Sumario del Diario Oficial de Galicia

Diario Oficial de Galicia

luns, 18 de xuño de 2007

III. OUTRAS DISPOSICIÓNS

Número do Dog:

116

Páxina do Dog:

10.404

Data da Disposición:

12 de xuño de 2007

Sección:

III. OUTRAS DISPOSICIÓNS

Organismo:

CONSELLERÍA DE VIVENDA E SOLO

Rango:

Orde

Título:

Orde do 12 de xuño de 2007 pola que se convocan subvencións a fondo perdido para a rehabilitación e renovación de calidade de vivendas no medio rural e conxuntos históricos de Galicia.

Orde do 12 de xuño de 2007 pola que se convocan subvencións a fondo perdido para a rehabilitación e renovación de calidade de vivendas no medio rural e conxuntos históricos de Galicia.

O Decreto 157/2006, do 7 de setembro, establece os requisitos, procedementos e incentivos para unha rehabilitación e renovación de calidade das vivendas e edificios, tanto no medio rural como nos conxuntos históricos de Galicia. No citado decreto establécese ademais que as subvencións recollidas nel se regularán por ordes anuais de convocatoria.

A disposición derradeira primeira do citado Decreto 157/2006, do 7 de setembro, outórgalle á conselleira de Vivenda e Solo, no marco das súas competencias, a potestade de ditar as disposicións necesarias para o desenvolvemento e a súa aplicación.

A Orde do 13 de decembro de 2006 regula o procedemento de obtención, as actuacións previstas, os requisitos exixidos e canto for necesario para a obtención da cédula de rehabilitación de calidade, que constitúe un requisito necesario da vivenda para ser beneficiaria das subvencións en materia de rehabilitación e renovación.

Esta orde aproba as bases reguladoras das subvencións, con vixencia indefinida, convoca as subvencións para o exercicio económico 2007, detalla o procedemento, establece o prazo de presentación de solicitudes de subvencións, indica o seu importe máximo e a partida orzamentaria en que figuran os créditos que amparan esta orde.

En virtude do exposto anteriormente e en uso das facultades que teño atribuídas pola Lei 1/1983, do 22 de febreiro, de normas reguladoras da Xunta e da súa presidencia, modificada pola Lei 11/1988, e desenvolvida polo Decreto 211/2005, do 3 de agosto, e o Decreto 505/2005, do 22 de setembro,

DISPOÑO:
Artigo 1º.-Obxecto.
Esta orde ten por obxecto aprobar as bases reguladoras, que terán vixencia indefinida, e abrir a convocatoria no exercicio económico de 2007, nun procedemento de concorrencia non competitiva, das subvencións a fondo perdido para as persoas promotoras de actuacións de rehabilitación e renovación de calidade de vivendas no medio rural e conxuntos históricos de Galicia, de acordo co establecido no artigo 4 do Decreto 157/2006, do 7 de setembro, publicado no DOG nº 181, do 19 de setembro.

Artigo 2º.-Actuacións.
Serán subvencionables aquelas actuacións de rehabilitación ou renovación de vivendas unifamiliares rurais e edificios ou vivendas en núcleos históricos reguladas no artigo 5 da Orde do 13 de decembro de 2006 e que figuran na resolución de concesión da cédula de rehabilitación de calidade.

Artigo 3º.-Requisitos das vivendas.
De acordo co establecido no artigo 6 do Decreto 157/2006, do 7 de setembro, as vivendas e locais deberán estar en posesión da cédula de rehabilitación de calidade concedida durante os dous anos inmediatamente anteriores ao momento de presentación da solicitude da subvención.

No caso de non estar en posesión da cédula de rehabilitación de calidade, deberá presentar a solicitude para a súa concesión ao abeiro da Orde do 13 de decembro de 2006, publicada no DOG do 22 de decembro de 2006, e unha vez concedida poderá optar a estas axudas.

Artigo 4º.-Persoas beneficiarias.
De acordo co artigo 5 do Decreto 157/2006, do 7 de setembro, poderán solicitar as subvencións convocadas por esta orde as persoas promotoras das seguintes actuacións:

1. En ámbito rural:
As persoas físicas que sexan propietarias, usufrutuarias, inquilinas ou que, conforme a lexislación aplicable, poidan realizar as obras para unha vivenda unifamiliar rural segundo o ámbito definido no artigo 2.1º do Decreto 157/2006, do 7 de setembro, promotoras da rehabilitación ou renovación para uso propio ou para alugamento das vivendas situadas no ámbito rural, que obteñan uns ingresos familiares ponderados que non excedan 3,5 veces o indicador público de renda de efectos múltiples.

