redacción dada pola Lei 14/2004, do 29 de decembro, de medidas tributarias e de réxime administrativo, na Lei 4/2006, do 30 de xuño, de transparencia e boas prácticas, na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, no Decreto 287/2000, do 21 de novembro, polo que se desenvolve o réxime de axudas e subvencións publicas da Comunidade Autónoma de Galicia, así como ao establecido nos preceptos básicos da Lei 38/2003, do 17 de novembro, xeral de subvencións e do seu regulamento de desenvolvemento aprobado polo Real decreto 887/2006, do 21 de xullo.

O financiamento das axudas previstas nesta resolución de convocatoria farase con cargo ao crédito do programa 04.50.312C.481.0 que figura na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007.

Por todo o exposto, e no exercicio das facultades que me confire a disposición adicional segunda do Decreto 44/2006, do 2 de marzo, de estrutura orgánica dos órganos superiores dependentes da Presidencia da Xunta de Galicia,

RESOLVO:
Artigo 1º.-Obxecto e finalidade.
1. O obxecto desta resolución é regular os requisitos e condicións da concesión, en réxime de concorrencia competitiva, de subvencións ás organizacións e entidades sinaladas no artigo seguinte para o desenvolvemento de accións formativas ligadas á inserción laboral, que permitan a mellora da cualificación profesional e faciliten a incorporación ao mercado de traballo das persoas retornadas e inmigrantes en Galicia, e proceder á súa convocatoria para o ano 2007.

2. A xestión destas subvencións realizarase de acordo cos seguintes principios:
a) Publicidade, concorrencia, obxectividade, transparencia, igualdade e non discriminación.

b) Eficacia no cumprimento dos obxectivos fixados pola administración outorgante.

c) Eficiencia na asignación e utilización dos recursos públicos.
Artigo 2º.-Entidades beneficiarias.
1. Poderán acceder á condición de beneficiarias e solicitar as subvencións reguladas nesta resolución as organizacións empresariais, profesionais e sindicais, así como as entidades sen ánimo de lucro que teñan como finalidade instituída por norma estatutaria ou regulamentaria o desenvolvemento de actividades de integración laboral que abarque o colectivo de persoas retornadas e inmigrantes, que cumpran os seguintes requisitos:

a) Estar legalmente constituídas e dotadas de personalidade xurídica propia na data de publicación desta resolución no Diario Oficial de Galicia.

b) Ter o seu enderezo social ou delegación na Comunidade Autónoma de Galicia.
c) Desenvolver actuacións que favorezan a integración laboral das persoas retornadas e inmigrantes na Comunidade Autónoma de Galicia.

d) Dispoñer de experiencia e capacidade suficiente para garantir a realización das accións obxecto de subvención.

e) Non incorrer en ningunha das circunstancias e prohibicións para obter a condición de beneficiario de subvencións enumeradas no artigo 13 da Lei 38/2003, do 17 de novembro, xeral de subvencións.

2. Non poderán ser beneficiarias das subvencións as entidades de dereito público, as universidades, os partidos políticos, as sociedades civís, os colexios profesionais e outras entidades con análogos fins e natureza que as citadas.

Artigo 3º.-Accións subvencionables.
1. Serán subvencionables a través desta convocatoria as accións formativas que teñan unha clara conexión co emprego, desenvolvidas polas organizacións e entidades citadas no artigo 2º, dirixidas, exclusiva ou conxuntamente, a persoas retornadas e inmigrantes, e que consistan na realización de cursos de formación para a mellora da cualificación profesional e da empregabilidade que contemplen obxectivos cuantitativos de inserción laboral en ocupacións relacionadas coa formación impartida.

2. Cando as beneficiarias teñan que recorrer á subcontratación, deberan cumprir as previsións que establece o artigo 29 da Lei 38/2003, do 17 de novembro, xeral de subvencións e o artigo 68 do seu regulamento. Está subcontratación poderá chegar ata o 50% da actividade subvencionada e deberá xustificarse adecuadamente á súa necesidade.

