Sumario del Diario Oficial de Galicia

Diario Oficial de Galicia

mércores, 6 de xuño de 2007

III. OUTRAS DISPOSICIÓNS

Número do Dog:

108

Páxina do Dog:

9.609

Data da Disposición:

31 de maio de 2007

Sección:

III. OUTRAS DISPOSICIÓNS

Organismo:

CONSELLERÍA DE TRABALLO

Rango:

Orde

Título:

Orde do 31 de maio de 2007 pola que se establecen as bases reguladoras dos programas para o fomento da estabilidade no emprego, cofinanciados polo Fondo Social Europeo, e se procede á súa convocatoria para o ano 2007.

Mediante o Decreto 289/1997, do 9 de outubro, esta comunidade autónoma asumiu as funcións e servizos transferidos pola Administración do Estado relativos á xestión realizada polo Instituto Nacional de Emprego no ámbito do traballo, do emprego e da formación e, a través dos decretos 211/2005, do 11 de agosto, polo que se fixa a estrutura orgánica dos departamentos da Xunta de Galicia, e mais o Decreto 536/2005, do 6 de outubro, polo que se establece a súa estrutura orgánica, modificado polo Decreto 20/2007, do 22 de febreiro, a Consellería de Traballo asume o exercicio das competencias e funcións, entre outras materias, no relativo ás políticas activas de emprego.

Impulsado polo novo Goberno o proceso de diálogo social de Galicia, e como resultado del, a Xunta de Galicia, a Confederación de Empresarios de Galicia (CEG), a UGT-Galicia e o Sindicato Nacional de CC.OO. de Galicia conveñen en subscribir o 5 de febreiro de 2007 o Acordo sobre obxectivos e medidas de emprego de Galicia, que establece os obxectivos que cómpre acadar en materia de emprego neste período na liña de converxencia coa media do Estado e coa de Europa, e as medidas e recursos que se implementarán cara a consecución destes obxectivos, iniciándose unha nova etapa no marco das relacións laborais.

Así, no marco establecido no artigo 40 da Constitución española, na Lei 56/2003, do 16 de decembro, de emprego, nos artigos 29 e 30 do Estatuto de autonomía de Galicia, nos obxectivos de crecemento e emprego da Unión Europea, e no citado acordo, entre a Xunta de Galicia e as organizacións sindicais e empresariais, e co obxectivo de que a sociedade galega acade uns maiores niveis de desenvolvemento económico, de calidade no emprego, de benestar social e de cohesión no territorio, é preciso adoptar un conxunto de políticas activas de emprego para o fomento da contratación e da estabilidade no emprego.

Estas políticas teñen como finalidade facilitar a creación de emprego estable e de calidade, poñendo especial atención en facilitar a inserción laboral de persoas desempregadas con maiores dificultades de integración no mercado de traballo e a permanencia nas empresas con contrato estable daquelas que teñen na actualidade un contrato temporal.

Esta orde ten por obxecto establecer as bases reguladoras dos programas de fomento da contratación por conta allea de persoas desempregadas pertencentes a colectivos que presentan dificultades de inserción laboral, regulando para o ano 2007 os incentivos establecidos para os ditos colectivos e excluíndo deles as mulleres, que polas súas propias características á hora de acceder a un posto de traballo e para este ano se regulan en orde separada.

Inclúese, así mesmo, un programa específico para apoiar e incidir naquelas empresas sen persoas asalariadas, que con potencialidade para a creación de emprego, non adoptan tal decisión polo risco ou carga que pode supoñer a contratación da súa primeira persoa traballadora, o que ten unha especial relevancia nesta comunidade autónoma polo significativo número de microempresas en que se detecta tal situación.

O desenvolvemento tecnolóxico xoga un papel estratéxico para a sociedade galega e para o seu tecido empresarial, sendo necesario crear os incentivos necesarios que fomenten a difusión e transparencia de tecnoloxías, dunha parte, e os proxectos de investigación, desenvolvemento e innovación propios, por outra. Así, establécese unha liña específica de apoio á contratación indefinida inicial vinculada a proxectos I+D, co fin de favorecer a innovación nas empresas galegas.

Non obstante, para conservar a identidade e especificidade de cada un deles recóllense en anexos independentes as características propias de cada un.

As bases reguladoras dos programas regulados nesta orde establecen un procedemento de concesión que non ten a consideración de concorrencia competitiva, dado que de acordo coa finalidade e obxecto do programa non resulta necesario realizar a comparación e prelación da solicitudes presentadas nun único procedemento, senón que a concesión das axudas se realiza pola comprobación da concorrencia no solicitante dos requisitos establecidos ata o esgotamento do crédito orzamentario.

Neste marco de actuación, as bases reguladoras destes incentivos e a súa convocatoria para o presente exercicio, axústanse ao disposto no artigo 78 do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, na súa redacción dada pola Lei 14/2004, do 29 de decembro, de medidas tributarias e de réxime administrativo, do 28 de decembro, de orzamentos xerais da Comunidade Autónoma de Galicia para o ano 2007, no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, e no que resulte de aplicación a Lei 38/2003, do 17 de novembro, xeral de subvencións, e no seu regulamento de desenvolvemento aprobado polo Real decreto 887/2006, do 21 de xullo.

As axudas recollidas nesta orde financiaranse con cargo aos créditos das aplicacións orzamentarias que, para o exercicio 2007 se recollen na disposición adicional sétima da orde.

Por todo o exposto, e no desenvolvemento da planificación presentada ante o Comité Autonómico de Emprego, na súa reunión do día 8 de marzo de 2007, consultado o Consello Galego de Relacións Laborais, e no exercicio das facultades que me confire o artigo 34 da Lei 1/1983, do 22 de febreiro, modificada pola Lei 2/2007, do 28 de marzo, reguladora da Xunta e da súa Presidencia,

DISPOÑO:
Capítulo I
Finalidade, ámbito e principios de xestión.
Artigo 1º.-Obxecto, finalidade e principios de xestión.
1. Esta orde ten por obxecto fixar as bases reguladoras dos incentivos para fomentar novos postos de traballo facilitando a inserción dos colectivos de persoas desempregadas con dificultades de acceso ao mercado laboral, así como a permanencia nas empresas con contrato estable a aqueles que teñen na actualidade un contrato temporal, e se procede á súa convocatoria para o 2007 a través dos seguintes programas:

I. Programa de fomento da contratación indefinida inicial de colectivos de desempregados con dificultades de inserción laboral (anexo A).

II. Programa de fomento da permanencia nas empresas con contrato estable a aqueles que teñen na actualidade un contrato temporal (anexo B).

Axudas á transformación en indefinidos de contratos para a formación, prácticas de revezamento, de substitución por anticipación da idade de xubilación e de interinidade.

III. Programa de axudas a empresarias e empresarios sen persoas asalariadas pola contratación da súa primeira persoa traballadora fixa (anexo C).

IV. Programa de fomento da contratación indefinida inicial vinculada a proxectos I+D (anexo D).

2. As bases específicas de cada un dos programas regúlanse nos correspondentes anexos A, B, C e D desta orde e forman parte integrante dela.

3. Para efectos das axudas recollidas nesta orde, terán a consideración de persoas desempregadas aquelas que estean inscritas como demandantes de emprego no Servizo Público de Emprego no momento da contratación e que, pola súa vez, carezan de ocupación segundo o informe de vida laboral da Tesouraría Xeral da Seguridade Social.

4. As solicitudes, tramitación e concesión destas axudas e subvencións axustaranse ao disposto no texto refundido da Lei de réxime financeiro e orzamentario de Galicia, na Lei de orzamentos xerais da Comunidade Autónoma de Galicia, no Decreto 287/2000, do 21 de novembro, e nesta orde.

5. A xestión deste programa realizarase de acordo cos seguintes principios:
a) Publicidade, concorrencia, obxectividade, transparencia, igualdade e non discriminación.

b) Eficacia no cumprimento dos obxectivos fixados.
c) Eficiencia na asignación e na utilización dos recursos públicos.
Artigo 2º.-Beneficiarios.
1. Poderán ser beneficiarios dos incentivos previstos nesta orde as empresas, calquera que sexa a forma xurídica que adopten, incluídos os autónomos e as sociedades civís e as comunidades de bens, aínda que carezan de personalidade xurídica, que contraten traballadores e traballadoras por conta allea para prestaren servizos en centros de traballo situados na Comunidade Autónoma de Galicia, de acordo cos requisitos e condicións que se establecen nesta orde para cada un dos programas e tipos de axudas e que non incorran nas circunstancias previstas no artigo 13.2º da Lei 38/2003, do 17 de novembro, xeral de subvencións. No caso de sociedades civís e comunidades de bens, deberán nomear unha persoa representante ou apoderada única da agrupación, con poderes bastantes para cumprir as obrigas que, como beneficiaria, lle corresponden á agrupación.

2. Non poderán ser beneficiarios destas axudas as administracións públicas, as sociedades públicas, nin as entidades vinculadas ou dependentes de calquera delas.

Capítulo II
Normas comúns: competencia e procedemento
Artigo 3º.-Competencia.
A competencia para coñecer e resolver as solicitudes de axudas e subvencións presentadas ao abeiro desta orde, por delegación do conselleiro de Traballo, corresponderalles:

1. Ás delegadas e delegados provinciais da Consellería de Traballo cando a contratación se realice para prestaren servizos en centros de traballo radicados na respectiva provincia, agás no suposto previsto no punto seguinte.

2. Ao director xeral de Promoción do Emprego nos seguintes supostos:
a) Solicitudes presentadas ao abeiro do programa de fomento da contratación indefinida inicial de colectivos de desempregados con dificultades de inserción laboral ou do programa de fomento da permanencia nas empresas con contrato estable a aqueles que teñen na actualidade un contrato temporal (anexos A e B) que recollan a contratación indefinida de 15 ou máis traballadores no ámbito territorial de Galicia nunha ou varias solicitudes de axudas presentadas durante o período de vixencia desta orde, ou cando as contratacións se realicen para prestaren servizos en centros de traballo radicados en varias provincias da Comunidade Autónoma de Galicia.

b) Solicitudes de axudas á contratación indefinida con orixe en plans empresariais de desenvolvemento e investigación tecnolóxica (anexo D) que recollan a contratación de 15 ou máis traballadoras e traballadores no ámbito territorial de Galicia ou cando se trate da incorporación a proxectos empresariais de investigación e innovación acollidos ao Plan Galego de Investigación e Desenvolvemento Tecnolóxico ou a empresas que participen ou participasen no Programa IDIPEME ou cando as contratacións se realicen para prestaren servizos en centros de traballo radicados en varias provincias da Comunidade Autónoma de Galicia.

