Diario Oficial de Galicia
martes, 5 de xuño de 2007
III. OUTRAS DISPOSICIÓNS
Número do Dog:
107
Páxina do Dog:
9.392
Data da Disposición:
22 de maio de 2007
Sección:
III. OUTRAS DISPOSICIÓNS
Organismo:
VICEPRESIDENCIA DA IGUALDADE E DO BENESTAR
Rango:
Orde
Título:
Orde do 22 de maio de 2007 pola que se convocan axudas económicas destinadas a subvencionar gastos de mantemento e funcionamento das asociacións e federacións de mulleres de Galicia.
Orde do 22 de maio de 2007 pola que se convocan axudas económicas destinadas a subvencionar gastos de mantemento e funcionamento das asociacións e federacións de mulleres de Galicia.
A Vicepresidencia da Igualdade e do Benestar é o departamento da Administración autonómica ao que lle corresponde o exercicio, como propias, das competencias e funcións en materia de igualdade de xénero, tal e como se establece no artigo 1 do Decreto 517/2005, do 6 de outubro, polo que se establece a estrutura orgánica da Vicepresidencia da Igualdade e do Benestar.
A Secretaría Xeral da Igualdade, tal e como se establece no artigo 5 do dito decreto, é o órgano ao que lle corresponden, entre outras, as funcións relativas ás políticas da Xunta de Galicia en materia de xénero, de loita contra a discriminación por razón de sexo e de promoción da igualdade entre mulleres e homes. Polo tanto, unha das súas finalidades é promover as condicións para que a igualdade entre mulleres e homes sexa real e efectiva, fomentando a participación das mulleres na vida social, superando calquera tipo de discriminación.
A Vicepresidencia da Igualdade e do Benestar, a través da Secretaría Xeral da Igualdade, considera necesario contribuír a estimular e, ao mesmo tempo, a dinamizar a vida interna das asociacións de mulleres, na procura da potenciación dos valores e finalidades destas entidades, de xeito que pon en marcha unha liña de axudas económicas dirixidas ás asociacións de mulleres e ás súas federacións.
Esta convocatoria tramítase de acordo co disposto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, modificado pola Lei 14/2004, do 29 de decembro, de medidas tributarias e de réxime administrativo, no Decreto 287/2000, do 21 de novembro, que o desenvolve e, en concreto, no relativo aos principios de obxectividade, concorrencia e publicidade na concesión de axudas e subvencións e no establecido na Lei 14/2006, de orzamentos xerais da Comunidade Autónoma de Galicia para o ano 2007, así como ás disposicións aplicables da Lei 38/2003, do 17 de novembro, xeral de subvencións.
Na súa virtude e no uso das atribucións que me foron conferidas,
DISPOÑO:
Artigo 1º.-Obxecto.
Esta orde ten por obxecto a convocatoria, en réxime de concorrencia competitiva, de axudas económicas en favor das asociacións de mulleres e federacións constituídas por estas, con destino a gastos correntes de mantemento e de funcionamento durante o ano 2007.
Artigo 2º.-Entidades beneficiarias.
1. As axudas poderán ser solicitadas polas asociacións de mulleres e polas federacións constituídas por estas, sen ánimo de lucro, legalmente constituídas e inscritas no Rexistro de Entidades Prestadoras de Servizos Sociais da Vicepresidencia da Igualdade e do Benestar, na área de actuación de muller, e domiciliadas na Comunidade Autónoma de Galicia.
2. Non se considerarán as solicitudes das entidades que non estean inscritas e coa totalidade dos seus datos actualizados na data en que remate o prazo de presentación de solicitudes.
3. As asociacións de mulleres deberán contar como mínimo con 50 mulleres socias, e as mulleres socias representarán, polo menos, o 90% da totalidade de persoas asociadas.
4. No caso das federacións, as asociacións de mulleres que as integren deberán cumprir o requisito establecido no punto anterior.
5. Os fins e obxectivos das asociacións e das federacións solicitantes deberán contribuír a:
a) Promover a igualdade de oportunidades entre homes e mulleres.
b) Promover a participación e a presenza das mulleres na vida política, económica, cultural e social.
Artigo 3º.-Orzamento.