Artigo 4º.-Orzamento, gastos subvencionables e contía da axuda.
1. A concesión das subvencións previstas nesta resolución realizarase con cargo ao crédito orzamentario 04.50.312C.481.0, por un importe total inicial de douscentos mil euros (200.000 €). A citada cantidade poderá incrementarse conforme as disposicións orzamentarias da Secretaría Xeral de Emigración.

2. Poderán subvencionarse con cargo a esta resolución os gastos correntes que se lles orixinen ás entidades beneficiarias ás que se lles conceda a subvención para a realización das accións formativas previstas no artigo 3º e que se realicen ao longo do exercicio 2007, con anterioridade á finalización do prazo de xustificación establecido no artigo 12.6º desta resolución.

3. O importe máximo da subvención será de trinta mil euros (30.000 €) por entidade beneficiaria e, en ningún caso, poderá acadar o 100% do custo total da actividade subvencionada.

A súa contía concreta e certa determinarase en cada caso en función do custo da acción formativa obxecto da subvención e da aplicación dos criterios de valoración previstos no artigo seguinte, tendo en conta o número de entidades beneficiarias e as dispoñibilidades orzamentarias.

Artigo 5º.-Criterios de valoración.
1. Para a determinación das entidades beneficiarias e da contía da subvención que se concederá a cada unha delas, as solicitudes valoraranse tendo en conta os seguintes criterios:

a) Experiencia e implantación da entidade: valorarase a experiencia e especialización da beneficiaria na realización de programas de integración sociolaboral de persoas emigrantes retornadas e inmigrantes, en particular, de accións formativas de mellora da ocupabilidade e, no seu caso, os resultados de inserción laboral de persoas inmigrantes e retornadas acadados no ano 2006. Tamén se terá en conta a súa implantación territorial en Galicia a través de delegacións propias, o seu nivel asociativo no ámbito galego en relación coa súa pertenza a sectores de actividade relacionados coa acción formativa, e no caso de organizacións profesionais e sindicais o seu nivel de representatividade no ámbito da Comunidade Autónoma de Galicia. Ata 10 puntos.

b) Calidade técnica do proxecto formativo: valorarase o contido técnico das accións formativas e o seu axuste aos obxectivos que se pretenden acadar, o programa formativo e a súa metodoloxía, a duración e calendario de realización, a concordancia da especialidade formativa cos perfís máis demandados no mercado de traballo ou que xere máis posibilidades de colocación para os participantes, a previsión dun sistema e indicadores de control e avaliación das actividades, así como a idoneidade dos recursos humanos, dos medios técnicos e materiais con que conta a entidade para o desenvolvemento e impartición da acción formativa. Ata 25 puntos.

c) Ámbito da actuación e destinatarios: valorarase o ámbito territorial e de impacto das accións formativas, o número e perfil dos destinatarios delas, as situacións de vulnerabilidade e de especiais dificultades para a súa integración laboral, así como a incorporación da perspectiva de xénero e de igualdade de trato nas súas actuacións. Ata 25 puntos.

d) Obxectivos cuantitativos de inserción laboral en ocupacións relacionadas coa formación impartida: valorarase o grao e xustificación da previsión de obxectivos presentada, así como a existencia de mecanismos de mediación, instrumentos de colaboración ou compromisos adquiridos en materia de inserción que garantan o cumprimento do obxectivo previsto. Ata 25 puntos.

e) Orzamento e financiamento: valorarase a adecuación do orzamento presentado aos fins e obxectivos das accións formativas, o custo medio por participante, a existencia doutras fontes de financiamento público ou privado, e a porcentaxe da achega de fondos que faga a entidade solicitante para a realización da actividade. Ata 15 puntos.

2. Para poder ser obxecto de subvención deberán acadarse como mínimo 40 puntos, como suma dos puntos obtidos na valoración dos cinco criterios expostos.

Artigo 6º.-Solicitudes e prazo.
1. As solicitudes dirixiranse á Secretaría Xeral de Emigración (rúa dos Basquiños, 2; 15704 Santiago de Compostela) e presentaranse por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

2. O prazo de presentación será de trinta e un días naturais contados desde o día seguinte ao da publicación desta resolución no Diario Oficial de Galicia. No caso de que o último día coincida en sábado ou día inhábil, o prazo de presentación de solicitudes rematará o día hábil seguinte.