Artigo 4º.-Solicitudes e prazo.
1. As solicitudes de axudas e subvencións dirixiranse ao órgano competente para resolver e presentaranse nos rexistros das respectivas delegacións provinciais ou, se é o caso, na Dirección Xeral de Promoción do Emprego da Consellería de Traballo, ou por calquera das formas previstas no artigo 38.4º da Lei 30/1992, do 26 de novembro, modificada pola Lei 4/1999, do 13 de xaneiro, de réxime xurídico das administracións públicas e do procedemento administrativo común.

2. As solicitudes e os anexos deste programa están dispoñibles na páxina web da Consellería de Traballo: www.xunta.es/emprego.

3. As axudas previstas nos diferentes programas desta orde solicitaranse nos dous meses seguintes á data en que se inicie a relación laboral.

O prazo para a presentación das solicitudes de axudas finalizará o 15 de setembro de 2007 aínda que nesta data non transcorresen dous meses desde a data de alta no correspondente réxime da Seguridade Social da persoa traballadora contratada pola que se solicita subvención.

4. As solicitudes de axudas polas contratacións iniciais e polas transformacións realizadas desde o 16 de setembro de 2006 e ata a data da publicación da presente orde, que cumpran os requisitos e condicións establecidos nela, deberán presentarse no prazo de 1 mes contado a partir do día seguinte ao da publicación desta orde.

5. A presentación da solicitude de concesión de subvención polo interesado comportará a autorización do solicitante para que o órgano concedente obteña de forma directa a acreditación do cumprimento das súas obrigas tributarias co Estado, coa comunidade autónoma e coa Seguridade Social, a través de certificados telemáticos, polo que queda liberado o solicitante de achegar a correspondente certificación, segundo o establecido no artigo 43 da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007 (DOG nº 249, do 29 de decembro de 2006).

Porén, o solicitante poderá denegar expresamente o consentimento, deberá achegar entón as devanditas certificacións, coas solicitudes.

6. Mediante a presentación da solicitude de subvención, o interesado presta expresamente o seu consentimento á Consellería de Traballo para incluír e facer públicos os datos relevantes referidos ás axudas e subvencións recibidas, así como ás sancións impostas, nos rexistros públicos de axudas, subvencións e convenios e de sancións administrativas, regulados no Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006 (DOG nº 153, do 9 de agosto). Os dereitos de acceso, rectificación, consulta, cancelación e oposición de datos de carácter persoal exerceranse ante o CIXTEC como responsable dos ficheiros, con domicilio na rúa Domingo Fontán 9-15702 Santiago de Compostela, de conformidade coas prescricións da Lei orgánica 15/1999, do 13 de decembro, de protección de datos de carácter persoal.

7. Coa presentación da solicitude de subvención o interesado autoriza expresamente a Consellería de Traballo para que de acordo co establecido nos números 3º e 4º do artigo 13 da Lei 4/2006, do 30 de xuño, de transparencia e de boas prácticas na Administración pública galega, publique as subvencións concedidas ao abeiro desta orde no Diario Oficial de Galicia e na súa páxina web oficial, con expresión do beneficiario, a contía e a súa finalidade.

8. Para a presentación das solicitudes de axudas, os beneficiarios poderán contar coa información e co asesoramento dos axentes de emprego da rede coordinada pola Consellería de Traballo (www.tecnicosempregogalicia.xunta.es).

Artigo 5º.-Instrución e tramitación.
Se a solicitude non estivese debidamente cuberta ou non se achegase a documentación exixida, as unidades administrativas encargadas da tramitación do expediente de conformidade co disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, requirirán o interesado para que, nun prazo de 10 días, emende a falta ou presente os documentos preceptivos, coa advertencia de que, se así non o fixer, se considerará desistido da súa petición, logo de resolución, que deberá ser ditada nos termos previstos no artigo 42 da antedita lei.

Artigo 6º.-Resolución e recursos.
1. Logo da fiscalización polas respectivas intervencións das propostas emitidas polos correspondentes servizos, as resolucións serán ditadas polo órgano competente por delegación do conselleiro de Traballo e deberán serlles notificadas aos interesados. As resolucións de concesión ou denegatorias deberán ser sempre motivadas.

2. O prazo para resolver e notificar será de seis meses, que se computarán desde a data de entrada da solicitude no rexistro do órgano competente para a súa tramitación. Transcorrido o devandito prazo sen que se ditase resolución expresa, entenderase desestimada a solicitude, de acordo co establecido nos artigos 1 e 2 da Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común.

3. As resolucións que se diten neste procedemento esgotan a vía administrativa, e contra elas cabe interpoñer recurso contencioso-administrativo, no prazo de dous meses, ante o órgano competente da xurisdición contencioso-administrativa, e poderá formularse, con carácter potestativo, recurso de reposición, no prazo dun mes, ante o mesmo órgano que ditou a resolución impugnada, de conformidade co disposto na Lei 29/1998, do 13 de xullo, reguladora da xurisdición contencioso-administrativa, e na Lei 30/1992, do 26 de novembro, de réxime xurídico das administracións públicas e do procedemento administrativo común.

Artigo 7º.-Incompatibilidades e concorrencia.
1. Os incentivos establecidos para cada un dos diferentes programas previstos nesta orde son incompatibles entre si. Para o caso de que unha mesma contratación puidese dar lugar á súa inclusión en máis dun dos supostos para os que está prevista subvención, correspóndelle a opción ao solicitante.

2. As subvencións previstas nesta orde para as contratacións por conta allea serán incompatibles con outras que, polos mesmos conceptos, poidan outorgar as administracións públicas como medida de fomento de emprego. As ditas axudas son compatibles, se é o caso, con incentivos en forma de bonificacións á Seguridade Social.

3. Os beneficios establecidos á contratación indefinida nos anexos A, B, C e D desta orde non poderán, en concorrencia con outras axudas públicas para a mesma finalidade, superar o 60% do custo salarial anual correspondente ao contrato que se subvenciona.

4. Os incentivos establecidos nesta orde serán compatibles con calquera outra axuda para distinta finalidade da Unión Europea, doutras administracións públicas ou entes públicos ou privados, sen que en ningún caso, illadamente ou en concorrencia con outras, poidan superar os límites establecidos pola Unión Europea e os que establece o artigo 78.9º do texto refundido da Lei de réxime financeiro e orzamentario de Galicia, conforme a redacción dada pola Lei 14/2004, do 29 de decembro, de medidas tributarias e de réxime administrativo.

Artigo 8º.-Obrigas dos beneficiarios.
Son obrigas dos beneficiarios das axudas e subvencións:
a) Estar ao día das súas obrigas tributarias estatais e autonómicas e da Seguridade Social, así como non ter pendente de pagamento ningunha outra débeda, por ningún concepto, coa Administración pública da comunidade autónoma, con anterioridade a ditarse a proposta de resolución de concesión e realizar a proposta de pagamento da subvención.

b) Comunicarlle ao órgano concedente calquera modificación das condicións tidas en conta para a concesión de subvencións, así como dos compromisos e das obrigas asumidos polos beneficiarios e, de ser o caso, a obtención concorrente de subvencións, axudas, ingresos ou recursos que financien as actividades subvencionadas. Esta comunicación deberá efectuarse tan pronto como se coñeza e, en todo caso, con anterioridade á xustificación da aplicación dada aos fondos percibidos.

c) O sometemento ás actuacións de control, comprobación e inspección que efectuará a Consellería de Traballo ás de control financeiro que lle correspondan, se é o caso, á Intervención Xeral da Comunidade Autónoma, ás previstas na lexislación do Tribunal de Contas e do Consello de Contas, ou doutros órganos da Administración do Estado ou da Unión Europea e achegar canta información lle sexa requirida no exercicio das actuacións anteriores.

d) Adoptar as medidas axeitadas de difusión para darlle publicidade ao financiamento público das actuacións subvencionadas pola Consellería de Traballo, así como, se é o caso, cofinanciadas polo Fondo Social Europeo, nos termos establecidos no Regulamento (CE) nº 1828, da Comisión, do 8 de decembro de 2006, polo que se fixan as normas de desenvolvemento do Regulamento (CE) nº 1083/2006, do Consello, polo que se establecen as disposicións xerais relativas ao Fondo Europeo de Desenvolvemento Rexional, ao Fondo Social Europeo e ao Fondo de Cohesión e o Regulamento (CE) nº 1080/2006, do Parlamento Europeo e do Consello, relativo ao Fondo Europeo de Desenvolvemento Rexional (DOUE L 45, do 15 de febreiro de 2007).

e) Manter os postos de traballo obxecto da subvención durante o período e nos termos establecidos para os distintos programas recollidos nos diferentes anexos desta orde.

f) Aqueloutras obrigas establecidas no artigo 78 do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, conforme a redacción dada pola Lei 14/2004, do 29 de decembro, de medidas tributarias e de réxime administrativo.

Artigo 9º.-Modificación da resolución de concesión.
Toda alteración das condicións tidas en conta para a concesión das axudas ou subvencións, así como a obtención concorrente de subvencións e axudas outorgadas por outras administracións ou outros entes públicos ou privados, nacionais ou internacionais, poderá dar lugar á modificación da resolución de concesión e eventualmente á súa revogación.

Artigo 10º.-Revogación e reintegro.
Procederá a revogación das subvencións e axudas, así como o reintegro total ou parcial das cantidades percibidas e a exixencia do xuro de demora, nos casos e nos termos previstos no artigo 78 do texto refundido da Lei de réxime financeiro e orzamentario de Galicia e no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.

