Sumario del Diario Oficial de Galicia

Diario Oficial de Galicia

mércores, 7 de marzo de 2007

III. OUTRAS DISPOSICIÓNS

Número do Dog:

Páxina do Dog:

3.517

Data da Disposición:

27 de febreiro de 2007

Sección:

III. OUTRAS DISPOSICIÓNS

Organismo:

CONSELLERÍA DE TRABALLO

Rango:

Orde

Título:

Orde do 27 de febreiro de 2007 pola que se establecen as bases reguladoras do réxime de axudas e subvencións ás empresas cualificadas como iniciativas locais de emprego (ILE) ou como iniciativas de emprego rural (IER) cofinanciadas polo Fondo Social Europeo e se procede á súa convocatoria para o ano 2007.

No marco establecido no artigo 40 da Constitución Española, na Lei 56/2003, do 16 de decembro, de emprego, nos artigos 29 e 30 do Estatuto de autonomía de Galicia, nos obxectivos de crecemento e emprego da Unión Europea, conforme a Estratexia Europea de Emprego, e no primeiro Acordo polo emprego de Galicia, asinado o 5 de febreiro de 2007, e co obxectivo de que a Comunidade Autónoma de

Galicia acade uns maiores niveis de desenvolvemento económico, de calidade no emprego, de benestar social e de cohesión no territorio, é preciso adoptar políticas que promovan a calidade dun modelo de desenvolvemento económico que favoreza a capacidade de toda a sociedade galega para crear emprego.

Mediante o Decreto 289/1997, do 9 de outubro, esta comunidade autónoma asumiu as funcións e os servizos transferidos pola Administración do Estado relativos á xestión realizada polo Instituto Nacional de Emprego (Inem) no ámbito do traballo, o emprego e a formación, correspondéndolle o seu exercicio, hoxe en día, á Consellería de Traballo, ao abeiro do disposto no Decreto 536/2005, do 6 de outubro, polo que se establece a súa estrutura orgánica.

En consecuencia, e dentro do ámbito funcional da Dirección Xeral de Promoción do Emprego, correspóndelle a convocatoria, regulación específica, xestión e control das axudas e subvencións ás iniciativas de emprego antes xestionadas polo Instituto Nacional de Emprego e reguladas na actualidade pola Orde ministerial do 15 de xullo de 1999.

A importancia cualitativa destas iniciativas exixe unha selección anterior dos proxectos a través da súa cualificación previa e inscrición rexistral, así como unha definición das súas características e clases, segundo o regulado no Decreto 9/2000, do 12

de xaneiro, (DOG nº 18, do 27 de xaneiro; corrección de erros nº 24, do 4 de febreiro).

A necesidade de favorecer a desaceleración da perda de emprego no sector primario e o necesario desenvolvemento e diversificación do tecido empresarial galego no contorno territorial, xustifican o deseño dun programa dirixido a fomentar a iniciativa emprendedora co fin de potenciar o crecemento económico e do emprego no ámbito local e no medio rural, articulando unha colaboración entre a Xunta de Galicia, as administracións locais de carácter territorial e a iniciativa privada, coa finalidade de facilitar e fomentar a aparición de empresas innovadoras xeradoras de emprego.

As bases reguladoras do réxime de axudas e subvencións regulado nesta orde establecen un procedemento de concesión que non ten a consideración de concorrencia competitiva, dado que de acordo coa finalidade e obxecto deste réxime, non resulta necesario realizar a comparación e prelación das solicitudes presentadas nun único procedemento, senón que a concesión das axudas se realiza pola comprobación da concorrencia na entidade solicitante dos requisitos establecidos ata o esgotamento do crédito orzamentario.

As bases reguladoras destas axudas e a súa convocatoria axústanse ao disposto no artigo 78 do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, na súa redacción dada pola Lei 14/2004, do 29 de decembro, de medidas tributarias e de réxime administrativo; na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007; no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, e no que resulte de aplicación a Lei 38/2003, do 17 de novembro, xeral de subvencións, e o seu regulamento de desenvolvemento aprobado polo Real decreto 887/2006, do 21 de xullo.

Por todo o exposto, no desenvolvemento da planificación presentada ante o Comité Autonómico de Emprego, na súa reunión do día 21 de novembro de 2006, consultado o Consello Galego de Relacións Laborais, e no exercicio das facultades que me confire o artigo 34 da Lei 1/1983, do 22 de febreiro, reguladora da Xunta e do seu presidente,

DISPOÑO:
Capítulo I
Ámbito e réxime das axudas
Artigo 1º.-Obxecto, finalidade e principios de xestión.
1. Esta orde, en desenvolvemento do Decreto 9/2000, do 12 de xaneiro, polo que se regulan as iniciativas de emprego e as súas clases, así como o procedemento para a súa cualificación e inscrición rexistral, ten por obxecto fixar as bases reguladoras

do réxime de axudas e subvencións establecido pola Consellería de Traballo, coa finalidade de fomentar e promover a creación de empresas innovadoras, económica e financeiramente viables, que xeren emprego estable no ámbito local e no medio rural, mediante o financiamento parcial dos custos necesarios para a posta en marcha daqueles proxectos empresariais previamente cualificados como iniciativas locais de emprego (ILE) ou como iniciativas de emprego rural (IER) e inscritas no rexistro administrativo habilitado para o efecto na Dirección Xeral de Promoción do Emprego e nas delegacións provinciais da Consellería de Traballo, e proceder á súa convocatoria para o ano 2007.