A Vicepresidencia da Igualdade e do Benestar financiará as axudas obxecto desta convocatoria por un importe total máximo de 240.000 euros e con cargo ás seguintes partidas orzamentarias: 05.20.313B.480.0, cunha contía de 165.000 euros e 05.20.313D.481.0 cunha contía de 75.000 euros, correspondentes aos orzamentos xerais da Comunidade Autónoma de Galicia para o ano 2007.
As axudas económicas que se outorguen ao abeiro desta orde poderá alcanzar como máximo o 90% do total do orzamento presentado.
Artigo 4º.-Incompatibilidade de axudas e subvencións.
As axudas económicas que se concedan ao abeiro desta orde serán incompatibles con outras subvencións, axudas, ingresos ou recursos para a mesma finalidade, procedentes de calquera Administración pública.
Artigo 5º.-Conceptos subvencionables.
1. As axudas reguladas nesta orde teñen como finalidade fortalecer e consolidar o movemento asociativo de mulleres, por ser elemento indispensable na promoción da igualdade de oportunidades, establecendo unha liña de apoio ao seu mantemento e funcionamento. Por este motivo, concederanse axudas económicas para compensar os gastos que orixinen o mantemento ou funcionamento destas entidades no exercicio 2007.
2. O mantemento inclúe o financiamento dos gastos correntes en bens e servizos derivados do local onde estea situada a sede social da entidade, obras de conservación e mantemento e pequenas reparacións que non teñan o carácter de inventariables, por non implicar incremento do valor patrimonial do dito inmoble, así como subministracións, material funxible de oficina e ofimáticos, correo e outros análogos.
3. O funcionamento ten como obxectivo facilitar o desenvolvemento das actividades propias e habituais da entidade, incluíndo os gastos derivados do seu persoal.
4. Todos os gastos serán correntes, polo tanto, as entidades beneficiarias non poderán imputar gastos de investimento para a xustificación da axuda concedida.
5. En ningún caso serán subvencionables os gastos correntes derivados do desenvolvemento de actividades ou programas da entidade solicitante.
Artigo 6º.-Solicitudes, documentación e prazo.
1. As entidades que desexen solicitar as axudas reguladas nesta orde, deberán dirixir a súa solicitude ao vicepresidente da Igualdade e do Benestar, segundo o modelo que se achega como anexo I desta orde.
2. Xunto coa solicitude, que figura como anexo I desta orde, deberá achegarse a seguinte documentación:
a) Fotocopia da tarxeta de identificación fiscal da entidade.
b) Fotocopia do DNI da persoa representante legal que asina a solicitude.
c) Certificación expedida pola secretaría da entidade, acreditativa da identidade da súa representación legal, conforme o modelo que figura como anexo II desta orde.
d) Memoria explicativa segundo o anexo III desta orde.
e) Certificación do acordo asembleario en que se aproba participar nesta convocatoria de axudas e do nomeamento da persoa representante para as súas relacións coa Vicepresidencia da Igualdade e do Benestar.
f) Declaración de non estar incursa en causas de incompatibilidade ou incapacidade para contratar e percibir axudas ou subvencións da Administración pública e de aceptación das bases da convocatoria (anexo IV).
g) Declaración de non ter solicitado nin concedida axudas ou subvencións, coa mesma finalidade, perante as administracións públicas (anexo IV).
h) Para o caso das federacións de asociacións de mulleres, achegarase certificación da secretaría da federación en que conste a relación nominal de asociacións que a compoñen, así como o número de asociadas de cada unha das asociacións.
A inscrición da entidade no rexistro de entidades será verificada de oficio por parte dos correspondentes servizos da Vicepresidencia da Igualdade e do Benestar.
3. As solicitudes xunto coa documentación requirida deberán presentarse no rexistro da Vicepresidencia da Igualdade e do Benestar, mediante instancia normalizada debidamente cuberta, ben directamente ou ben a través de calquera dos medios previstos no artigo 38.4º da Lei 30/1992, de réxime xurídico das administracións públicas e do procedemento administrativo común.
4. O prazo de presentación de solicitudes será de 30 días naturais, contados a partir do día seguinte ao da publicación desta orde no Diario Oficial de Galicia.
5. O defecto na solicitude seralles notificado ás entidades solicitantes pola Secretaría Xeral da Igualdade da Vicepresidencia da Igualdade e do Benestar e daráselles un prazo de dez días para emendar os erros ou omisións. Transcorrido o dito prazo, se non se produce a dita emenda, as peticións serán arquivadas conforme o disposto na Lei 30/1992, do 26 de novembro, de réxime xurídico das administracións públicas e do procedemento administrativo común.