A obriga de reintegro establecida no parágrafo anterior enténdese sen prexuízo do establecido no Real decreto lexislativo 5/2000, do 4 de agosto, polo que se aproba o texto refundido da Lei sobre infraccións e sancións na orde social.

Artigo 11º.-Seguemento e control.
As delegacións provinciais e a Dirección Xeral de Promoción do Emprego poderán comprobar, en todo momento, a aplicación das subvencións concedidas para os fins programados. Para estes efectos os beneficiarios deberán cumprir as obrigas de comprobación que se establezan nesta orde e na resolución de concesión.

Disposicións adicionais
Primeira.-Sen prexuízo das facultades que teñan atribuídas outros órganos da Administración do Estado ou da comunidade autónoma, a Consellería de Traballo levará a cabo funcións de control, así como de avaliación e seguimento dos programas.

Para realizar as ditas funcións poderanse utilizar cantos medios estean á disposición da Consellería de Traballo para comprobar o cumprimento dos requisitos exixidos nesta orde e demais normas vixentes que resulten de aplicación.

Segunda.-A Consellería de Traballo poderá requirir en todo momento a documentación orixinal que se considere necesaria para acreditar mellor o exacto cumprimento das condicións exixidas nesta orde, agás aquela que de acordo co artigo 35º f) da Lei 30/1992, do 26 de novembro, de réxime xurídico das administracións públicas e do procedemento administrativo común, xa se atopen en poder da Administración actuante.

Terceira.-Apróbase a delegación de atribucións do conselleiro de Traballo nos delegados/as provinciais, no ámbito das súas respectivas provincias, e no director xeral de Promoción do Emprego, para resolver a concesión ou denegación das axudas e subvencións previstas nesta orde, así como para autorizar, dispoñer, recoñecer a obriga e propoñer os correspondentes pagamentos, así como para resolver os procedementos de reintegro das subvencións indebidamente percibidas polos seus beneficiarios, respecto das resolucións concesorias de que traen causa, ditadas por delegación do conselleiro.

Cuarta.-Para o caso de que se soliciten os incentivos previstos nesta orde pola transformación en indefinido dun contrato en prácticas, e a conversión se produza con anterioridade á súa duración mínima inicial de 12 meses, compensarase a parte da subvención concedida correspondente ao período non esgotado reducindo na mesma contía o incentivo pola transformación do contrato en indefinido.

Quinta.-Para os efectos do sinalado na base terceira dos anexos A e C, terá a consideración de titular de familia monoparental e con cargas familiares a persoa solteira, viúva, separada ou divorciada que teña ao seu coidado fillas ou fillos menores de 21 anos ou persoas maiores incapacitadas e que non obteñan ingresos de calquera natureza superiores ao 75% do IPREM vixente no momento da solicitude.

Para os efectos do sinalado na base sexta do anexo A terán a consideración de traballadores desempregados procedentes de empresas en crise aquelas traballadoras e traballadores cuxa relación laboral se extinga por algunha das causas sinaladas nos artigos 51 e 52 c) do Estatuto dos traballadores.

Para os efectos do sinalado na base cuarta do anexo C, terán a consideración de retornados/as aqueles/as emigrantes que cumpran coa condición de que non transcorresen máis de dous anos entre a data do retorno e a data de alta no correspondente réxime da Seguridade Social.

Sexta.-A concesión das axudas e subvencións previstas nesta orde estará suxeita á existencia de crédito orzamentario.

Sétima.-No exercicio económico 2007, as axudas recollidas nesta orde, entre outras, financiaranse con cargo ás aplicacións orzamentarias 16.02.322C.470.2, código de proxecto 2007 00 675, cun crédito de 4.142.691 euros; 16.02.322C.470.3, código de proxecto 2007 00 676, cun crédito de 6.300.000 euros; 16.02.322C.470.4, código de proxecto 2007 00 678, cun crédito de 4.000.000 de euros; 16.02.322C.470.4, código de proxecto 2007 00 679, cun crédito de 7.651.519 euros; 16.02.322C.470.6, código de proxecto 2007 00 749, cun crédito de 6.000.000 de euros; 16.02.322C.480.1, código de proxecto 2007 00 682, cun crédito de 1.200.000 euros; 16.02.322Z.470.0, código de proxecto 2007 00 690, cun crédito de 963.160 euros; 16.02.322Z.470.1, código de proxecto 2007 00 693, cun crédito de 2.228.611 euros; 16.02.322Z.470.1, código de proxecto 2007 00 694, cun crédito de 2.527.068 euros; 16.02.322Z.470.1, código de proxecto 2007 00 696, cun crédito de 5.647.605 euros; 16.02.322Z.470.1, código de proxecto 2007 00 697, cun crédito de 1.133.755 euros; 16.02.322Z.470.2, código de proxecto 2007 00 672, cun crédito de 1.793.659 euros; 16.02.322Z.470.2, código de proxecto 2007 00 700, cun crédito de 383.283 euros.

Estas contías están recollidas na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, e constitúen o importe global para a financiamento desta orde; da orde pola que se establecen as bases reguladoras do programa para o fomento das transformacións dos contratos de carácter temporal en indefinidos e se procede á súa convocatoria para o ano 2007; da orde pola que se establecen as bases reguladoras do programa para a promoción do emprego autónomo cofinanciado polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras do réxime de axudas e subvencións ás empresas cualificadas como iniciativas locais de emprego (ILE) ou como iniciativas de emprego rural (IER), cofinanciadas polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras dos programas para a promoción da integración laboral das persoas con discapacidade, cofinanciados polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras do programa de subvencións ás unidades de apoio á actividade profesional no marco dos servizos de axustamento persoal e social dos centros especiais de emprego e se procede á súa convocatoria para o ano 2007; da orde pola que se establecen as bases reguladoras do programa de axudas e subvencións ás empresas cualificadas como iniciativas de emprego de base tecnolóxica (IEBT), cofinanciado polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras dos programas de incentivos á contratación por conta allea como medida para favorecer a inserción dos mozos e mozas, cofinanciados polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras e se convocan para o ano 2007 os incentivos á contratación dirixidos a favorecer a conciliación da vida laboral e familiar; da orde pola que se establecen as bases reguladoras do programa de incentivos á contratación por conta allea de persoas desempregadas pertencentes a colectivos en risco de exclusión social, cofinanciado polo Fondo Social Europeo, e se procede á súa convocatoria para o ano 2007; da orde pola que se establecen as bases reguladoras do programa de incentivos á contratación indefinida das mulleres como medida para lograr un mercado de traballo igualitario, cofinanciado polo Fondo Social Europeo, e se procede á súa convocatoria para o ano 2007 e das demais ordes que establezan as bases das medidas de fomento do emprego, incentivos á contratación por conta allea e actuacións de apoio a persoas emprendedoras, autoemprego e economía social, incluídos nos programas orzamentarios 322C e 322Z.

Así mesmo, os créditos consignados nesta orde poderán ser obxecto de modificacións como consecuencia da asignación ou da redistribución de fondos para o financiamento dos programas de fomento do emprego, coas limitacións que estableza a Conferencia Sectorial de Asuntos Laborais ou as disposicións aplicables ás axudas cofinanciadas polo Fondo Social Europeo.

Disposicións derradeiras
Primeira.-Facúltase o director xeral de Promoción do Emprego para que dite, no ámbito das súas competencias, as resolucións e instrucións necesarias para o desenvolvemento e cumprimento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 31 de maio de 2007.
Ricardo Jacinto Varela Sánchez
Conselleiro de Traballo
Anexo A
Programa de fomento da contratación indefinida inicial de colectivos de desempregados con dificultades de inserción laboral.

Primeira.-Obxecto.
Este programa ten por obxecto fomentar a creación de postos de traballo de calidade e favorecer a inclusión social mediante o apoio á inserción laboral das categorías de traballadores que presentan desvantaxes e dificultades particulares para accederen e permaneceren no mercado de traballo.

Segunda.-Réxime das axudas.
As axudas ás contratacións indefinidas iniciais que reúnan as condicións e requisitos establecidos neste anexo, e fosen realizadas entre o 16 de setembro e o 31 de decembro do 2006, están amparadas na súa adecuación ao dereito comunitario pola autorización da Comisión Europea C (2002) 1884 fin de 22-5-2002. E, cando se trate de empregos ligados a un investimento, polo seu sometemento ao Regulamento (CE) nº 70/2001 da Comisión, do 12 de xaneiro de 2001, relativo á aplicación dos artigos 87 e 88 do Tratado CE ás axudas estatais ás pequenas e medianas empresas (DOCE L10, 13-1-2001).

As axudas ás contratacións indefinidas iniciais que reúnan as condicións e requisitos establecidos neste anexo, e sexan realizadas no ano 2007, están amparadas na súa adecuación ao dereito comunitario polo seu sometemento ao Regulamento (CE) nº 2204/2002 da Comisión da Unión Europea, do 12 de decembro, relativo á aplicación dos artigos 87 e 88 do Tratado CE ás axudas estatais para o emprego (DOCE L337, do 13 de decembro).

Terceira.-Colectivos desfavorecidos.
Para os efectos deste anexo, terán a consideración de colectivos beneficiarios que presentan desvantaxes para o acceso e permanencia no mercado de traballo os homes desempregados maiores de 31 anos nos cales concurra algunha das seguintes circunstancias:

a) Desempregados de longa duración: todo home que estivese sen traballo 12 dos anteriores 16 meses, ou durante 6 meses dos anteriores 8, se for maior de 45 anos.

b) Homes titulares de familias monoparentais que teñan cargas familiares ou desempregados de unidades familiares en que ningún dos seus membros en idade laboral obteña rendas de calquera natureza superiores ao 75% do IPREM vixente no momento da solicitude.

Cuarta.-Ámbito de aplicación, contratacións subvencionables e definicións.
1. Poderán ser obxecto de subvención as contratacións indefinidas iniciais, sempre que se realicen con traballadores desempregados que estean inscritos como demandantes de emprego no Servizo Público de Emprego no momento da contratación, pertencentes a algún dos colectivos desfavorecidos relacionados na base 3ª deste anexo.