2. As solicitudes, tramitación e concesión destas axudas e subvencións axustaranse ao disposto no texto refundido da Lei de réxime financeiro e orzamentario de Galicia; na Lei de orzamentos xerais da Comunidade Autónoma de Galicia; no Decreto 287/2000, do 21 de novembro, e nesta orde.

3. A xestión deste programa realizarase de acordo cos seguintes principios:
a) Publicidade, concorrencia, obxectividade, transparencia, igualdade e non-discriminación.

b) Eficacia no cumprimento dos obxectivos fixados.
c) Eficiencia na asignación e na utilización dos recursos públicos.
Artigo 2º.-Entidades beneficiarias.
1. Poderán ser beneficiarias das axudas previstas nesta orde as empresas privadas, calquera que sexa a forma xurídica que adopten, incluíndo autónomos/as e as sociedades civís e as comunidades de bens, aínda que carezan de personalidade xurídica, que se constitúan e inicien a súa actividade nun prazo non superior a un ano desde que o proxecto empresarial foi cualificado como iniciativa de emprego, local ou rural, ou, de ser o caso, no prazo que se estableza na resolución de cualificación, en atención ao disposto no artigo 3 do Decreto 9/2000, do 12 de xaneiro, sempre que cumpran as condicións e os requisitos establecidos nesta orde para cada tipo de axuda.

No caso de sociedades civís e comunidades de bens, deberán nomear unha persoa representante ou apoderada única da agrupación, con poderes bastantes para cumprir as obrigas que, como beneficiaria, lle corresponden á agrupación.

2. Entenderase que unha empresa está constituída desde o momento da súa inscrición no correspondente Rexistro Mercantil, ou, se é o caso, no Rexistro de Cooperativas. Cando se trate de empresario ou empresaria individual ou comunidade de bens, cando cause alta no Censo de Obrigados Tributarios do Ministerio de Economía e Facenda.

3. Entenderase que inicia a súa actividade produtiva cando cause alta no imposto de actividades económicas ou, de ser o caso, desde a data de alta no Censo de Obrigados Tributarios do Ministerio de Economía e Facenda.

Capítulo II
Modalidades de axuda
Artigo 3º.-Tipos de axuda.
1. Ao abeiro do Programa de promoción de iniciativas de emprego regulado nesta orde poden solicitarse os seguintes tipos de axudas:

a) Subvención á creación directa de emprego estable.
b) Subvención para a contratación de persoal experto técnico de alta cualificación.

c) Apoio á función xerencial.
d) Subvención financeira.
e) Axuda para o inicio e posta en marcha da actividade.
2. Terán a consideración de accións subvencionables as que se produzan no primeiro ano de actividade empresarial e sempre que observen as previsións específicas contidas nos artigos seguintes para os diferentes tipos de axuda.

3. Para os efectos das axudas recollidas nesta orde, terán a consideración de persoas desempregadas aquelas que figuren inscritas como demandantes de emprego no Servizo Público de Emprego e, pola súa vez, carezan de ocupación segundo o informe de vida laboral da Tesouraría Xeral da Seguridade Social no momento da súa alta no correspondente réxime da Seguridade Social.

Artigo 4º.-Subvención á creación directa de emprego estable.
1. A creación de postos de traballo estables de carácter indefinido, incluídos os propios promotores e promotoras, que sexan ocupados por desempregados e desempregadas inscritos/as como tales no Servizo Público de Emprego incentivaranse cada un deles cunha subvención de ata 4.800 euros. A subvención incrementarase no suposto dunha muller desempregada ata 5.400 euros. Estes incentivos xerais terán un incremento de ata 300 euros no suposto dun mozo ou dunha moza desempregada menor de 30 anos. Para o suposto dunha persoa desempregada afectada por diversidade funcional, a subvención poderá acadar a contía de 6.000 euros.

Terán dereito a estes incentivos as cooperativas ou sociedades laborais, cualificadas como iniciativas de emprego pola incorporación de persoas desempregadas como socios/as traballadores/as.

Cando a dedicación sexa a tempo parcial, as contías destes incentivos serán proporcionais ao tempo efectivo de traballo, en función da xornada a tempo completo establecida no convenio colectivo de aplicación ou, no seu defecto, na xornada ordinaria legal.

2. Cando a dedicación inicial se realice a tempo parcial e se transforme con posterioridade a tempo completo, a empresa poderá solicitar a diferenza entre a contía que se percibiu inicialmente e a que corresponde por dedicación a tempo completo, sem

pre que a dita modificación se produza dentro do primeiro ano da actividade.
3. Cando se trate de contratacións indefinidas de traballadores ou traballadoras por conta allea, esta axuda, de ser o caso, será compatible coas bonificacións á Seguridade Social previstas na normativa estatal, sen que ambos os dous beneficios poidan superar o 60% do custo salarial anual correspondente ao contrato obxecto de subvención.