Artigo 7º.-Documentación.
1. As solicitudes presentaranse no modelo publicado como anexo I desta resolución. A devandita solicitude, única para as accións formativas que realice unha mesma entidade ao abeiro desta convocatoria, deberá ir acompañada da seguinte documentación orixinal ou copia debidamente compulsada:

a) Acreditación da identidade e representación do solicitante:
a.1. Acreditación da identidade da persoa asinante da solicitude.
a.2. Acreditación da capacidade de representación do asinante da solicitude en relación coa entidade.

b) Estatutos da entidade debidamente legalizados.
c) Acreditación do requisito de inscrición da entidade no rexistro correspondente ou, no seu caso, certificación do depósito dos estatutos e de adquisición de personalidade xurídica expedida pola oficina pública correspondente.

d) Tarxeta de identificación fiscal.
e) Declaración expresa de non estar incursos nas circunstancias previstas no artigo 13 da Lei 38/2003, do 17 de novembro, xeral de subvencións, no modelo de solicitude.

f) Declaración de axudas solicitadas e/ou concedidas para a mesma finalidade, procedentes doutras administracións públicas, Unión Europea ou calquera outro ente público ou privado ou, de ser o caso, unha declaración de que non se solicitaron nin percibiron outras axudas ou subvencións segundo modelo recollido no anexo III.

g) Ficha de solicitude de transferencia bancaria segundo o modelo do anexo IV.
h) Memoria da entidade xustificativa da súa implantación, experiencia e especialización, debidamente asinada e coa estrutura e contido mínimo que se recolle no modelo anexo V.

i) Memoria explicativa do proxecto formativo para o que se solicita subvención, con indicación do orzamento desagregado de gastos e fontes de financiamento e con expresión dos fondos achegados pola entidade, debidamente asinada e de acordo coa estrutura e contido mínimo que se recolle no modelo anexo VI, acompañada, no seu caso, dos documentos xustificativos da previsión de obxectivos de inserción laboral presentada para os efectos do sinalado no apartado d) do artigo 5º.

2. Mediante a presentación da solicitude a entidade interesada presta o seu consentimento para incluír e facer públicos, no rexistro público de axudas, subvencións e convenios e no rexistro público de sancións, creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, os datos relevantes referidos ás axudas e subvencións recibidas, así como ás sancións impostas.

Os datos referidos integrarán un ficheiro do que será responsable a Consellería de Economía e Facenda, ante quen se poderán exercitar os dereitos de acceso, rectificación, cancelación e oposición.

Salvo nos casos sinalados no artigo 9.4º do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, a non autorización da obtención de datos ou a súa publicidade poderá dar lugar á exclusión do proceso de participación para obter a axuda ou subvención ou, se procede, ao reintegro do importe concedido.

De conformidade co artigo 13.4º da Lei 4/2006, do 30 de xuño, de transparencia e de boas prácticas na Administración pública galega, a Secretaría Xeral de Emigración publicará, na súa páxina web: www.galiciaaberta.com, a relación dos beneficiarios e o importe das axudas concedidas, polo que, a presentación da solicitude leva implícita a autorización para o tratamento necesario dos datos das beneficiarias e da súa publicación na citada páxina web.

3. Se a solicitude non estivese debidamente cuberta ou non se achegase a documentación exixida, a Secretaría Xeral de Emigración requirirá o interesado para que, no prazo máximo de dez días hábiles, emende a falta ou achegue os documentos preceptivos con indicación de que, se así non o fixese, se terá por desistido da súa petición de conformidade co disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, logo da resolución ditada nos termos previstos no artigo 42 da Lei 30/1992.

Artigo 8º.-Procedemento de concesión da subvención.
1. O procedemento para a tramitación e concesión das axudas que se convocan con esta resolución axustarase ao previsto no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, e na Lei 30/1992, do 26 de novembro, de réxime xurídico das administracións públicas e do procedemento administrativo común. As solicitudes someteranse a un réxime de concorrencia competitiva tal como recolle a devandita Lei de réxime financeiro e orzamentario de Galicia no seu artigo 78º.