2. As ditas contratacións iniciais, para poderen ser obxecto de subvención, deberán formalizarse por escrito e comunicarse á oficina pública de emprego na forma regulamentariamente establecida.

3. Cando se trate de contratacións a tempo parcial, a contía dos incentivos previstos neste anexo será proporcional ao tempo efectivo de traballo en función da xornada a tempo completo establecida no convenio colectivo de aplicación ou, na súa falta, da xornada ordinaria legal.

4. Para os efectos do cálculo da taxa de estabilidade e do incremento do persoal fixo na empresa, ao persoal contratado con contratos de interinidade consideraráselle a mesma condición de fixo ou temporal que a persoa que substitúe. Se o traballador con contrato de interinidade substitúe un traballador con obriga de cotización, e que consta no TC2, o interino non se computa.

Quinta.-Requisitos.
Para poder acceder aos beneficios á contratación indefinida establecidos neste anexo, deberán cumprirse as seguintes condicións e requisitos:

a) A taxa de estabilidade do cadro de persoal da empresa no mes da contratación pola cal se solicita subvención deberá ser igual ou superior ao 72,5%.

Para os efectos do anterior entenderase por taxa de estabilidade a porcentaxe de persoas traballadoras fixas sobre o total do cadro de persoal no conxunto dos centros de traballo da empresa en Galicia.

b) Como consecuencia da contratación indefinida que se fomenta, ten que incrementarse o cadro de persoal fixo da empresa no ámbito territorial de Galicia, de modo que supere a media aritmética dos doce meses anteriores á data de inicio da prestación laboral, sendo unicamente subvencionables as contratacións que superen a dita media.

Para os efectos do cómputo do incremento do cadro de persoal fixo, non se terán en contas as baixas dos traballadores e das traballadoras que se producisen por propia vontade da traballadora ou traballador ou por morte, xubilación, incapacidade permanente total ou absoluta ou grande invalidez legalmente recoñecidas.

c) Como consecuencia da contratación indefinida que se fomenta, ten que incrementarse o cadro global de persoal da empresa no ámbito territorial de Galicia, de modo que supere a media aritmética dos doce meses anteriores á data de inicio da prestación laboral.

Sexta.-Incentivos á contratación indefinida inicial.
1. As contratacións indefinidas iniciais, incluídos os fixos-descontinuos, realizadas con traballadores desempregados de longa duración menores de 45 anos, incentivaranse cunha axuda de ata 3.500 euros.

2. As contratacións indefinidas iniciais, incluídos os fixos-descontinuos, realizadas con traballadores desempregados de longa duración maiores de 45 anos, incentivaranse cunha axuda de ata 5.000 euros.

3. As contratacións indefinidas iniciais, incluídos os fixos-descontinuos, realizadas con titulares de familias monoparentais que posúan cargas familiares ou demandantes de unidades familiares en que ningún dos seus membros en idade laboral obteña rendas superiores ao 75% do IPREM vixente no momento da solicitude, incentivaranse cunha axuda de ata 5.000 euros.

4. As contratacións indefinidas iniciais, incluídos os fixos-descontinuos, realizadas con traballadores desempregados que, pertencendo a algún dos colectivos relacionados na base 3ª, procedan de empresas en crise, incentivaranse cunha axuda de ata 5.500 euros.

5. Cando se trate de contratacións a tempo parcial, a contía dos incentivos previstos neste anexo será proporcional ao tempo efectivo de traballo en función da xornada a tempo completo establecida no convenio colectivo de aplicación ou, na súa falta, da xornada ordinaria legal.

Sétima.-Exclusións.
Exclúense dos beneficios do programa establecido neste anexo:
a) As relacións laborais de carácter especial previstas no artigo 2.1º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, ou noutras disposicións legais, así como as contratacións de traballadores para prestaren servizos noutras empresas mediante contratos de posta á disposición.

b) Os contratos realizados co/a cónxuxe, ascendentes, descendentes e demais parentes, por consanguinidade ou afinidade, ata o segundo grao inclusive, da empresaria ou empresario ou de quen desempeñe cargos de dirección ou sexan membros dos órganos de administración das empresas que revistan a forma xurídica de sociedade, así como as que se produzan con estes últimos.

c) Contratacións realizadas con traballadores que, nos 24 meses anteriores á data da contratación, prestasen servizos na mesma empresa ou grupo de empresas mediante un contrato por tempo indefinido.

O disposto no parágrafo precedente será tamén de aplicación no suposto de vinculación laboral anterior do traballador con empresas a que o solicitante dos beneficios sucedese en virtude do establecido no artigo 44 do Real decreto lexislativo 1/1995, do 24 de marzo.

d) Traballadores que rematasen unha relación laboral de carácter indefinido nun prazo de 3 meses previos á formalización do contrato polo cal se solicita a subvención, agás que a dita relación laboral finalizase por causa dun despedimento recoñecido ou declarado improcedente ou se extinga por algunha das causas sinaladas no artigo 51 e 52 c) do Estatuto dos traballadores.

Oitava.-Prazo.
As axudas previstas neste programa solicitaranse nos dous meses seguintes á data en que se inicie a relación laboral.

O prazo para a presentación das solicitudes de axudas finalizará o 15 de setembro de 2007, aínda que nesta data non transcorresen dous meses desde a realización do contrato obxecto de subvención.

Novena.-Documentación.
As solicitudes deberán presentarse nos modelos normalizados que figuran como anexos numéricos desta orde, xunto coa seguinte documentación, orixinal ou copia compulsada:

1. Se o solicitante é persoa física, DNI e acreditación do NIF, e se é persoa xurídica, DNI e poder suficiente da persoa representante para actuar en nome da entidade e NIF da empresa.

2. Declaración da empresa, no modelo da solicitude, en que se faga constar o número e provincia de localización dos centros de traballo da empresa en Galicia, así como do número de contratacións indefinidas polas cales se solicita subvención ao abeiro desta orde.

3. Declaración do cadro de persoal de todos os centros de traballo da empresa en Galicia en cada un dos doce meses anteriores ao inicio da relación laboral do traballador contratado, así como da taxa de estabilidade acadada no mes da contratación (anexo III-A).

Se é o caso, documentos acreditativos das baixas previstas na base 5ª deste anexo.

4. Relación nominal dos traballadores contratados polos cales se solicita subvención, con indicación do colectivo e tipo de axuda que se solicita (anexo IV-A).

5. Copia simple do DNI dos traballadores contratados.
6. Documentos acreditativos dos períodos de inscrición como demandantes de emprego na oficina pública de emprego, así como do tempo de permanencia no paro segundo os datos do informe de vida laboral da Tesouraría Xeral da Seguridade Social, copias dos contratos de traballo e altas na Seguridade Social.

Así mesmo, documentos acreditativos das características que determinen a súa pertenza ao correspondente colectivo.

7. Declaración comprensiva do conxunto de todas as solicitudes efectuadas ou concedidas para o mesmo proxecto perante as administracións públicas competentes ou outros entes públicos ou, de ser o caso, unha declaración de que non solicitou nin percibiu outras axudas ou subvencións (anexo XV).

8. Declaración da estrutura da empresa e do emprego (anexo XVI).
9. Ficha de transferencia bancaria e certificación da entidade financeira acreditativa de que o solicitante é titular da conta (anexo XVII).

10. Documentación acreditativa de se encontraren ao día das súas obrigas tributarias -estatais e autonómicas-e coa Seguridade Social e de non teren pendente de pagamento ningunha outra débeda coa Administración da comunidade autónoma, unicamente no suposto de que o solicitante denegase expresamente a autorización ao órgano xestor para solicitar as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

Décima.-Xustificación do pagamento.
1. De non achegarse con anterioridade, o pagamento das axudas ou subvencións quedará condicionado á presentación, no prazo, nos termos e na forma que se estableza na resolución de concesión, da documentación que se exixa de forma expresa nela, entre a cal deberá figurar a seguinte:

a) Documentos TC2 correspondentes ás mensualidades que se indiquen na resolución de concesión, agás que xunto coa solicitude se achegasen todos os boletíns correspondentes ao período de cómputo para o cálculo do incremento do cadro de persoal fixo ou, se é o caso, certificación da Tesouraría Xeral da Seguridade Social en que conste o número de persoas traballadoras con contrato indefinido, o de persoas traballadoras con contrato de interinidade e dos/das demais traballadores e traballadoras con contratos temporais en cada unha das ditas mensualidades no conxunto dos centros de traballo da empresa en Galicia.

b) Declaración complementaria da establecida na base novena do conxunto das axudas solicitadas, tanto aprobadas ou concedidas como pendentes de resolución para o mesmo proxecto das distintas administracións públicas competentes ou outros entes públicos, ou, de ser o caso, que non solicitou nin percibiu outras axudas e subvencións (anexo XV).

2. Non obstante o sinalado nos números anteriores, a documentación exixida na fase de pagamento poderase presentar xunto coa solicitude segundo a opción do interesado. Neste suposto poderán tramitarse conxuntamente a concesión e o pagamento da axuda.

3. Non poderá realizarse en ningún caso o pagamento da subvención se o beneficiario non figura ao día no cumprimento das súas obrigas tributarias -estatais e autonómicas-e da Seguridade Social, é debedor en virtude de resolución firme declarativa da procedencia de reintegro ou ten algunha débeda pendente, por calquera concepto, coa Administración da comunidade autónoma.

Décimo primeira.-Obrigas dos beneficiarios.
Son obrigas das empresas beneficiarias:
1. Manter no seu cadro de persoal fixo o traballador contratado ao abeiro deste programa durante un período mínimo de 3 anos.

No suposto de extinción da relación laboral do traballador por quen se concedese a subvención, a cobertura do posto por un novo traballador, que deberá reunir os requisitos do traballador substituído, terá que realizarse dentro do mes seguinte ao da baixa, feito que deberá ser comunicado pola empresa beneficiaria ao órgano competente que concedese a axuda, dentro dos 20 días seguintes á substitución. Esta nova contratación en ningún caso dará lugar a unha nova axuda de fomento da contratación.

Esta obriga manterase durante 3 anos desde a data de realización do contrato indefinido obxecto de subvención, e, cando se trate de empregos ligados a un investimento, deberán manter os postos de traballo durante un período mínimo de 5 anos.