4. Non se poderá conceder esta axuda cando se trate de traballadores ou traballadoras que prestasen servizos na mesma empresa en virtude dun contrato de carácter temporal.

Poderán ser obxecto desta subvención os postos de traballo estables de carácter indefinido creados ata o 15 de setembro de 2007.

5. O prazo de presentación de solicitudes de subvención á creación de emprego estable será de dous meses desde a data da alta no correspondente réxime da Seguridade Social. Non obstante, deberá ser respectado o prazo xeral establecido no artigo 12.2º desta orde, aínda que nesta data non transcorresen dous meses desde a data de alta na Seguridade Social.

Artigo 5º.-Subvención para a contratación de persoal experto técnico de alta cualificación.

Para a contratación de expertos ou expertas técnicos/as de alta cualificación, poderá concedérselles ás empresas cualificadas como iniciativas de emprego unha subvención equivalente ao 50 por 100 dos custos laborais totais, incluídas as cotizacións á Seguridade Social por todos os conceptos, segundo a duración do contrato, cun máximo de doce mensualidades.

Quedan excluídas deste tipo de axudas as contratacións ou incorporacións dos e das titulares ou socios e socias da empresa cualificada como iniciativa de emprego, así como do ou da cónxuxe, ascendentes, descendentes e demais parentes, por consanguinidade ou afinidade, ata o segundo grao inclusive, do empresario/a ou de quen desempeñe cargos de dirección ou sexan membros dos órganos de administración das empresas que revistan a forma xurídica de sociedade, así como as que se produzan con estas últimas persoas citadas.

A subvención, que se concederá por unha soa vez, terá como límite máximo, por todas as contratacións, a contía de 18.000 euros, e estará condicionada á xustificación pola empresa de que, coas contratacións obxecto de subvención, se suplan carencias ben identificadas para o desenvolvemento da actividade empresarial e o bo fin dela.

Esta subvención é incompatible, para o mesmo traballador ou traballadora, coa establecida no artigo 4º, e é compatible, se é o caso, coas bonificacións de cotas á Seguridade Social previstas na normativa estatal, sen que ambos os dous beneficios poidan superar o 60% do custo salarial anual.

O prazo de presentación de solicitudes da subvención para a contratación de expertos ou expertas técnicos/as de alta cualificación será de dous meses desde a data da alta no correspondente réxime da Seguridade Social. Non obstante, deberá ser respectado o prazo xeral establecido no artigo 12.2º desta orde, aínda que nesta data non transcorresen dous meses desde a data de alta na Seguridade Social.

Artigo 6º.-Apoio á función xerencial.
1. Para o acompañamento na instalación da empresa, poderase financiar o apoio ás funcións xerenciais para axudar a persoa promotora ou empresario/a na toma de decisións necesarias para o funcionamento da empresa. O dito apoio poderá consistir nas seguintes modalidades:

a) Axuda por titoría, entendéndose por tal o acompañamento técnico que unha persoa experta allea á empresa, persoa física ou xurídica que reúna garantías de solvencia e profesionalidade, lle preste á persoa promotora ou empresario/a nas súas actividades xerenciais durante un prazo de tempo determinado.

b) Axuda por formación, que incluirá os cursos que a persoa promotora ou empresario/a poida recibir para obter e mellorar os seus coñecementos sobre a función xerencial.

c) Axuda pola realización externa de estudos e informes sobre a actividade para que a persoa promotora ou empresario/a poida dispoñer de mellor información sobre os bens ou servizos obxecto de produción, incluíndose nesta epígrafe os estudos de mercado, organización, comercialización, diagnose e outros de natureza análoga.

2. O gasto orixinado polo apoio á función xerencial deberá producirse no ano 2007 e deberá ser efectivamente xustificado, mediante facturas e documentos acreditativos do seu pagamento, con anterioridade á finalización do período de xustificación establecido na resolución de concesión, ou, de ser o caso, ata o 30 de novembro de 2007.

3. A contía da subvención de apoio á función xerencial, que se pagará por unha soa vez, será de ata o 75 por 100 do custo dos servizos recibidos cun límite máximo de 12.000 euros polo conxunto das modalidades de asistencia técnica previstas.

4. As solicitudes de apoio á función xerencial deberanse presentar no prazo xeral establecido no artigo 12º.2 desta orde.

Artigo 7º.-Subvención financeira.
1. A subvención financeira ten por finalidade promover a creación de postos de traballo, mediante a redución dos xuros de préstamos para financiar os investimentos en activo fixo que sexan necesarios para a creación e posta en marcha das empresas cualificadas como iniciativas de emprego. Non obstante, poderase destinar ata un 25% do préstamo para financiar o activo circulante.

Os préstamos, para seren subvencionados, deberán ser concedidos por entidades financeiras que teñan subscrito un convenio, para tal fin, coa Consellería de Traballo.