2. Correspóndelle á Secretaría Xeral de Emigración a realización das tarefas de xestión desta convocatoria, sempre de acordo coa existencia de dispoñibilidades orzamentarias. Para isto crearase unha comisión de avaliación, que ademais será órgano instrutor, presidida polo subdirector xeral de Planificación das Políticas do Retorno e da Inmigración ou persoa na que delegue e composta, ademais, polo xefe de servizo de Planificación e Formación e por un funcionario da Secretaría Xeral de Emigración, que actuará como secretario.

3. Os expedientes serán avaliados pola comisión segundo os criterios establecidos no artigo 5º. Posteriormente a comisión formulará unha proposta de concesión, a través da Subdirección Xeral de Planificación das Políticas do Retorno e da Inmigración, que se presentará ao órgano competente para a súa resolución.

4. O órgano competente para resolver as solicitudes de subvencións presentadas ao abeiro desta resolución será o secretario xeral de Emigración.

Artigo 9º.-Resolución.
1. As resolucións serán ditadas polo secretario xeral de Emigración e notificadas aos interesados. Pola súa vez, a Secretaría Xeral de Emigración publicará no Diario Oficial de Galicia as subvencións concedidas ao abeiro desta convocatoria, indicando o programa e crédito orzamentario ao que se imputa o gasto, así como os beneficiarios, cantidades concedidas e finalidade da subvención. Ademais, publicará na súa páxina web: www.galiciaaberta.com a relación das beneficiarias e o importe das axudas concedidas.

2. O prazo máximo para resolver e notificar será de catro meses, que comezarán a contar desde a data de publicación desta resolución no Diario Oficial de Galicia. Transcorrido o dito prazo sen que se ditase e notificase a resolución expresa poderá entenderse desestimada a solicitude, de acordo co establecido nos artigos 1 e 2 da Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común.

3. As resolucións que se diten neste procedemento esgotan a vía administrativa, e contra elas cabe interpoñer potestativamente recurso de reposición ante o mesmo órgano que as ditou, no prazo dun mes contado a partir do día seguinte ao da recepción da correspondente notificación, no caso de resolucións expresas, ou no prazo de tres meses contados a partir do día seguinte a aquel en que se entenda producido o acto presunto, no caso de resolucións desestimadas por silencio administrativo, de acordo co disposto na Lei 30/1992, do 26 de novembro, de réxime xurídico das administracións públicas e do procedemento administrativo común.

Así mesmo, poderá interpoñerse recurso contencioso-administrativo ante o Tribunal Superior de Xustiza de Galicia no prazo de dous meses contados a partir do día seguinte ao da recepción da correspondente notificación, no caso de resolucións expresas, ou no prazo de seis meses contados a partir do día seguinte a aquel en que se entenda producido o acto presunto, no caso de resolucións desestimadas por silencio administrativo, de acordo co establecido na Lei 29/1998, do 13 de xullo, da xurisdición contencioso-administrativa.

Artigo 10º.-Aceptación da subvención.
No suposto de que entidade non acepte a subvención concedida, deberá comunicarllo á Secretaría Xeral de Emigración no prazo máximo de 10 días contados a partir da notificación da resolución, expresando as circunstancias que determinan a súa decisión.

Artigo 11º.-Obrigas das entidades subvencionadas.
Son obrigas das entidades beneficiarias destas subvencións:
a) Realizar o programa ou proxecto que fundamenta a concesión da subvención.
b) Acreditar ante a entidade concedente a realización da actividade e o cumprimento dos requisitos e das condicións que determinen a concesión da axuda ou subvención.

c) Facer constar, en todo tipo de publicidade e información, a condición de actividade subvencionada pola Secretaría Xeral de Emigración, así como o seu correspondente logotipo.

d) Someterse ás actuacións de comprobación que a Secretaría Xeral de Emigración considere necesarias para o axeitado seguimento da actividade e ás de control financeiro que corresponden á Intervención Xeral da Comunidade Autónoma, ao Tribunal de Contas e ao Consello de Contas de Galicia segundo a lexislación vixente na materia, facilitando o seu labor de fiscalización e control.

e) As entidades beneficiarias de axudas deberán informar, inmediatamente, á Subdirección Xeral de Planificación das Políticas de Retorno e da Inmigración sobre calquera eventualidade que altere ou dificulte o desenvolvemento da actividade subvencionada.