2. Manter o número de persoas traballadoras fixas do seu cadro de persoal, en cómputo anual, durante polo menos 3 anos, que se contarán desde a data de realización da contratación indefinida.

3. Manter a estrutura do cadro de persoal da empresa en Galicia cunha taxa de estabilidade igual ou superior ao 72,5% no seu cómputo anual, durante polo menos 3 anos desde o mes en que se realice a contratación subvencionada.

4. Co fin de garantir o cumprimento do anterior, as empresas beneficiarias deberán presentar nos tres meses seguintes e durante os tres anos posteriores ao de realización das contratacións, unha declaración da media de persoal traballador fixo e temporal no conxunto dos centros de traballo en Galicia nun período de 12 meses contados desde o mes de realización das contratacións, así como o TC2 correspondente ao mes no que se efectuaron as ditas contratacións.

Anexo B
Programa de fomento da permanencia nas empresas con contrato estable a aqueles que teñen na actualidade un contrato temporal.

Primeira.-Obxecto.
Este programa ten por obxecto fomentar a estabilidade nas empresas por medio da transformación en indefinidos de contratos para a formación, prácticas, de revezamento, de substitución por anticipación da idade de xubilación e de interinidade, celebrados con homes maiores de 31 anos no momento da contratación temporal.

Segunda.-Réxime das axudas.
As axudas polas transformacións en indefinidos de contratos temporais que reúnan as condicións e requisitos establecidos neste anexo, e fosen realizadas entre o 16 de setembro e o 31 de decembro de 2006, están amparadas na súa adecuación ao dereito comunitario pola autorización da Comisión Europea C (2002) 1884 fin de 22-5-2002, e, cando se trate de empregos ligados a un investimento, polo seu sometemento ao Regulamento (CE) nº 70/2001 da Comisión, do 12 de xaneiro de 2001, relativo á aplicación dos artigos 87 e 88 do Tratado CE ás axudas estatais ás pequenas e medianas empresas (DOCE L10, 13-1-2001).

As axudas polas transformacións en indefinidos de contratos temporais que reúnan as condicións e requisitos establecidos neste anexo, e fosen realizadas no ano 2007, quedan sometidas ao réxime de axudas de minimis. Polo tanto, non poderán exceder os límites cuantitativos (200.000 euros nun período de tres anos) establecidos no Regulamento (CE) nº 1998/2006, da Comisión da Unión Europea, do 15 de decembro, relativo á aplicación dos artigos 87 e 88 do Tratado da CE ás axudas de minimis (DOCE nº L379, do 28 de decembro).

Terceira.-Ámbito de aplicación, contratacións subvencionables e definicións.
1. Poderán ser obxecto dos incentivos previstos neste anexo as transformacións en indefinidos de contratos para a formación, en prácticas, de revezamento, de substitución por anticipación da idade de xubilación e de interinidade, calquera que sexa a data da súa realización, que se formalicen con homes maiores de 31 anos na data do contrato temporal obxecto de conversión.

Cando se trate de contratos de interinidade, en todo caso, a súa transformación en indefinidos só poderá ser obxecto de subvención cando se manteña o posto da persoa traballadora substituída, o que terá que acreditarse.

2. Na transformación de contratos temporais a tempo completo, a xornada do novo contrato indefinido será tamén a tempo completo. Nos supostos de transformación de contratos temporais a tempo parcial, a xornada do novo contrato indefinido deberá ser, como mínimo, igual á do contrato que se transforma.

3. Para os efectos deste anexo, entenderase que se produce a transformación en todos aqueles casos en que ambas as modalidades contractuais se sucedan sen ruptura da relación laboral coa empresa, incluídos aqueles supostos en que o inicio da relación laboral indefinida ten lugar ao día seguinte ao do termo da vixencia do contrato temporal, incorporándose á empresa con carácter estable sen ruptura de continuidade na relación laboral.

4. As ditas transformacións, para poderen ser obxecto de subvención, deberán formalizarse por escrito e comunicarse á oficina pública de emprego na forma regulamentariamente establecida.

5. Cando se trate de contratacións a tempo parcial, a contía dos incentivos previstos neste anexo serán proporcionais ao tempo efectivo de traballo en función da xornada a tempo completo establecida no convenio colectivo de aplicación ou, na súa falta, da xornada ordinaria legal.

6. Para os efectos do cálculo da taxa de estabilidade e do incremento do persoal fixo na empresa, ao persoal contratado con contratos de interinidade consideraráselle a mesma condición de fixo ou temporal que a persoa que substitúe. Se o traballador con contrato de interinidade substitúe un traballador con obriga de cotización, e que consta no TC2, o interino non se computa.

Cuarta.-Requisitos.
Para poder acceder aos beneficios á contratación indefinida establecidos neste anexo, deberán cumprirse as seguintes condicións e requisitos:

a) A taxa de estabilidade do cadro de persoal da empresa no mes da contratación pola cal se solicita subvención deberá ser igual ou superior ao 72,5%.

Para os efectos do anterior entenderase por taxa de estabilidade a porcentaxe de persoal traballador fixo sobre o total do cadro de persoal no conxunto dos centros de traballo da empresa en Galicia.

b) Como consecuencia da contratación que se fomenta ten que incrementarse o cadro de persoal fixo da empresa no ámbito territorial de Galicia, de modo que supere a media aritmética dos doce meses anteriores á data de inicio da prestación laboral, sendo unicamente subvencionables as contratacións que superen a dita media.

Para os efectos do cómputo do incremento do cadro de persoal fixo, non se terán en conta as baixas dos traballadores e das traballadoras que se producisen por propia vontade do traballador ou por morte, xubilación, incapacidade permanente total ou absoluta ou grande invalidez legalmente recoñecidas.

Quinta.-Incentivos á transformación.
As transformacións en indefinidos dos contratos que reúnan os requisitos e condicións establecidos na base terceira e cuarta deste anexo incentivaranse cunha axuda de ata 2.000 euros.

Sexta.-Exclusións.
Exclúense dos beneficios do programa establecido neste anexo:
a) As relacións laborais de carácter especial previstas no artigo 2.1º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, ou noutras disposicións legais, así como as contratacións de traballadores para prestaren servizos noutras empresas mediante contratos de posta á disposición.

b) Os contratos realizados co/a cónxuxe, ascendentes, descendentes e demais parentes, por consanguinidade ou afinidade, ata o segundo grao inclusive, da empresaria ou empresario ou de quen desempeñe cargos de dirección ou sexan membros dos órganos de administración das empresas que revistan a forma xurídica de sociedade, así como as que se produzan con estes últimos.

c) Contratacións realizadas con traballadores que nos 24 meses anteriores á data da contratación prestasen servizos na mesma empresa ou grupo de empresas mediante un contrato por tempo indefinido.

O disposto no parágrafo precedente será tamén de aplicación no suposto de vinculación laboral anterior do traballador con empresas a que o solicitante dos beneficios sucedese en virtude do establecido no artigo 44 do Real decreto lexislativo 1/1995, do 24 de marzo.

d) Traballadores que rematasen unha relación laboral de carácter indefinido nun prazo de 3 meses previos á formalización do contrato polo cal se solicita a subvención, agás que a dita relación laboral finalizase por causa dun despedimento recoñecido ou declarado improcedente ou se extinga por algunha das causas sinaladas nos artigos 51 e 52 c) do Estatuto dos traballadores.

Sétima.-Prazo.
As axudas previstas neste programa solicitaranse nos dous meses seguintes á data en que se se produza a transformación do contrato temporal en indefinido.

O prazo para a presentación das solicitudes de axudas finalizará o 15 de setembro de 2007, aínda que nesta data non transcorresen dous meses desde a realización do contrato obxecto de subvención.

Oitava.-Documentación.
As solicitudes deberán presentarse nos modelos normalizados que figuran como anexos numéricos desta orde xunto coa seguinte documentación, orixinal ou copia compulsada:

1. Se o solicitante é persoa física, DNI e acreditación do NIF, e se é persoa xurídica, DNI e poder suficiente da persoa representante para actuar en nome da entidade e NIF da empresa.

2. Declaración da empresa, no modelo da solicitude, en que se faga constar o número e provincia de localización dos centros de traballo da empresa en Galicia, así como do número de contratacións indefinidas polas cales se solicita subvención ao abeiro desta orde.

3. Declaración do cadro de persoal fixo de todos os centros de traballo da empresa en Galicia en cada un dos doce meses anteriores á transformación, así como da taxa de estabilidade acadada no mes da contratación (anexo VII-B).

Se é o caso, documentos acreditativos das baixas previstas na base 4ª deste anexo.

4. Relación nominal das persoas traballadoras contratadas polas cales se solicita subvención, con indicación do colectivo e tipo de axuda que se solicita (anexo VIII-B).

5. Copia simple do DNI dos traballadores contratados.
6. O contrato temporal que se transforma e as súas posibles prórrogas, así como a comunicación da conversión do contrato temporal en indefinido á oficina pública de emprego e a comunicación de variación de datos á Seguridade Social.

7. Declaración comprensiva do conxunto de todas as solicitudes efectuadas ou concedidas para o mesmo proxecto perante as administracións públicas competentes ou outros entes públicos ou, de ser o caso, unha declaración de que non solicitou nin percibiu outras axudas ou subvencións (anexo XV).

8. Declaración da estrutura da empresa e do emprego (anexo XVI).
9. Ficha de transferencia bancaria e certificación da entidade financeira acreditativa de que o solicitante é titular da conta (anexo XVII).