As persoas promotoras das actuacións de rehabilitación para uso propio deberán acreditar a súa residencia nos últimos cinco anos dentro do termo municipal onde está situada a vivenda que se vai rehabilitar.

Á poboación galega residente no exterior da comunidade autónoma non se lle exixirá o requisito de residencia e poderá optar ás subvencións sempre que cumpra os demais requisitos. A quen retornase nos últimos cinco anos exixiráselle o requisito de residencia unicamente desde o seu retorno.

As persoas físicas que residan, sen pagaren renda ningunha, en vivendas propiedade de institucións privadas sen fins de lucro, poderanse acoller ás subvencións achegando o documento de autorización da institución correspondente. Tanto a vivenda obxecto de rehabilitación como a persoa solicitante das subvencións deberán reunir os demais requisitos exixidos no Decreto 157/2006, do 7 de setembro.

2. En conxuntos ou núcleos históricos:
Poderán ser beneficiarias das subvencións as persoas físicas ou xurídicas, que sexan as propietarias, usufrutuarias, inquilinas, ou quen, conforme a lexislación aplicable, poida realizar as obras obxecto desta convocatoria, das vivendas e locais situados no ámbito previsto no artigo 2.2º do Decreto 157/2006, do 7 de setembro, e que pretendan a súa rehabilitación ou renovación para uso propio ou para destinalas a alugamento.

Artigo 5º.-Ingresos familiares.
Para os efectos do disposto no artigo anterior, en relación coas subvencións para vivenda unifamiliar rural, enténdese:

1. Por ingresos familiares a contía, expresada en número de veces o IPREM, no seu cómputo anual, incluíndo dúas pagas extras, da parte xeral e especial da renda reguladas nos artigos 39, 40 e 51, respectivamente, do texto refundido do imposto sobre a renda das persoas físicas, aprobado polo Real decreto lexislativo 3/2004, do 5 de marzo, correspondente á declaración ou declaracións presentadas por cada un dos membros da unidade familiar relativa ao período impositivo inmediatamente anterior, con prazo de presentación vencido, á solicitude da subvención.

Estes ingresos acreditaranse mediante a documentación que figura no artigo 7.2º e) desta disposición.

2. Por ingresos familiares ponderados, os resultantes de lles aplicar aos ingresos familiares o seguinte coeficiente multiplicador de ponderación en función do número de membros da unidade familiar:

Familias de 1 membro: 1.
Familias de 2 membros: 0,95.
Familias de 3-4 membros: 0,90.
Familias de 5-6 membros: 0,85.
Familias de máis de 6 membros: 0,80.
3. Por unidade familiar, tal e como resulta definida polas normas reguladoras do imposto sobre a renda das persoas físicas.

As referencias á unidade familiar, para efectos de ingresos, fanse extensivas ás persoas que non estean integradas en ningunha unidade familiar.

4. No caso dos galegos e galegas residentes no estranxeiro, os ingresos na moeda propia do país en que se obteñan calcularanse en función do seu contravalor en euros, aplicando o primeiro cambio oficial fixado para o comprador no mercado de divisas no ano seguinte ao que se refiran os ingresos.

Artigo 6º.-Importes máximos das subvencións.
En relación coas porcentaxes dos orzamentos executados que figuren na cédula de rehabilitación de calidade, establecidas no artigo 7 do Decreto 157/2006, do 7 de setembro, as subvencións non poderán superar as seguintes cantidades máximas:

1. Nos casos de rehabilitación en ámbito rural ou en conxuntos históricos, o 40% sen superar a cantidade de 7.000 euros.

2. Nos casos de renovación en ámbito rural ou en conxuntos históricos, o 40% sen superar a cantidade de 10.000 euros.

3. Nos casos de actuacións de rehabilitación cando a vivenda sexa unifamiliar en ámbito rural e estea nun conxunto ou núcleo histórico, o 50% sen superar a cantidade de 8.000 euros.

4. Nos casos de actuacións de renovación cando a vivenda sexa unifamiliar en ámbito rural e estea nun conxunto ou núcleo histórico, o 50% sen superar a cantidade de 12.000 euros.

Artigo 7º.-Solicitudes.
1. As solicitudes para estas axudas presentaranse nas delegacións provinciais da Consellería de Vivenda e Solo que correspondan por razón da situación da vivenda, ou en calquera das formas previstas na Lei 30/1992, de réxime xurídico das administracións públicas e do procedemento administrativo común, axustándose aos modelos que figuran no anexo desta orde.