Os beneficiarios quedan obrigados a facilitarlle á Secretaría Xeral de Emigración o exame das actividades tanto na súa execución como con posterioridade ao seu remate, así como toda aquela información que lles sexa requirida, para o que garantirá o acceso dos representantes da secretaría xeral ao lugar das accións, ás contas e demais documentación que se estime oportuna.

No caso de existir variacións respecto do programa presentado coa solicitude de subvención as entidades con catro días de antelación, como mínimo, ao de comenzo da acción formativa, deberán comunicar: a data definitiva de inicio e remate das actividades formativas; o enderezo e horario de realización, a relación nominal dos docentes e o número de alumnos inscritos.

Artigo 12º.-Forma de xustificación e pagamento das subvencións.
1. As entidades subvencionadas quedan obrigadas a xustificar os gastos correspondentes ao custo total das actividades formativas.

2. Poderán xustificarse con cargo á subvención recibida os gastos que se realicen desde o 1 de xaneiro de 2007 e antes da finalización do prazo de xustificación recollido no apartado 6 deste artigo e que estean de acordo coas actividades e accións reflectidas na memoria e na documentación presentada.

3. Poderán realizarse pagamentos parciais, logo da xustificación, por conta da liquidación definitiva, de ata o máximo do 80% do importe da subvención concedida.

Para a xustificación parcial as entidades deberán presentar a seguinte documentación:

a) Certificación do secretario da entidade beneficiaria, co visto e prace do seu presidente, na cal conste a denominación das actividades realizadas, contía do gasto, así como a imputación para os fins para os que se concedeu a subvención.

b) Relación numerada de facturas segundo o modelo recollido no anexo VII, acompañada da factura ou facturas acreditativas dos gastos e demais documentos de valor probatorio equivalente con validez no tráfico xurídico-mercantil ou con eficacia administrativa.

Estes documentos deberán presentarse ben en documento orixinal ou ben en fotocopia debidamente compulsada.

En cada xustificación o representante da entidade deberá achegar un escrito onde mencione os documentos presentados ante o órgano xestor e onde indique a xustificación parcial ou final á que estes corresponden.

4. A xustificación final da subvención deberá ir acompañada, ademais do establecido no punto anterior, da seguinte documentación debidamente asinada polo representante da entidade:

a) Memoria técnica xustificativa da aplicación da subvención concedida e explicativa da execución das accións formativa subvencionadas, asinada polo representante da entidade, cunha descrición detallada das actuacións desenvolvidas, metodoloxía e instrumentos utilizados, período de execución e ámbito territorial da actuación, colectivo destinatario final das accións, resultados acadados e valoración do grao de consecución dos obxectivos previstos, así como as conclusións que se estime oportuno realizar. A memoria deberá presentarse seguindo a estrutura e contido mínimo que se recolle no anexo V.

b) Memoria económica con indicación do custo das actividades subvencionados, e estado de liquidación do programa, desagregado por conceptos de gasto, con indicación das fontes de financiamento, e con expresión do importe e porcentaxe da achega de fondos que aporte a entidade, que, en ningún caso, poderá ser inferior á tida en conta para a concesión da subvención en atención á sinalada na solicitude de axuda.

c) Relación nominal dos participantes en cada unha das accións formativas, con indicación da condición de persoa retornada ou inmigrante, e na que se reflicte, cando menos, os seguintes datos: idade, sexo, nacionalidade e, no caso de retornados, país da emigración. E na que se recollan, de ser o caso, os datos referentes á súa inserción laboral, en concreto, data efectiva ou prevista, posto de traballo ou ocupación, e sector onde vai desenvolvela.

d) Declaración complementaria e actualizada do conxunto das subvencións solicitadas para a mesma actividade, tanto as aprobadas e concedidas como as pendentes de resolución, das distintas administracións públicas competentes ou de calquera dos seus organismos, entes ou sociedades, ou, de ser o caso, unha declaración de que non se solicitaron nin percibiron outras axudas ou subvencións (segundo o modelo correspondente publicado como anexo II).