Artigo 7º.-Tramitación e resolución.
1. Conforme o establecido no artigo 9 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, crearase unha comisión de avaliación para o efecto que estará presidida pola secretaria xeral da Igualdade ou a persoa en quen delegue, e da que formarán parte ademais: a subdirectora xeral de Promoción da Igualdade, a subdirectora xeral para o Tratamento da Violencia de Xénero, un/unha funcionario/a da Subdirección Xeral de Promoción da Igualdade, que actuará como secretario/a, e un/unha funcionario/a da Subdirección Xeral para o Tratamento da Violencia de Xénero.
2. A comisión de avaliación, motivadamente, poderá requirir das solicitantes das axudas información ou documentación adicional, que non estando en poder da Administración, teña fundamental relevancia e unha relación directa para unha mellor avaliación das solicitudes.
3. Á vista das valoracións efectuadas pola comisión de avaliación e recollidas na acta da reunión, a secretaria xeral da Igualdade elevará a proposta de resolución ao vicepresidente da Igualdade e do Benestar, quen resolverá.
4. O prazo máximo para resolver será de seis meses, computados desde o día seguinte ao da publicación desta orde no Diario Oficial de Galicia. Transcorrido este prazo sen que recaese resolución expresa, entenderase desestimada.
Artigo 8º.-Réxime de recursos.
As resolucións expresas ou presuntas dos expedientes tramitados ao abeiro do disposto nesta orde esgotarán a vía administrativa e contra elas caberá interpoñer directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da súa notificación, se é expresa, ou de seis meses contados a partir do día seguinte a aquel en que se produza o acto presunto.
Potestativamente, e con anterioridade á interposición do citado recurso contencioso-administrativo, poderase interpor recurso de reposición perante o mesmo órgano que ditou o acto administrativo, na forma e prazos establecidos na Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, sen prexuízo da interposición de calquera outro recurso que se considere oportuno para a defensa dos dereitos e intereses das entidades solicitantes e outros posibles interesados.
Artigo 9º.-Criterios de avaliación.
Na valoración das solicitudes presentadas polas entidades peticionarias teranse en conta os seguintes aspectos, e de acordo coas porcentaxes sinaladas de seguido:
-Número de mulleres asociadas (20%).
-Número de asociacións de mulleres federadas que integran a federación, así como o seu ámbito de actuación e número total de persoas asociadas (20%).
-Número e características das actividades realizadas pola entidade peticionaria nos últimos tres anos, priorizándose as actividades que de xeito habitual ou periódico se dirixan a mulleres que sofren violencia de xénero (20%).
-Adecuación das actividades programadas ás políticas de igualdade (20%).
-Carencia de medios económicos e imposibilidade ou probada dificultade de obter canles de financiamento por outros medios (20%).
Artigo 10º.-Aceptación da axuda.
A persoa representante da entidade beneficiaria disporá dun prazo de dez días, contados a partir da recepción da resolución, para comunicar por escrito a súa aceptación. Transcorrido este prazo sen que se comunique a dita aceptación, entenderase que renuncia á axuda e procederase, logo de resolución, ao arquivo do expediente.
Artigo 11º.-Obrigas das entidades beneficiarias.
Son obrigas das entidades beneficiarias das axudas reguladas nesta orde:
a) Someterse ás actuacións de comprobación que efectuará a entidade concedente, ás de control financeiro que correspondan á Intervención Xeral da Comunidade Autónoma de Galicia, así como ás previstas na lexislación do Tribunal de Contas e do Consello de Contas no exercicio das súas funcións de fiscalización e control do destino destas axudas.
b) Comunicar toda alteración das condicións tidas en conta para a concesión da subvención.
c) Dispoñer de libros contables, rexistros dilixenciados e demais documentos debidamente auditados nos termos exixidos pola lexislación mercantil e sectorial aplicable á entidade beneficiaria en cada caso, así como os estados contables e rexistros específicos, coa finalidade de garantir o axeitado exercicio das facultades de comprobación e control.
d) Conservar os documentos xustificativos da aplicación dos fondos recibidos, incluídos os documentos electrónicos, en canto poidan ser obxecto das actuacións de comprobación e control.
e) Reintegrar o importe da subvención percibida nos supostos recollidos no artigo 14º desta orde.
f) Cumprir coas obrigas de colaboración a que se refire o artigo 46 da Lei 38/2003, do 17 de novembro, xeral de subvencións.