2. A subvención, pagadoira dunha soa vez, será como máximo o equivalente á redución de seis puntos do xuro fixado pola entidade de crédito que conceda o préstamo sen que, en ningún caso, o tipo de xuro que deba satisfacer a entidade ou persoa beneficiaria, despois de calculada a subsidiación, poida resultar inferior a un punto. A contía calcularase como se a subvención se devengase cada ano de duración do préstamo, incluído o posible período de carencia.

Esta subvención ten como límite a contía máxima de 5.100 euros por emprego estable creado para persoas desempregadas, segundo o previsto no artigo 3.3º e 4.1º desta orde.

3. As solicitudes de subvención financeira deberán presentarse con anterioridade ao inicio da execución do proxecto de investimento e no prazo xeral establecido no artigo 12.2º desta orde.

Artigo 8º.-Axuda para o inicio e posta en marcha da actividade.
1. Para que unha iniciativa de emprego poida beneficiarse da axuda prevista neste artigo ten que supoñer, cando menos, a creación directa de emprego estable para unha persoa desempregada, segundo o previsto no artigo 3.3º e 4.1º desta orde.

2. Esta axuda consistirá nunha subvención de ata un 60% dos gastos necesarios para o inicio e a posta en marcha da actividade. O importe máximo desta axuda determinarase en atención ao número de postos de traballo estables que se van crear ata o 15 de setembro de 2007, de acordo coa seguinte escala:

-De 1 a 2 postos de traballo:ata 18.000 euros.
-De 3 a 10 postos de traballo: ata 30.000 euros.
-De 11 a 20 postos de traballo:ata 42.000 euros.
-21 ou máis postos de traballo: ata 54.000 euros.
O importe da axuda non poderá superar a contía de 6.000 euros por posto de traballo estable creado, agás no suposto de que sexa ocupado por un mozo ou moza menor de 30 anos ou por unha muller que poderá acadar a contía de 9.000 euros. Este límite máximo por posto de traballo poderá ser excepcionado no caso das iniciativas de emprego rural sempre que a dita excepción estea amparada na propia definición e características do plan de actuación sectorial correspondente.

3. Esta axuda irá destinada a sufragar os gastos necesarios derivados da posta en marcha da actividade e do funcionamento da empresa, que se produzan antes de que transcorra un ano desde o inicio da súa actividade, sempre que se realicen no ano 2007 e sexan efectivamente xustificados, mediante facturas e documentos acreditativos do seu pagamento, con anterioridade á finalización do período

de xustificación establecido na resolución de concesión, ou, de ser o caso, ata o 30 de novembro de 2007.

Os gastos subvencionables serán a compra de mercadorías, materias primas e outros aprovisionamentos, arrendamento de local e maquinaria, man de obra empregada na reforma ou adecuación do local, publicidade e subministracións.

En ningún caso serán subvencionables, a través da axuda regulada neste artigo, os gastos que poidan ser considerados como investimento en activo fixo.

4. As solicitudes de axuda para o inicio e posta en marcha da actividade deberán presentarse no prazo xeral establecido no artigo 12.2º desta orde.

Artigo 9º.-Actividades vinculadas aos novos viveiros de emprego.
1. As empresas cualificadas como iniciativas de emprego terán dereito a un incremento do 10 por 100 da contía das subvencións reguladas nesta orde, cando a súa actividade produtiva principal se inscriba dentro dos ámbitos dos novos viveiros de emprego no marco da definición e interpretación que establece a Comisión Europea, que a continuación se relacionan:

a) Servizos da vida diaria:
-Os servizos a domicilio (preparación e distribución de comidas a domicilio; acompañamento e prestación doutros servizos a persoas maiores no seu domicilio; servizos a persoas enfermas no seu domicilio; servizos de limpeza e pasada de ferro; servizos administrativos).

-Coidado dos nenos e nenas (coidado e educación de nenos e nenas por debaixo da idade escolar, actividades deportivas, recreativas e culturais para nenos e nenas en idade escolar).

-Novas tecnoloxías da información e da comunicación (como servizos a particulares no eido da cultura, da saúde, da comunicación, do lecer, como telemedecina, formación a distancia, teletraballo; servizos ás empresas: información económica, servizos comerciais, contabilidade a distancia, asistencia especializada, ou como servizos públicos: teleservizos, acceso a bases de datos, servizos administrativos de información).

-Axuda para a inserción da mocidade en dificultades e con desarraigamento social (axudas nos deberes escolares; centros de inserción profesional; educación na rúa; empresas de inserción).

b) Servizos de mellora do marco de vida:
-Mellora da vivenda (rehabilitación de vivendas deterioradas; mantemento das vivendas).

-A seguridade (servizos de vixilancia e acollida; instalación de materiais de seguridade; aparcadoiros; televixilancia).

-Transportes colectivos locais (novas formas de organización dos transportes colectivos; servizos

especializados con determinados colectivos de persoas usuarias).
-A revalorización dos espazos públicos urbanos (rehabilitación de espazos públicos e barrios; mantemento de espazos públicos; iniciativas económicas e comerciais en zonas vellas das cidades).

-Os comercios de proximidade (comercios en zonas rurais; comercios nos barrios urbanos non céntricos; puntos comerciais multiservizo en zonas desfavorecidas).

c) Servizos culturais e de lecer:
-O turismo (turismo rural e cultural e outros novos fenómenos turísticos; servizo de acompañamento e acollida turística; novos servizos turísticos telemáticos).