10. Documentación acreditativa de se encontraren ao día das súas obrigas tributarias -estatais e autonómicas-e coa Seguridade Social e de non teren pendente de pagamento ningunha outra débeda coa Administración da comunidade autónoma, unicamente no suposto de que o solicitante denegase expresamente a autorización ao órgano xestor para solicitar as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

Novena-Xustificación do pagamento.
1. De non achegarse con anterioridade, o pagamento das axudas ou subvencións quedará condicionado á presentación, no prazo, nos termos e na forma que se estableza na resolución de concesión, da documentación que se exixa de forma expresa nela, entre a cal deberá figurar a seguinte:

a) Documentos TC2 correspondentes ás mensualidades que se indiquen na resolución de concesión, agás que xunto coa solicitude se achegasen todos os boletíns correspondentes ao período de cómputo para o cálculo do incremento do cadro de persoal fixo, ou, se é o caso, certificación da Tesouraría Xeral da Seguridade Social en que conste o número de persoas traballadoras con contrato indefinido, o de persoas traballadoras con contrato de interinidade e das demais persoas traballadoras con contratos temporais en cada unha das ditas mensualidades no conxunto dos centros de traballo da empresa en Galicia.

b) Declaración complementaria da establecida na base oitava do conxunto das axudas solicitadas, tanto aprobadas ou concedidas como pendentes de resolución para o mesmo proxecto das distintas administracións públicas competentes ou outros entes públicos, ou, de ser o caso, que non solicitou nin percibiu outras axudas e subvencións (anexo XV).

2. Non obstante o sinalado nos números anteriores, a documentación exixida na fase de pagamento poderase presentar xunto coa solicitude segundo a opción do interesado. Neste suposto poderán tramitarse conxuntamente a concesión e o pagamento da axuda.

3. Non poderá realizarse en ningún caso o pagamento da subvención se o beneficiario non figura ao día no cumprimento das súas obrigas tributarias -estatais e autonómicas-e da Seguridade Social, é debedor en virtude de resolución firme declarativa da procedencia de reintegro ou ten algunha débeda pendente, por calquera concepto, coa Administración da comunidade autónoma.

Décima.-Obrigas dos beneficiarios.
Son obrigas das empresas beneficiarias:
1. Manter no seu cadro de persoal fixo o traballador subvencionado ao abeiro deste programa durante un período mínimo de 3 anos.

No suposto de extinción da relación laboral do traballador polo cal se concedese a subvención, a cobertura do posto por un novo traballador, que deberá reunir os requisitos do traballador substituído, terá que realizarse dentro do mes seguinte ao da baixa, feito que deberá ser comunicado pola empresa beneficiaria ao órgano competente que concedese a axuda, dentro dos 20 días seguintes á substitución. Esta nova transformación do contrato temporal en indefinido en ningún caso dará lugar a unha nova axuda de fomento da contratación.

Esta obriga manterase durante 3 anos desde a data de realización do contrato indefinido obxecto de subvención. E, cando se trate de empregos ligados a un investimento, deberán manter os postos de traballo durante un período mínimo de 5 anos.

2. Manter o número de persoas traballadoras fixas do seu cadro de persoal, en cómputo anual, durante polo menos 3 anos, que se contarán desde a data de realización da transformación do contrato temporal en indefinido.

3. Manter a estrutura do cadro de persoal da empresa en Galicia cunha taxa de estabilidade igual ou superior ao 72,5%, no seu cómputo anual, durante polo menos 3 anos desde o mes en que se realice a transformación do contrato temporal en indefinido.

4. Co fin de garantir o cumprimento do anterior, as empresas beneficiarias deberán presentar nos tres meses seguintes e durante os tres anos posteriores ao de realización das transformacións dos contratos temporais en indefinidos, unha declaración da media de persoal traballador fixo e temporal no conxunto dos centros de traballo en Galicia nun período de 12 meses contados desde o mes de realización das transformacións dos contratos temporais en indefinidos, así como o TC2 correspondente ao mes en que se efectuaron estas transformacións dos contratos temporais en indefinidos.

Anexo C
Programa de axudas a empresarias e empresarios sen persoas asalariadas pola contratación da súa primeira persoa traballadora fixa.

Primeira.-Obxecto.
Este programa ten por obxecto fixar as bases reguladoras dos incentivos á contratación indefinida, a tempo completo ou a tempo parcial, incluídos os fixos-descontinuos, da primeira persoa traballadora por parte do empresariado sen asalariados, coa finalidade de impulsar a capacidade de creación de emprego das pequenas empresas e favorecer a inserción laboral de persoas desempregadas.

Segunda.-Réxime das axudas.
As axudas ás contratacións indefinidas iniciais, que reúnan as condicións e requisitos establecidos neste anexo, e fosen realizadas entre o 16 de setembro e o 31 de decembro de 2006, están amparadas na súa adecuación ao dereito comunitario pola autorización da Comisión Europea C (2002) 1884 fin de 22-5-2002. E, cando se trate de empregos ligados a un investimento, polo seu sometemento ao Regulamento (CE) nº 70/2001, da Comisión do 12 de xaneiro 2001 relativo á aplicación dos artigos 87 e 88 do Tratado CE ás axudas estatais ás pequenas e medianas empresas (DOCE L10, 13-01-2001).

As axudas ás contratacións indefinidas iniciais, que reúnan as condicións e requisitos establecidos neste anexo, e fosen realizadas no ano 2007, quedan sometidas ao réxime de axudas de minimis. Polo tanto, non poderán exceder os límites cuantitativos (200.000 euros nun período de tres anos) establecidos no Regulamento (CE) nº 1998/2006, da Comisión da Unión Europea, de 15 de decembro, relativo á aplicación dos artigos 87 e 88 do Tratado da CE ás axudas de minimis (DOCE nº L379, do 28 de decembro).

Terceira.-Ámbito de aplicación, contratacións subvencionables e definicións.
1. Poderán ser obxecto de subvención as contratacións indefinidas iniciais que se realicen con persoas traballadoras desempregadas, inscritas como demandantes de emprego no Servizo Público de Emprego no momento da súa contratación indefinida inicial e pertenzan a algún dos colectivos desfavorecidos relacionados na base 4ª deste anexo.

2. Os contratos indefinidos para que poidan ser obxecto de subvención deberán formalizarse por escrito e comunicarse á oficina pública de emprego na forma regulamentariamente establecida.

3. Cando se trate de contratacións a tempo parcial, a contía dos incentivos previstos nesta orde será proporcional ao tempo efectivo de traballo en función da xornada establecida no convenio colectivo de aplicación ou, no seu defecto, da xornada ordinaria legal.

4. Para os efectos das axudas consideradas neste anexo, terán a consideración de persoas desempregadas aquelas que estean inscritas como demandantes de emprego no Servizo Público de Emprego no momento da contratación e que, pola súa vez, carezan de ocupación segundo o informe da vida laboral da Tesouraría Xeral da Seguridade Social.

Cuarta.-Colectivos desfavorecidos.
Para os efectos deste anexo terán a consideración de colectivos desfavorecidos con maiores desvantaxes para o acceso ao mercado de traballo os seguintes:

a) Persoas desempregadas de longa duración: toda persoa que estivese sen traballo 12 dos anteriores 16 meses, ou durante 6 meses dos anteriores 8, se fose menor de 25 anos ou maior de 45 anos.

b) Titulares de familias monoparentais que teñan cargas familiares ou persoas desempregadas de unidades familiares nas que ningún dos seus membros en idade laboral obteña rendas de calquera natureza superiores ao 75% do IPREM vixente no momento da solicitude.

c) Mulleres desempregadas, cando se contraten para prestar servizos en profesións ou ocupacións en que estean subrepresentadas segundo a orde do Ministerio de Traballo e Asuntos Sociais do 16 de setembro de 1998 (BOE do 29 de setembro) para o fomento do emprego estable de mulleres nas profesións e ocupacións con menor índice de emprego feminino ou que se reincorporen ao mercado de traballo tras unha ausencia prolongada dun mínimo de dous anos, ou que sexan contratadas nos 24 meses seguintes á data do parto.

d) Mulleres maiores de 30 anos demandantes de primeiro emprego.
e) Desempregadas maiores de 30 anos que non estean incluídas en ningún dos colectivos anteriores.

f) Persoas desempregadas pertencentes a colectivos en risco de exclusión social:
1. Persoas perceptoras da renda de integración social de Galicia ou aquelas que non poidan acceder a ela, ben por falta do período exixido de residencia ou empadroamento, ou ben por ter esgotado o período máximo de percepción legalmente establecido, ou membros da súa unidade familiar en desemprego.

2. Persoas que participen ou participasen en procesos de rehabilitación ou reinserción social de drogodependentes debidamente acreditadas ou autorizadas.

3. Persoas internas de centros penitenciarios cuxa situación penitenciaria lles permita acceder a un emprego, así como persoas liberadas condicionais ou ex-reclusos e ex-reclusas que non tivesen antes un primeiro emprego fixo remunerado tras un período de privación de liberdade.

4. Mulleres procedentes de casas de acollida que presenten problemas adicionais de inserción ou reinserción laboral.

5. As persoas que teñan acreditada pola Administración competente a condición de vítima de violencia doméstica por parte dalgún membro da unidade familiar de convivencia.

6. Menores internos/as incluídos/as no ámbito de aplicación da Lei orgánica 5/2000, do 12 de xaneiro, reguladora da responsabilidade penal dos/das menores, cuxa situación lles permita acceder a un emprego, así como os/as que estean en situación de liberdade vixiada e os ex-reclusos e ex-reclusas.

7. Mozos e mozas que estean ou estivesen ata a súa maioría de idade baixo a tutela ou garda da Administración autonómica.

8. Persoas traballadoras inmigrantes que pasen a ser residentes da comunidade cuxas características condicionen a súa integración social.

9. Emigrantes retornados/as con graves necesidades persoais ou familiares.
10. Persoas que formen parte de colectivos ou minorías cuxas características poidan condicionar as súas posibilidades de integración social.

11. Mulleres que abandonasen o exercicio da prostitución e se incorporen ao mercado laboral.

Quinta.-Requisitos.
Poderán ser beneficiarios das axudas previstas nesta orde as empresas privadas, calquera que sexa a forma xurídica que adopten, que contraten con carácter indefinido a súa primeira persoa empregada para prestar servizos en centros de traballo situados na Comunidade Autónoma de Galicia, sempre que iniciasen a actividade cunha antelación mínima dun ano ao comezo da prestación de servizos pola traballadora ou traballador e que se cumpran as condicións e os requisitos establecidos neste anexo e non incorran nas circunstancias previstas no artigo 13.2º da Lei 38/2003, do 17 de novembro, xeral de subvencións.