2. Os documentos que se deben achegar á solicitude son os seguintes:
a) Fotocopia compulsada do DNI ou do NIF do solicitante.
b) Resolución de concesión da cédula de rehabilitación de calidade.
c) Declaración do conxunto de todas as subvencións solicitadas ou concedidas, para as actuacións obxecto desta solicitude, das administracións públicas ou doutros entes públicos.

d) Certificado da titularidade da conta bancaria.
e) Nas solicitudes para vivenda unifamiliar no ámbito rural:
-Autorización á Consellería de Vivenda e Solo para solicitar por vía telemática as acreditacións relativas a ingresos e débedas, ou fotocopia compulsada da declaración do imposto sobre a renda das persoas físicas, correspondente ao exercicio inmediatamente anterior á data de solicitude, e certificado das rendas expedido nos termos do Real decreto 3/2004, do 5 de marzo, pola Axencia Estatal Tributaria, correspondentes ao conxunto dos membros da unidade familiar.

-No caso de non estar obrigado a presentar a declaración do IRPF:
Se ten presentado o modelo de solicitude de devolución 104-105, copia da notificación-liquidación emitida pola Axencia Estatal da Administración Tributaria.

Para os que non presentasen o citado modelo de devolución, declaración responsable de todos os ingresos obtidos, xuntando, ademais, os seguintes documentos: declaración das circunstancias familiares, certificado de retribucións e retencións da empresa ou empresas nas que estivese de alta no devandito exercicio e, se é o caso, certificado de pensións, ou prestacións periódicas, certificado do Inem, e certificados das entidades bancarias de rendementos do capital mobiliario.

-No suposto dos emigrantes, a xustificación dos ingresos familiares efectuarase mediante copia da declaración do imposto sobre a renda das persoas físicas presentada en España, ou da similar presentada no país onde presten os seus servizos, autenticada, se é o caso, pola agregadoría laboral correspondente ou delegación consular de España.

-Acreditación da composición da unidade familiar e número de perceptores de ingresos, mediante copia cotexada da declaración do IRPF ou, no caso de non estar obrigado a presentala, declaración responsable, e copia cotexada do libro de familia.

f) Nas solicitudes para vivenda unifamiliar para uso propio en ámbito rural, acreditación da súa residencia nos últimos cinco anos dentro do termo municipal onde estea situada a vivenda rehabililitada, mediante o certificado municipal de empadroamento.

3. Deberán, así mesmo, acreditar que se atopan ao día das súas obrigas tributarias estatais e autonómicas e da Seguridade Social e que non teñen pendente ningunha outra débeda, por ningún concepto, coa Administración pública da comunidade autónoma. Consonte o establecido no artigo 43 da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, a solicitude de subvencións comportará a autorización para que a Consellería de Vivenda e Solo obteña de forma directa a acreditación do cumprimento das súas obrigas tributarias co Estado, a Comunidade Autónoma e coa Seguridade Social, a través de certificados telemáticos.

4. As citadas solicitudes deberán conter os datos da persoa solicitante adicional, entendendo por tal aquela persoa que sexa cotitular sobre os dereitos de propiedade, usufruto ou arrendamento, sen asignación concreta de cotas, como pode ser o caso de sociedades de gananciais ou comunidades de herdeiros nas que concorran as citadas circunstancias.

Artigo 8º.-Galegos residentes no exterior.
As solicitudes asinadas polos galegos residentes no exterior da comunidade autónoma poderán presentarse nas entidades galegas dos lugares de residencia que teñan recoñecida a galeguidade ou estean consideradas como colaboradoras, as cales deberán remitilas, en todo caso, á Secretaría Xeral de Emigración.

Esta secretaría xeral remitirá as solicitudes á Delegación Provincial da Consellería de Vivenda e Solo que corresponda en función da localización da vivenda.

Será preceptivo o informe da Secretaría Xeral de Emigración para toda solicitude presentada polos galegos e galegas residentes no exterior.

Artigo 9º.-Prazo de presentación de solicitudes.
O prazo de presentación de solicitudes será de tres meses desde o día seguinte ao da publicación da presente orde.