-O sector audiovisual (produción e distribución de películas; produción e distribución de emisións televisivas; televisión interactiva; acceso a distancia a bibliotecas e museos).

-A valorización do patrimonio cultural (creación e restauración de lugares de interese cultural; servizos de difusión da cultura e acollida turística).

-O desenvolvemento cultural local (actividades de valorización dos recursos e actividades culturais locais como música, folclore, teatro, gastronomía, artesanía).

d) Servizos de ambiente:
-A xestión dos residuos (recollida selectiva e tratamento dos residuos; actividades de investigación para a reutilización dos materiais recuperados; novas técnicas de automatización do tratamento dos residuos).

-A xestión da auga (realización e xestión de infraestruturas de xestión da auga; servizos de investigación tecnolóxica e transferencia de saber facer; asistencia á xestión de infraestruturas locais; explotación turística e deportiva das reservas hidráulicas).

-A protección e o mantemento das zonas naturais (actividades de protección e mantemento das zonas rurais; actividades de investigación agronómica; creación e xestión de parques e reservas naturais).

-A normativa, o control da contaminación e as instalacións correspondentes (produción de bens e servizos ligados a tecnoloxías menos contaminantes; desenvolvemento e aplicación de novas tecnoloxías de economía da enerxía; mellora da xestión dos sistemas de control da contaminación e o ruído).

2. O incremento do 10 por 100 establecido no punto anterior, en todos os tipos de axudas previstos nesta orde, aplicarase sobre o importe que correspondería de tratarse doutra actividade, con independencia de que, como consecuencia da aplicación do incremento, se superen ou non os límites porcentuais ou cuantitativos previstos para cada tipo de axuda.

Artigo 10º.-Incremento dos incentivos.
As contías das axudas reguladas nos artigos 4º, 7º, 8º e, se é o caso, co incremento establecido no artigo 9º desta orde, incrementaranse nun 10 por 100, nos casos de persoas desempregadas en que, téndose en conta para o cálculo da subvención, no momento da súa alta no correspondente réxime da Seguridade Social, concorran algunhas das seguintes circunstancias:

a) Traballadores e traballadoras desempregados/as por mor dalgunha das causas previstas nos artigos 51 e 52 c) do Estatuto dos traballadores.

b) Persoas desempregadas en situación de risco de exclusión social pertencentes a algún dos seguintes colectivos:

-Persoas perceptoras da renda de integración social de Galicia ou aquelas que non poidan acceder a ela, ben por falta do período exixido de residencia ou empadroamento, ou ben por ter esgotado o período máximo de percepción legalmente establecido, ou membros da súa unidade familiar en desemprego.

-Persoas que participen ou participasen en procesos de rehabilitación ou reinserción social de drogodependentes coa debida acreditación ou autorización.

-Internos e internas de centros penitenciarios cuxa situación penitenciaria lles permita acceder a un emprego, así como liberados/as condicionais ou ex reclusos/as que non tivesen antes un primeiro emprego fixo remunerado tras un período de privación de liberdade.

-Mulleres procedentes de casas de acollida que presenten problemas adicionais de inserción ou reinserción laboral.

-As persoas que teñan acreditada pola Administración competente a condición de vítima de violencia doméstica por parte dalgún membro da unidade familiar de convivencia.

-Mulleres que abandonasen o exercicio da prostitución e se incorporen ao mercado laboral.

-Menores internos/as incluídos/as no ámbito de aplicación da Lei orgánica 5/2000, do 12 de xaneiro, reguladora da responsabilidade penal dos e das menores, cuxa situación lles permita acceder a un emprego, así como os e as que estean en situación de liberdade vixiada e os ex reclusos/as.

-Mozos e mozas que estean ou estivesen ata a súa maioría de idade baixo a tutela ou garda da Administración autonómica.

-Traballadores e traballadoras inmigrantes que pasen a ser residentes da comunidade cuxas características condicionen a súa integración social.

-Emigrantes retornados/as con graves necesidades persoais ou familiares.
-Persoas que formen parte de colectivos ou minorías cuxas características poidan condicionar as súas posibilidades de integración social

Estes incrementos aplicaranse con independencia de que, como consecuencia da súa aplicación, se superen ou non os límites porcentuais ou cuantitativos previstos para cada tipo de axuda.

Capítulo III
Competencia e procedemento
Artigo 11º.-Competencia.
A competencia para coñecer e resolver as axudas e subvencións previstas nesta orde, por delegación do conselleiro de Traballo, corresponderalles:

a) Aos delegados e delegadas provinciais da Consellería de Traballo, cando a actividade para a que se solicita subvención se vaia desenvolver no respectivo ámbito provincial.

b) Ao director xeral de Promoción do Emprego, cando a actividade para a que se solicita subvención se vaia desenvolver en máis dunha provincia desta comunidade autónoma e cando se trate de iniciativas de emprego apoiadas por un departamento da Xunta de Galicia.