Para estes efectos, entenderase que se trata da primeira persoa empregada cando na empresa, nos 24 meses anteriores á contratación indefinida, non prestasen servizos traballadoras e traballadores por conta allea, agás con contratos de duración determinada ou temporal que, no seu conxunto, non superen os 180 días.

Sexta.-Exclusións e contratacións de familiares.
1. Exclúense dos beneficios do programa establecido neste anexo:
a) As relacións laborais de carácter especial previstas no artigo 2.1º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores ou noutras disposicións legais, así como as contratacións de persoas traballadoras para prestasen servizos noutras empresas mediante contratos de posta á disposición.

b) Traballadores e traballadoras que finalizasen a súa relación laboral de carácter indefinido nun prazo de 3 meses previos á formalización do contrato polo que se solicita a subvención, agás que a dita relación laboral finalizase por causa dun despedimento recoñecido ou declarado improcedente ou se extinga por algunha das causas sinaladas nos artigos 51 e 52. c) do Estatuto dos traballadores.

c) Non poderán acceder a estas axudas as cooperativas e sociedades laborais pola contratación da súa primeira persoa asalariada.

2. Sempre que se reúnan os requisitos e demais condicións exixidos neste anexo e poidan ter a consideración de asalariados, os incentivos establecidos na base 7ª tamén poderán ser de aplicación ás contratacións da primeira persoa traballadora fixa que se realice co/a cónxuxe, ascendentes, descendentes e demais parentes por consanguinidade ou afinidade, ata o segundo grao inclusive. En todo caso, nestes supostos, e como condición indispensable na solicitude de axuda, deberá declararse expresamente a condición de familiar da persoa traballadora contratada e cumprir os requisitos establecidos nas bases 3ª e 4ª deste anexo.

Sétima.-Axudas.
As empresas que contraten con carácter indefinido a súa primeira persoa traballadora de acordo cos requisitos e condicións establecidos neste anexo poderán obter unha axuda, pagadoira dunha soa vez, que consistirá nunha subvención por unha contía equivalente ao importe do 30% da base mínima do grupo de cotización ao que pertenza a persoa traballadora contratada, establecida para o ano de cada convocatoria, calculada sobre tres anualidades, ata un máximo de 4.500 euros, se o contrato se realiza a xornada completa, ou a parte proporcional se se realiza a tempo parcial.

Cando a dita contratación se realice con mulleres o límite incrementarase ata 6.600 euros.

Oitava.-Prazo.
As axudas previstas neste programa solicitaranse nos dous meses seguintes á data en que se inicie a relación laboral.

O prazo para a presentación das solicitudes de axudas finalizará o 15 de setembro de 2007 aínda que nesta data non transcorresen dous meses desde a celebración do contrato obxecto de subvención.

Novena.-Documentación.
As solicitudes deberán presentarse nos modelos normalizados que figuran como anexos numéricos a esta orde, xunto coa seguinte documentación, orixinal ou copia compulsada:

1. Se o solicitante é persoa física, DNI e acreditación do NIF e, se é persoa xurídica, DNI e poder suficiente da persoa representante para actuar en nome da entidade e NIF da empresa.

2. Alta no imposto de actividades económicas ou alta no censo de obrigados tributarios do Ministerio de Economía e Facenda, e documentación que acredite que se trata da creación do primeiro posto de traballo de carácter fixo (vida laboral da empresa referida aos 24 meses anteriores á data da contratación indefinida da persoa traballadora pola que solicita a subvención, incluíndo todas as contas de cotización).

3. Copia simple do DNI da traballadora ou traballador.
4. Documentos acreditativos das características que determinen a súa pertenza ao correspondente colectivo.

5. Documentos acreditativos dos períodos de inscrición como demandante de emprego na oficina pública de emprego e do tempo de permanencia no paro segundo os datos do informe da vida laboral na Tesouraría Xeral da Seguridade Social, así como contrato de traballo e a alta na Seguridade Social da persoa traballadora contratada.

6. Declaración comprensiva do conxunto de todas as solicitudes efectuadas ou concedidas, para o mesmo proxecto ou actividade, polas administracións públicas competentes ou outros entes públicos, ou de ser o caso, unha declaración de que non solicitou nin percibiu outras axudas ou subvencións (anexo XV).

7. Declaración da estrutura da empresa e do emprego (anexo XVI).
8. Ficha de transferencia bancaria e certificación da entidade financeira acreditativa de que o solicitante é titular da conta (anexo XVII).

9. Documentación acreditativa de que se encontraren ao día das súas obrigas tributarias -estatais e autonómicas-e coa Seguridade Social e de que non teñen pendente de pagamento ningunha outra débeda coa Administración da comunidade autónoma, unicamente no suposto de que o solicitante denegase expresamente a autorización ao órgano xestor para solicitar as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

Décima.-Xustificación do pagamento.
1. De non achegarse con anterioridade, o pagamento das axudas ou subvencións quedará condicionado á presentación, no prazo, nos termos e na forma que se establezan na resolución de concesión, da documentación que se exixa de forma expresa nela, entre a que deberá figurar a seguinte:

a) Documento TC2 correspondente á mensualidade de contratación.
b) Declaración complementaria da establecida na base novena deste anexo, do conxunto das axudas solicitadas, tanto as aprobadas ou concedidas como as pendentes de resolución para o mesmo proxecto das distintas administracións públicas competentes ou outros entes públicos, ou de ser o caso, que non solicitou nin percibiu outras axudas ou subvencións (anexo XV).

2. Non obstante o sinalado no punto anterior, a documentación exixida para a fase de pagamento poderase presentar xunto coa solicitude, a opción do interesado. Neste suposto poderán tramitarse conxuntamente a concesión e o pagamento da axuda.

3. Non poderá realizarse en ningún caso o pagamento da subvención se o beneficiario non figura ao corrente do cumprimento das súas obrigas tributarias estatais ou autonómicas e da Seguridade Social, é debedor en virtude de resolución firme declarativa de procedencia de reintegro ou ten algunha débeda pendente, por calquera concepto coa Administración da comunidade autónoma.

Décimo primeira.-Obrigas dos beneficiarios.
Son obrigas dos beneficiarios das axudas e subvencións previstas neste anexo:
1. Manter no seu cadro de persoal fixo as persoas traballadoras contratadas ao abeiro deste programa, por un período mínimo de tres anos.

No suposto de extinción da relación laboral do traballador ou traballadora por quen se concedese a subvención, a cobertura do posto por unha nova persoa traballadora, que deberá reunir os requisitos da persoa traballadora substituída, terá que realizarse dentro do mes seguinte ao da baixa, feito que deberá ser comunicado pola empresa beneficiaria ao órgano competente que concedese a axuda, dentro dos 20 días seguintes á substitución. Esta nova contratación en ningún caso dará lugar a unha nova axuda.

Esta obriga manterase durante tres anos desde a data de realización do contrato indefinido obxecto de subvención. E, cando se trate de emprego ligado a un investimento, deberán manter o posto de traballo durante un período mínimo de 5 anos.

2. As empresas beneficiarias, co fin de garantir o mantemento do posto de traballo estable creado obxecto de subvención, deberán presentar, dentro do primeiro trimestre de cada ano, unha declaración do mantemento do emprego xunto co TC2 do mes de decembro do ano anterior.

Esta obriga manterase durante os tres anos seguintes a aquel en que se concedeu a axuda ou subvención.

Anexo D
Programa de fomento da contratación indefinida inicial vinculada a proxectos I+D.

Primeira.-Obxecto.
1. Este programa ten por obxecto favorecer a inserción laboral con carácter estable das mozas e mozos titulados mediante incentivos á contratación indefinida vinculada a proxectos I+D.

2. Poderán ser obxecto de subvención os contratos indefinidos iniciais a tempo completo ou a tempo parcial, incluídos os fixos descontinuos, que se realicen con mozos e mozas con titulación universitaria ou de formación profesional de segundo grao ou de ciclo superior, persoas desempregadas inscritas no Servizo Público de Emprego no momento da contratación, sempre que concorra algunha das seguintes circunstancias:

a) Que participasen en programas de fomento da investigación e desenvolvemento tecnolóxico en universidades ou centros de investigación públicos ou privados e se lles asignen tarefas acordes coa súa preparación e titulación.

b) Que se incorporen a un departamento de actividades innovadoras ou, no caso de que este non exista, se lles asignen tarefas que favorezan a innovación tecnolóxica ou técnica da empresa.

c) Que se incorporen a proxectos empresariais de investigación e innovación acollidos ao Plan Galego de Investigación e Desenvolvemento Tecnolóxico ou a empresas que participen ou participasen no programa IDIPEME.

d) Que se incorporen a empresas de menos de 50 traballadoras e traballadores para a realización de tarefas relacionadas coa introdución de novas tecnoloxías da información e as comunicacións.

3. Os contratos de traballo deberán formalizarse por escrito e comunicarse á oficina pública de emprego na forma regulamentariamente establecida.

4. Para os efectos do cálculo da taxa de estabilidade e do incremento do persoal fixo na empresa, ao persoal contratado con contratos de interinidade consideraráselle a mesma condición de fixo ou temporal que a persoa que substitúe. Se o traballador con contrato de interinidade substitúe un traballador con obriga de cotización, e que consta no TC2, o interino non se computa.

Segunda.-Réxime das axudas.
Os incentivos establecidos neste anexo quedan sometidos ao réxime de axudas de minimis, polo tanto non poderán exceder os límites cuantitativos (200.000 euros nun período de tres anos) establecidos no Regulamento (CE) nº 1998/2006, da Comisión da Unión Europea, de 15 de decembro, relativo á aplicación dos artigos 87 e 88 do Tratado da CE ás axudas de minimis (DOCE nº L379, do 28 de decembro).

Terceira.-Requisitos.
Para poder acceder aos beneficios á contratación indefinida establecidos neste anexo deberán cumprirse as seguintes condicións e requisitos:

a) A taxa de estabilidade do cadro de persoal da empresa no mes de contratación polo que se solicita subvención deberá ser igual ou superior ao 72.5%.