Artigo 10º.-Procedemento de concesión das subvencións
1. Á vista da solicitude das subvencións e da documentación presentada, e logo das comprobacións e inspeccións que se consideren oportunas, o/a delegado/a provincial da Consellería de Vivenda e Solo elevaralle a proposta de concesión e pagamento da subvención, no caso de cumprir os requisitos exixidos, ou de denegación motivada da subvención, no caso de non os cumprir, á persoa titular da Consellería de Vivenda e Solo, quen, á vista dela e tendo en conta os recursos económicos dispoñibles, resolverá o que segundo dereito proceda.

Serán obxecto de denegación as propostas de concesión que queden sen asignación de recursos por esgotamento dos previstos na orde de convocatoria.

O criterio que, de ser o caso, se utilizará para os efectos de determinar respecto a que expedientes se esgota o crédito é o recollido no artigo 74.2º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contra as ditas resolucións, que poñen fin á vía administrativa, poderá presentarse recurso potestativo de reposición ante a conselleira de Vivenda e Solo, no prazo dun mes contado a partir do día seguinte ao da súa notificación, de conformidade co previsto no artigo 117 da Lei 30/1992, de réxime xurídico das administracións públicas e do procedemento administrativo común, ou ben poderá recorrerse directamente ante o órgano xurisdicional competente no prazo de dous meses, consonte o establecido no artigo 46 da Lei 29/1998, reguladora da xurisdición contencioso-administrativa.

Artigo 11º.-Prazo de resolución.
De acordo co artigo 42.2º da Lei 30/1992, de réxime xurídico das administracións públicas e do procedemento administrativo común, o prazo para resolver fíxase en tres meses, contados desde a data de entrada da solicitude no rexistro correspondente. Vencido o prazo máximo establecido sen que se ditase e notificase a resolución, os interesados poderán entender desestimadas as súas pretensións por silencio administrativo.

Artigo 12º.-Rexistro de axudas e subvencións e publicidade.
1. De acordo co establecido na disposición adicional do Decreto 132/2006, do 27 de xullo, de creación dos rexistros de axudas, subvencións e convenios e de sancións da Xunta de Galicia, a persoa solicitante da subvención consentirá expresamente a inclusión e publicidade dos datos relevantes referidos ás axudas e subvencións recibidas no devandito rexistro, así como as sancións impostas, de ser o caso.

2. De conformidade co artigo 13.4º a Lei 4/2006, do 30 de xuño, de transparencia e de boas prácticas na Administración pública galega, esta consellería publicará na súa páxina web oficial a relación dos beneficiarios e o importe das axudas concedidas, polo que a presentación da solicitude leva implícita a autorización para o tratamento necesario dos datos dos beneficiarios e da súa publicación na citada páxina web.

Artigo 13º.-Facultade de inspección.
1. Desde o momento da presentación da solicitude poderanse realizar todas as inspeccións ou comprobacións que se consideren oportunas para verificar a exactitude dos datos achegados, ou o destino da subvención concedida.

2. As persoas beneficiarias están obrigadas a facilitar toda a información que lles sexa requirida pola Intervención Xeral da Comunidade Autónoma, o Tribunal de Contas ou o Consello de Contas, no exercicio das súas funcións de fiscalización e control do destino das axudas.

Artigo 14º.-Reintegro e modificación da subvención.
1. O incumprimento das condicións establecidas para a concesión da subvención suporá, ademais das sancións que puideran corresponder, a obriga do reintegro por parte do beneficiario dos recursos achegados pola Consellería de Vivenda e Solo, incrementados co xuro legal correspondente desde o seu aboamento.

2. Toda alteración das condicións tidas en conta para a concesión da subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión das axudas.

Artigo 15º.-Importe máximo e dotación orzamentaria.
Para os efectos do determinado no artigo 4 do Decreto 157/2006, do 7 de setembro, o importe máximo das subvencións para vivenda unifamiliar en ámbito rural será de 835.742 euros, e instrumentaranse financeiramente a través do crédito que figura consignado na aplicación 17.02.451A.780.0 do vixente orzamento de gastos da Consellería de Vivenda e Solo.

O importe máximo das subvencións en conxuntos históricos, para familias e institucións sen fin de lucro, será de 1.000.000 de euros, na aplicación 17.02.451A.780.2 e para empresas privadas será de 150.000 euros na aplicación 17.02.451A.770.0.

Disposición derradeira
Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 12 de xuño de 2007.
Teresa Táboas Veleiro
Conselleira de Vivenda e Solo
Advertidos erros na devandita resolución, publicada no Diario Oficial de Galicia número 98, do mércores 23 de maio de 2007, cómpre facer a oportuna corrección:

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es