Artigo 12º.-Libramento de fondos.
1. As entidades destinatarias das axudas, unha vez aceptada esta, quedarán obrigadas a destinar os fondos percibidos á finalidade concreta para a que foron concedidos. A Secretaría Xeral da Igualdade poderá comprobar, cando o considere conveniente, o cumprimento da finalidade da axuda.
2. Para o cobramento da axuda as entidades presentarán a seguinte documentación:
a) Para a xustificación dos gastos correntes e de funcionamento presentaranse as facturas pagadas ou documentos de valor probatorio equivalente dos gastos realizados. Estes documentos deberán cumprir os requisitos establecidos no Real decreto 1496/2003, do 28 de novembro, polo que se aproba o Regulamento que regula as obrigas de facturación e se modifica o Regulamento do imposto sobre o valor engadido. No caso de non presentarse os orixinais dos documentos xustificativos, estes deberán ser selados pola Secretaría Xeral da Igualdade conforme os gastos que neses documentos se comprenden son obxecto da subvención por esta orde.
b) Certificación dos gastos realizados expedida pola secretaría da entidade co visto e prace da súa presidencia.
c) No caso de gastos de persoal, achegaranse como xustificante, tanto as nóminas acreditativas do pagamento, como os documentos xustificativos de ingreso dos seguros sociais.
d) Declaración complementaria do conxunto das axudas solicitadas, tanto as aprobadas ou concedidas, como as pendentes de resolución, para a mesma finalidade que establece esta orde das distintas administracións públicas competentes ou de calquera dos seus organismos, entes ou sociedades.
3. O prazo de remisión destes xustificantes remata o 30 de novembro de 2007.
4. A Secretaría Xeral da Igualdade, de atopar conforme a documentación xustificativa, proporá o libramento de fondos, que en ningún caso superará o 90% do importe dos xustificantes presentados.
5. A entidade beneficiaria ten a obriga de facilitar toda a información que lle sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das funcións de fiscalización e control do destino das axudas.
6. As cantidades que resultasen sobrantes por causa de renuncia ou non presentación das xustificacións correspondentes por parte das entidades beneficiarias poderán dedicarse a subvencionar outras entidades que presentaron solicitude de subvención ao abeiro desta orde.
Transcorrido o prazo establecido neste artigo sen ter presentadas as correspondentes xustificacións poderase entender que a entidade renuncia á axuda, podendo ser utilizado o crédito en beneficio doutras posibles entidades beneficiarias.
Artigo 13º.-Modificación das resolucións de concesión das axudas.
Toda alteración das condicións tidas en conta para a concesión da axuda ou, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión, tal e como se establece no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.
Artigo 14º.-Reintegro da axuda ou subvención.
Procederá o reintegro, total ou parcial, da subvención ou da axuda pública percibida e dos xuros de mora devengados desde o momento do seu pagamento ata a data en que se acorde a procedencia do reintegro nos seguintes casos:
a) Incumprimento da obriga de xustificación ou xustificación insuficiente nos termos establecidos no artigo 30 da Lei 38/2003, do 17 de novembro, xeral de subvencións, e, se é o caso, nas normas reguladoras da subvención.
b) Obtención da subvención sen reunir os requisitos exixidos para a súa concesión con falsificación das condicións requiridas para isto ou ocultación daquelas que o impedisen.
c) Incumprimento total ou parcial do obxectivo, da actividade, do proxecto ou non-adopción do comportamento que fundamentou a concesión da subvención.
d) Incumprimento das condicións impostas ás entidades colaboradoras e ás persoas beneficiarias con motivo da concesión da subvención ou da axuda pública, así como dos compromisos por estes asumidos, sempre que afecten ou se refiran ao modo en que deben acadarse os obxectivos, realizar a actividade, executar o proxecto ou adoptar o comportamento que fundamente a concesión da subvención, ou daqueles distintos dos anteriores, cando disto derive a imposibilidade de verificar o emprego dado aos fondos percibidos, o cumprimento do obxectivo, a realidade e a regularidade das actividades subvencionadas ou a concorrencia de subvencións, axudas, ingresos ou recursos para a mesma finalidade procedentes de calquera administración ou ente público ou privado, nacionais, da Unión Europea ou de organismos internacionais.