5. De conformidade co establecido no artigo 41.1º.f) da Lei 14/2006, do 28 de decembro, de orzamentos xerais da Comunidade Autónoma de Galicia para 2007, as institucións sen fins de lucro quedan exentas de acreditar que se atopan ao día das súas obrigas tributarias estatais e autonómicas e da Seguridade Social, e que non teñen pendente de pagamento ningunha outra débeda, por ningún concepto, coa Administración da comunidade autónoma.

6. O prazo de xustificación e entrega da totalidade da documentación será ata o 1 de decembro de 2007.

7. A Secretaría Xeral de Emigración poderá solicitar, en todo momento, calquera outra documentación que considere necesaria para a correcta xustificación da execución das actividades.

8. O importe da subvención concedida será transferido á conta bancaria da que sexa titular a entidade beneficiaria e así se acredite mediante ficha de transferencia bancaria segundo o modelo establecido no correspondente anexo desta resolución.

Artigo 13º.-Compatibilidade das axudas.
As axudas concedidas en virtude desta resolución serán compatibles con outras, calquera que sexa a súa natureza, administración ou entidade que as conceda, sempre que a suma de todas elas non supere o custo total da actividade subvencionable. Para a determinación do cumprimento deste requisito, o beneficiario da axuda deberá informar no momento da solicitude e ao longo do ano 2007 de todas as axudas e subvencións que para o mesmo fin perciba de calquera entidade pública ou privada.

Artigo 14º.-Modificación da resolución de concesión.
As entidades beneficiarias das axudas quedan obrigadas a comunicarlle á Secretaría Xeral de Emigración, no momento en que se produza, calquera alteración dos requisitos exixidos na convocatoria ou de circunstancias sobrevidas que impidan ou dificulten a execución das actividades, e poderá a Secretaría Xeral adoptar a resolución de modificación da concesión que corresponda de acordo co disposto no artigo 78º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia.

Artigo 15º.-Reintegro.
De conformidade co disposto no artigo 78.10º do Decreto lexislativo 1/1999, do 7 de outubro, non se poderá exixir o pagamento da subvención concedida e procederá o reintegro total ou parcial da subvención e dos xuros de demora rendidos desde o momento do seu pagamento ata a data en que se acorde a procedencia do reintegro, nos seguintes casos:

a) Incumprimento da obriga de xustificación.
b) Obtención da subvención sen reunir os requisitos exixidos para a súa concesión.

c) Incumprimento da finalidade para a que foi concedida a subvención.
d) Incumprimento das condicións impostas ao beneficiario pola concesión da axuda.

e) Incumprimento da obriga de xustificación na forma e prazos establecidos na resolución de concesión.

f) Modificación substancial das actividades subvencionadas sen autorización expresa do órgano competente.

g) Exceso do percibido sobre o custo da actividade desenvolvida.
h) Nos demais supostos previstos no citado artigo 78.10º do Decreto lexislativo 1/1999, do 7 de outubro.

Artigo 16º.-Instrucións e aclaracións.
A Secretaría Xeral de Emigración poderá ditar as instrucións e aclaracións necesarias para o cumprimento e desenvolvemento desta resolución.

Artigo 17º.-Recursos.
Contra esta resolución cabe interpoñer potestativamente recurso de reposición ante o mesmo órgano que a ditou, no prazo dun mes contado a partir do día seguinte ao da súa publicación no Diario Oficial de Galicia.

Así mesmo, poderá interpoñerse recurso contencioso-administrativo ante o Tribunal Superior de Xustiza de Galicia no prazo de dous meses contados a partir do día seguinte ao da súa publicación no Diario Oficial de Galicia, de acordo co establecido na Lei 29/1998, do 13 de xullo, da xurisdición contencioso-administrativa.

Santiago de Compostela, 16 de xullo de 2007.
Manuel Luis Rodríguez González
Secretario xeral de Emigración
Ver referencia pdf "13900D002P011.PDF"
Ver referencia pdf "13900D002P011.PDF"
Ver referencia pdf "13900D002P011.PDF"
ANEXO II
ANEXO III
Ver referencia pdf "13900D002P011.PDF"
Ver referencia pdf "13900D002P011.PDF"
ANEXO IV
ANEXO V
Ver referencia pdf "13900D002P011.PDF"
Ver referencia pdf "13900D002P011.PDF"

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es