Para os efectos do anterior entenderase por taxa de estabilidade a porcentaxe de persoas traballadoras fixas sobre o total do cadro de persoal no conxunto dos centros de traballo da empresa en Galicia.

b) Como consecuencia da contratación indefinida inicial que se fomenta ten que incrementarse o cadro de persoal fixo da empresa no ámbito territorial de Galicia, de modo que supere a media aritmética dos doce meses anteriores á data de inicio da prestación laboral, serán unicamente subvencionables as contratacións que superen esta media.

Para os efectos do cómputo do incremento do cadro de persoal fixo non se terán en conta as baixas das traballadoras e dos traballadores que se producisen pola súa propia vontade, ou por morte, xubilación, incapacidade permanente total ou absoluta ou grande invalidez legalmente recoñecidas.

c) Como consecuencia da contratación indefinida que se fomenta ten que incrementarse o cadro global de persoal da empresa no ámbito territorial de Galicia, de modo que supere a media aritmética dos doce meses anteriores á data de inicio da prestación laboral ou, se é o caso, na referencia que se estableza en plans de emprego pactados coa representación legal das traballadoras e dos traballadores no ámbito da empresa.

Cuarta.-Axudas.
1. As contratacións indefinidas a xornada completa vinculadas a proxectos I+D previstas neste anexo incentivaranse cunha axuda de ata 3.000 euros, incrementándose a unha contía de ata 5.000 euros cando se realicen con mulleres tituladas.

2. Cando a persoa traballadora contratada posúa o título universitario de doutor/a os incentivos previstos no número anterior incrementaranse nunha contía de ata 600 euros se son homes, e de ata 1.000 euros cando se trate de mulleres.

3. Nas contratacións a tempo parcial a contía dos incentivos será proporcional ao tempo efectivo de traballo en función da xornada a tempo completo establecida no convenio colectivo de aplicación ou, no seu defecto, da xornada ordinaria máxima legal.

Quinta.-Exclusións.
Exclúense dos beneficios establecidos no programa deste anexo:
a) As relacións laborais de carácter especial previstas no artigo 2.1º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, ou noutras disposicións legais, así como as contratacións de traballadores e traballadoras para prestar servizos noutras empresas mediante contratos de posta á disposición.

b) Os contratos realizados co/a cónxuxe, ascendentes, descendentes e demais parentes, por consanguinidade ou afinidade, ata o segundo grao inclusive, da empresaria ou empresario ou de quen desempeñe cargos de dirección ou sexan membros dos órganos de administración das empresas que revistan a forma xurídica de sociedade, así como os que se produzan con estes últimos.

c) Contratacións realizadas con traballadoras e traballadores que, nos 24 meses anteriores á data da contratación, prestasen servizos na mesma empresa ou grupo de empresas mediante un contrato por tempo indefinido.

O disposto no parágrafo precedente será tamén de aplicación no suposto de vinculación laboral anterior do traballador con empresas ás que o solicitante dos beneficios sucedese en virtude do establecido no artigo 44 do Real decreto lexislativo 1/1995, do 24 de marzo.

d) Traballadoras e traballadores que finalizasen a súa relación laboral de carácter indefinido nun prazo de 3 meses previos á formalización do contrato polo que se solicita a subvención, agás que a dita relación laboral finalizase por causa dun despedimento recoñecido ou declarado improcedente ou se extinga por algunha das causas sinaladas nos artigos 51 e 52 c) do Estatuto dos traballadores.

Sexta.-Prazo.
As axudas previstas neste programa solicitaranse nos dous meses seguintes á data en que se inicie a relación laboral.

O prazo para a presentación das solicitudes de axudas finalizará o 15 de setembro de 2007, aínda que nesta data non transcorresen dous meses desde a celebración do contrato obxecto de subvención.

Sétima.-Documentación
As solicitudes deberán presentarse nos modelos normalizados que figuran como anexos numéricos á presente orde, xunto coa seguinte documentación, orixinal ou copia compulsada:

1. Se o solicitante é persoa física, DNI e acreditación do NIF, e se é persoa xurídica DNI e poder suficiente da persoa representante para actuar en nome da entidade e NIF da empresa.

2. Relación nominal das persoas traballadoras polas que se solicita subvención, con indicación dos supostos e tipo de incentivo que se solicita (anexo XIV-D).

3. Certificado acreditativo da titulación e da data de terminación dos estudos, e se é o caso, título universitario de doutora ou doutor, así como copia simple do DNI de cada persoa traballadora contratada.

4. Documentos acreditativos dos períodos de inscrición como demandante de emprego na oficina pública de emprego, así como do tempo de permanencia no paro segundo os datos do informe de vida laboral na Tesouraría Xeral da Seguridade Social, contrato de traballo e alta na Seguridade Social, de cada traballador contratado.

5. Cando se trate de contratos vinculados a proxectos I+D, deberá xuntarse unha memoria na que se recolla unha definición precisa do posto de traballo que considere as tarefas que vai desenvolver o traballador ou traballadora, e unha breve descrición das actividades empresariais innovadoras máis relevantes que vai desenvolver o equipo ou departamento da empresa en que se integrará a traballadora ou traballador, ou das tecnoloxías da información e as comunicacións introducidas nas empresas de menos de 50 traballadores e traballadoras e, se é o caso, documentación acreditativa da participación da persoa traballadora contratada en programas de investigación. No suposto de que se trate da incorporación a proxectos empresariais de investigación e innovación acollidos ao Plan Galego de Investigación e Desenvolvemento Tecnolóxico ou a empresas que participen ou participasen no programa IDIPEME, deberá achegarse, ademais, informe favorable da Dirección Xeral de Investigación, Desenvolvemento e Innovación.

6. Declaración do cadro de persoal de todos os centros de traballo da empresa en Galicia en cada un dos doce meses anteriores ao inicio da relación laboral da persoa traballadora contratada, así como da taxa de estabilidade no mes da contratación (anexo XIII-D).

Se é o caso, documentos acreditativos das baixas producidas polas causas previstas na base terceira.

7. Declaración comprensiva do conxunto de todas as solicitudes efectuadas, ou concedidas, para o mesmo proxecto ou actividade, perante as administracións públicas competentes ou outros entes públicos, ou, de ser o caso, unha declaración de que non solicitou nin percibiu outras axudas ou subvencións (anexo XV).

8. Ficha de solicitude de transferencia bancaria e certificación da entidade bancaria acreditativa de que o solicitante é titular da conta (anexo XVII).

9. Documentación acreditativa de que se encontraren ao día das súas obrigas tributarias -estatais e autonómicas-e coa Seguridade Social e de que non teñen pendente de pagamento ningunha outra débeda coa Administración da comunidade autónoma, unicamente no suposto de que o solicitante denegase expresamente a autorización ao órgano xestor para solicitar as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

Oitava.-Xustificación do pagamento.
1. De non achegarse con anterioridade, o pagamento das axudas ou subvencións quedará condicionado á presentación, no prazo, nos termos e na forma que se estableza na resolución de concesión, da documentación que se exixa de forma expresa nela, entre a que deberá figurar a seguinte:

a) Documentos TC2 correspondentes ás mensualidades que se indiquen na resolución, agás que xunto coa solicitude, se achegasen todos os boletíns correspondentes ao período de cómputo para o cálculo do incremento do cadro de persoal ou, se é o caso, certificación da Tesouraría Xeral da Seguridade Social en que conste o número de persoas traballadoras con contrato indefinido e o das persoas traballadoras con contratos de interinidade, en cada unha das ditas mensualidades no conxunto dos centros de traballo da empresa en Galicia.

b) Declaración complementaria da establecida na base sétima deste anexo, do conxunto das axudas solicitadas, tanto as aprobadas ou concedidas como das pendentes de resolución para o mesmo proxecto das distintas administracións públicas competentes ou outros entes públicos, ou de ser o caso, que non solicitou nin percibiu outras axudas ou subvencións (anexo XV).

2. Malia o sinalado no punto anterior, a documentación exixida na fase de pagamento poderase presentar xunto coa solicitude segundo a opción do interesado. Neste suposto, poderá tramitarse conxuntamente a fase de concesión e o pagamento das axudas.

3. Non poderá realizarse en ningún caso o pagamento da subvención se o beneficiario non figura ao día do cumprimento das súas obrigas tributarias -estatais e autonómicas-e da Seguridade Social, é debedor en virtude de resolución firme declarativa da procedencia de reintegro ou ten algunha débeda pendente, por calquera concepto, coa Administración da comunidade autónoma.

Novena.-Obrigas dos beneficiarios.
Son obrigas dos beneficiarios das axudas e subvencións:
1. Manter o número de persoas traballadoras fixas do seu cadro de persoal, en cómputo anual, durante polo menos 3 anos, que se contarán desde a data de realización do contrato indefinido.

2. As empresas beneficiarias deberán manter no seu cadro de persoal fixo as persoas traballadoras contratadas durante un período mínimo de tres anos.

No suposto de extinción da relación laboral da traballadora ou traballador por quen se concedese a subvención, a cobertura do posto por unha nova persoa traballadora, que deberá reunir os mesmos requisitos que a persoa traballadora substituída, terá que realizarse dentro do mes seguinte ao da baixa, feito que deberá ser comunicado pola empresa beneficiaria ao órgano competente que concedese a axuda, dentro dos 20 días seguintes á substitución. Esta nova contratación en ningún caso dará lugar a unha nova axuda.

Esta obriga manterase durante tres anos desde a data de realización do contrato indefinido obxecto de subvención.

3. Manter a estrutura do cadro de persoal da empresa en Galicia cunha taxa de estabilidade igual ou superior ao 72,5% no seu cómputo anual, durante polo menos 3 anos desde o mes en que se realice a contratación subvencionada.

4. Co fin de garantir o cumprimento do anterior, as empresas beneficiarias deberán presentar nos tres meses seguintes e durante os tres anos posteriores ao de realización das contratacións, unha declaración da media de persoal traballador fixo e temporal no conxunto dos centros de traballo en Galicia nun período de 12 meses contados desde o mes de realización das contratacións, así como o TC2 correspondente ao mes no que se efectuaron as ditas contratacións.

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es