Artigo 12º.-Solicitudes e prazo.
1. As solicitudes de axudas e subvencións dirixiranse ao órgano competente para resolver e presentaranse nos rexistros das respectivas delegacións provinciais ou, de ser o caso, na Dirección Xeral de Promoción do Emprego da Consellería de Traballo, ou por calquera das formas previstas no artigo 38.4º da Lei 30/1992, do 26 de novembro, modificada pola Lei 4/1999, de 13 de xaneiro, de réxime xurídico das administracións públicas e do procedemento administrativo común.

2. As solicitudes de axudas deberán presentarse antes de que transcorra un ano desde que se inicia a actividade da empresa. Non obstante, deberán respectarse os prazos específicos establecidos nos artigos anteriores para cada tipo de axuda. Para o caso de que na resolución de cualificación se concedese unha ampliación do prazo para iniciar a actividade, as solicitudes de axudas deberán presentarse antes de que transcorran dous anos desde a data da cualificación, e sempre que no dito prazo iniciasen a actividade.

Para o ano 2007, o prazo xeral de presentación de solicitudes finalizará o 15 de setembro de 2007.

3. Aquelas ILE ou IER para as que, en virtude da data da súa constitución e do inicio da súa actividade, finalizase o prazo de presentación de solicitude de axudas entre o 16 de setembro do ano 2006 e a data de publicación desta orde, poderán acollerse ás modalidades de axudas previstas nesta orde. Así mesmo, as actuacións subvencionables realizadas no mesmo período poderán acollerse ao previsto nesta orde, aínda que transcorrese o prazo establecido desde a alta na Seguridade Social ou se tivese iniciado a execución do proxecto de investimento. O prazo para a presentación destas solicitudes remata o 30 de abril de 2007.

4. As solicitudes e os anexos deste programa están dispoñibles na páxina web da Consellería de Traballo www.xunta.es/emprego.

5. A presentación da solicitude de subvención pola persoa ou entidade interesada comportará a autorización de quen solicita para que o órgano concedente obteña de forma directa a acreditación do cumprimento das súas obrigas tributarias co Estado, coa Comunidade Autónoma de Galicia e coa Seguridade Social, a través de certificados telemáticos, polo que queda liberada a persoa ou entidade solicitante de achegar a correspondente certificación, segundo o establecido no artigo 43º da Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007 (DOG nº 249, do 29 de decembro).

Non obstante, a persoa ou entidade solicitante poderá denegar expresamente o consentimento, debendo achegar entón as devanditas certificacións.

6. Mediante a presentación da solicitude de subvención, a persoa ou entidade interesada préstalle expresamente o seu consentimento á Consellería de Traballo para incluír e facer públicos os datos relevantes referidos ás axudas e subvencións recibidas, así como ás sancións impostas, nos rexistros públicos de axudas, subvencións e convenios e de sancións administrativas, regulados no Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006 (DOG nº 153, do 9 de agosto). Os dereitos de acceso, rectificación, consulta, cancelación e oposición de datos de carácter persoal exerceranse ante o CIXTEC como responsable dos ficheiros, con domicilio na rúa Domingo Fontán, 9-15702 Santiago de Compostela, de conformidade coas prescricións da Lei orgánica 15/1999, do 13 de decembro, de protección de datos de carácter persoal.

7. Coa presentación da solicitude de subvención, a persoa ou entidade interesada autoriza expresamente a Consellería de Traballo para que de acordo co establecido nos puntos 3º e 4º do artigo 13 da Lei 4/2006, do 30 de xuño, de transparencia e de boas prácticas na Administración pública galega, publique as subvencións concedidas ao abeiro desta orde no Diario Oficial de Galicia e na súa páxina web oficial, con expresión da entidade beneficiaria, a contía e a súa finalidade.

8. Para a presentación de solicitudes de axudas, as persoas ou entidades beneficiarias poderán contar co asesoramento dos e das axentes de emprego e desenvolvemento local da rede coordinada pola Consellería de Traballo (www.tecnicosempregogalicia.xunta.es).

Artigo 13º.-Documentación.
As solicitudes deberán presentarse nos modelos normalizados que figuran como anexos numéricos desta orde e deberán ir acompañadas do orixinal

ou fotocopia compulsada da documentación, común e específica, que se relaciona:
1. Documentación común para todos os tipos de axuda:
a) Se quen solicita é persoa física: DNI e acreditación do número de identificación fiscal, e se é persoa xurídica: DNI e poder suficiente da persoa representante que actúa en nome da entidade e NIF da empresa.

b) De tratarse de persoa xurídica, escritura de constitución e inscrición no Rexistro Mercantil ou, se é o caso, no Rexistro de Cooperativas, alta no imposto de actividades económicas ou, de ser o caso, alta no Censo de Obrigados Tributarios no Ministerio de Economía e Facenda.