e) Incumprimento da obriga de adoptar as medidas de difusión contidas no punto 8º do artigo 78 do texto refundido da Lei de réxime financeiro e orzamentario de Galicia, segundo a redacción dada pola Lei 14/2004, do 29 de decembro, de medidas tributarias e de réxime administrativo.
f) Resistencia, escusa, obstrución ou negativa ás actuacións de comprobación e control financeiro previstas nos puntos 4º e 6º do artigo 78 do texto refundido da Lei de réxime financeiro e orzamentario de Galicia, segundo a redacción dada pola Lei 14/2004, do 29 de decembro, de medidas tributarias e de réxime administrativo, así como o incumprimento das obrigas contables, rexistrais ou de conservación de documentos, cando disto derive a imposibilidade de verificar o emprego dado aos fondos percibidos, o incumprimento do obxectivo, a realidade e regularidade das actividades subvencionadas ou a concorrencia de subvencións, axudas, ingresos ou recursos para a mesma finalidade procedente de calquera administración ou ente público ou privado, nacionais, da Unión Europea ou de organismos internacionais.
g) A adopción, en virtude do establecido nos artigos 87 ao 89 do Tratado da Unión Europea, dunha decisión da cal derive unha necesidade de reintegro.
h) Nos demais supostos previstos na normativa reguladora da subvención.
Artigo 15º.-Fiscalización e control.
1. A concesión das axudas reguladas nesta orde estará sometida ao exercicio da función interventora e de control financeiro por parte da Intervención Xeral da comunidade autónoma nos termos que establece o capítulo V do Decreto 287/2000, do 21 de novembro, das actuacións de comprobación previstas na lexislación do Tribunal de Contas e do Consello de Contas.
2. A Vicepresidencia da Igualdade e do Benestar poderá inspeccionar en calquera momento as actuacións realizadas.
Artigo 16º.-Réxime sancionador.
As infraccións administrativas cometidas en relacións coas axudas e subvencións reguladas nesta orde sancionaranse de conformidade co disposto no artigo 79 do texto refundido da Lei de réxime financeiro e orzamentario de Galicia, modificado parcialmente pola Lei 14/2004, do 29 de decembro, e no capítulo VII do Decreto 287/2000, do 21 de novembro.
Disposicións adicionais
Primeira.-En todo o non previsto nesta orde, rexerá a normativa xeral en materia de subvencións contida na Lei 38/2003, do 17 de novembro, xeral de subvencións, así como no artigo 78 do texto refundido da Lei de réxime financeiro e orzamentario de Galicia aprobada polo Decreto lexislativo 1/1999, do 7 de outubro, na súa redacción dada polo artigo 12 da Lei 14/2004, do 29 de decembro, de medidas tributarias e de réxime administrativo ademais do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, no que non resulte derrogado pola normativa anteriormente citada.
Segunda.-De conformidade co establecido no artigo 13.4º da Lei 4/2006, do 30 de xuño, de transparencia e boas prácticas na Administración pública galega, a Vicepresidencia da Igualdade e do Benestar publicará na súa páxina web oficial a relación das entidades beneficiarias e o importe das axudas concedidas, polo que a presentación da solicitude leva implícita a autorización para o tratamento necesario dos datos das entidades beneficiarias e da súa publicación na páxina web.
Terceira.-De acordo coa disposición adicional primeira do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia, a entidade solicitante consentirá expresamente a inclusión e publicidade dos datos relevantes referidos ás axudas e subvencións recibidas, así como as sancións impostas, de ser o caso, no rexistro público de axudas, subvencións, convenios e sancións.
Disposicións derradeiras
Primeira.-Facúltase a secretaria xeral da Igualdade para ditar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de maio de 2007.
Anxo Manuel Quintana González
Vicepresidente da Igualdade e do Benestar
![[Páx. Anterior]](14h_archivos/f_izqda.gif)
![[Sumario D.O.G.]](14h_archivos/f_arriba.gif)
![[Páx. Seguinte]](14h_archivos/f_dercha.gif)
© Xunta de Galicia
Información mantida pola Xunta de
Galicia
Servizo prestado pola Consellería de Presidencia, AA.PP. e
Xustiza
Correo electrónico: webdoga
xunta.es