No suposto de que se solicite a subvención financeira con anterioridade ao inicio da actividade, esta documentación deberá achegarse na fase de xustificación do pagamento.

c) Se é o caso, documentos acreditativos das circunstancias que determinen a pertenza aos colectivos establecidos no artigo 10º desta orde.

d) Declaración comprensiva do conxunto de todas as solicitudes de axudas efectuadas ou concedidas, para o mesmo proxecto ou actividade, perante as administracións públicas competentes ou outros entes públicos (segundo o modelo do anexo IV ). Ou, de ser o caso, unha declaración de que non se solicitaron nin percibiron outras axudas ou subvencións (no modelo de solicitude).

e) Ficha de solicitude de transferencia bancaria e certificación da entidade bancaria acreditativa de que quen solicita é titular da conta ( segundo o modelo do anexo VI ).

f) Documentación acreditativa de que se encontraren ao día das súas obrigas tributarias -estatais e autonómicas-coa Seguridade Social e de que non teñen pendente de pagamento ningunha outra débeda coa Administración da comunidade autónoma, unicamente no suposto de que a persoa ou entidade solicitante lle denegase expresamente a autorización ao órgano xestor para solicitar as certificacións que deban emitir a Axencia Estatal da Administración Tributaria, a Tesouraría Xeral da Seguridade Social e a Consellería de Economía e Facenda da Xunta de Galicia.

2. Documentación específica:
a) Subvención á creación directa de emprego estable:
-Declaración do número de empregos estables de carácter indefinido ocupados por colectivos beneficiarios e relación nominal deles, con indicación da data de incorporación efectiva (segundo o modelo do anexo III).

-DNI e documentos acreditativos dos períodos de inscrición como demandantes de emprego na oficina pública de emprego das persoas incorporadas á

empresa, así como do tempo de permanencia en situación de desemprego segundo os datos do informe da vida laboral da Tesouraría Xeral da Seguridade Social.

-Documentos acreditativos da incorporación efectiva con carácter indefinido e altas no correspondente réxime da Seguridade Social.

b) Subvención para a contratación de persoal experto técnico de alta cualificación.

-Memoria descritiva da necesidade da contratación de expertos/as, número e perfís profesionais deste persoal, funcións que van realizar en relación coas categorías profesionais e custos laborais totais.

-Contratos de traballo e altas na Seguridade Social.
c) Subvención ao apoio á función xerencial:
-Memoria descritiva da medida de apoio solicitada en que conste, entre outros, a xustificación da súa necesidade para o desenvolvemento da actividade empresarial e o orzamento desagregado por conceptos, a proposta dos servizos que se van desenvolver e o calendario previsto para súa realización, así como a conformidade da empresa, entidade ou persoa física que vai prestar o apoio e a aceptación da persoa ou entidade solicitante.

-Documentación acreditativa da solvencia profesional da empresa, entidade física ou xurídica, que prestará ou xa prestase o servizo de apoio.

d) Subvención financeira:
-Memoria económica do proxecto que inclúa o orzamento de investimentos e o plan de financiamento en relación coa finalidade ou obxecto da subvención.

-Contrato de préstamo ou, no seu defecto, compromiso da entidade financeira sobre a concesión do préstamo, no cal que figuren as características e se faga constar que a operación se acolle ao convenio subscrito para tal fin (segundo o modelo do anexo V).

-Plan de investimentos xunto coas facturas proforma ou orzamentos dos activos fixos e, se é o caso, xustificantes dos activos circulantes que se financiarán co préstamo.

-Declaración do número de empregos estables para crear ata o 15 de setembro de 2007 e relación nominal das persoas que os vaian ocupar, con indicación daqueles polos cales se solicita a subvención (segundo o modelo do anexo III).

e) Axuda para o inicio e a posta en marcha da actividade:
-Memoria descritiva da actividade e orzamento dos gastos necesarios para o inicio e a posta en marcha da actividade, con indicación daqueles aos cales se vai destinar a subvención, así como das fontes de financiamento.

-Declaración do número de postos de traballo estables para crear ata o 15 de setembro de 2007 e relación nominal das persoas que os vaian ocupar,

con indicación daquelas polas cales se solicita a subvención (segundo o modelo do anexo III).

Artigo 14º.-Instrución e tramitación.
Se a solicitude non estivese debidamente cuberta ou non se achegase a documentación exixida, as unidades administrativas encargadas da tramitación do expediente, de conformidade co disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, requirirán a persoa ou entidade interesada para que, nun prazo de 10 días, emende a falta ou presente os documentos preceptivos, coa advertencia de que, se así non o fixer, se considerará desistida da súa petición, logo de resolución, que deberá ser ditada nos termos previstos no artigo 42 da antedita lei.

Artigo 15º.-Resolución e recursos.
1. Logo da fiscalización polas respectivas intervencións das propostas emitidas polos correspondentes servizos, as resolucións serán ditadas polo órgano competente, por delegación do conselleiro de Traballo, e deberán serlles notificadas ás persoas ou entidades interesadas. As resolucións de concesión ou de denegación deberán ser sempre motivadas.

2. O prazo para resolver e notificar a resolución será de seis meses que se computarán desde a data de entrada da solicitude no rexistro do órgano competente para a súa tramitación. Transcorrido o devandito prazo sen que se ditase resolución expresa, entenderase desestimada a solicitude de acordo co establecido nos artigos 1 e 2 da Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común.

3. As resolucións que se diten neste procedemento esgotan a vía administrativa e contra delas cabe interpoñer recurso contencioso-administrativo, no prazo de dous meses, ante o órgano competente da xurisdición contencioso-administrativa, e poderá formularse, con carácter potestativo, recurso de reposición, no prazo dun mes, ante o mesmo órgano que ditou a resolución impugnada, de conformidade co disposto na Lei 29/1998, do 13 de xullo, reguladora da xurisdición contencioso-administrativa, e na Lei 30/1992, do 26 de novembro, de réxime xurídico das administracións públicas e do procedemento administrativo común.

Artigo 16º.-Xustificación do pagamento.
1. De non achegarse con anterioridade, o pagamento das axudas quedará condicionado á presentación do orixinal ou copia compulsada, no prazo, nos termos e na forma que se estableza na resolución de concesión, da documentación común e específica

que se exixa de forma expresa nela, entre a que deberá figurar a relacionada nos puntos seguintes:

A. Documentación común para todos os tipos de axuda:
-Documentación xustificativa para acreditar o cumprimento da actividade para a que se concedeu a subvención segundo o tipo de axuda.

-Declaración complementaria da establecida no artigo 13.1º d) desta orde do conxunto das axudas solicitadas, tanto as aprobadas ou concedidas como as pendentes de resolución, para o mesmo proxecto, das distintas administracións públicas competentes ou outros entes públicos. Ou, de ser o caso, de que non solicitaron nin percibiron outras axudas e subvencións.

B. Documentación específica:
a) Subvención ao apoio á función xerencial:
-Facturas da empresa, entidade ou persoa física, e documentos acreditativos do efectivo pagamento do servizo recibido.

-Informe escrito da actuación de apoio desenvolvida e, para o caso de consistir na elaboración dun estudo de mercado ou similar, presentarase copia del.

-Certificación da empresa, entidade ou persoa física, da finalización do servizo de apoio prestado, coa aceptación ou conformidade da empresa solicitante cos servizos recibidos.

b) Subvención financeira:
-Copia do contrato de préstamo, de non se xuntar á solicitude.
-De tratarse de persoa xurídica, escritura de constitución e inscrición no Rexistro Mercantil ou, se é o caso, no Rexistro de Cooperativas, alta no imposto de actividades económicas ou, de ser o caso, alta no Censo de Obrigados Tributarios no Ministerio de Economía e Facenda, de non se xuntar á solicitude.

-Documentos acreditativos da incorporación e alta no correspondente réxime da Seguridade Social das persoas que se incorporan á empresa para ocuparen postos de traballo estables.

-DNI e documentos acreditativos dos períodos de inscrición como demandantes de emprego na oficina pública de emprego das persoas incorporadas á empresa, así como do tempo de permanencia en situación de desemprego segundo os datos do informe da vida laboral da Tesouraría Xeral da Seguridade Social.

c) Axuda para o inicio e posta en marcha da actividade:
-Documentación xustificativa da realización dos gastos imputados á subvención, mediante facturas e documentos acreditativos do seu efectivo pagamento.

-Documentos acreditativos da incorporación e alta no correspondente réxime da Seguridade Social dos traballadores e traballadoras que ocupen os empregos estables creados tidos en conta para o cálculo da subvención.

-DNI e documentos acreditativos dos períodos de inscrición como demandantes de emprego na oficina pública de emprego das persoas incorporadas á empresa, así como do tempo de permanencia en situación de desemprego segundo os datos do informe da vida laboral da Tesouraría Xeral da Seguridade Social.

2. Malia o sinalado no artigo 13º e no parágrafo anterior deste artigo, a documentación exixida para a fase de pagamento, común e específica, poderá presentarse xunto coa solicitude á opción da persoa ou entidade interesada. Neste suposto poderán tramitarse conxuntamente a concesión e o pagamento da axuda.

3. Cando concorran varias axudas ou subvencións só será necesario presentar unha vez a documentación coincidente, tanto na fase de solicitude coma na de xustificación do pagamento.

4. As persoas ou entidades beneficiarias deberán presentar a documentación xustificativa para o pagamento sinalado no punto 1 deste artigo no prazo establecido na resolución de concesión, ou, de ser o caso, ata o 30 de novembro de 2007. Excepcionalmente este prazo poderá ser prorrogado en 15 días de forma extraordinaria e debidamente xustificado.

5. Non se poderá realizar en ningún caso o pagamento da subvención mentres a persoa ou entidade beneficiaria non estea ao día do cumprimento das súas obrigas tributarias estatais e autonómicas e da Seguridade Social, sexa debedora en virtude de resolución declarativa da procedencia de reintegro ou teña algunha débeda pendente, por calquera concepto, coa Administración da comunidade autónoma.

Capítulo IV
Incompatibilidades e obrigas
Artigo 17º.-Incompatibilidades e concorrencia.
1. As subvencións ou axudas reguladas nesta orde non poderán ser, illadamente ou en concorrencia coas concedidas por outras administracións ou entes públicos ou privados, nacionais ou internacionais, de tal contía que superen o 80% do custo total da actividade subvencionada que vai desenvolver a persoa ou entidade beneficiaria.

2. Non se poderán imputar os mesmos gastos aos distintos tipos de axuda previstos nesta orde.

3. As subvencións reguladas nesta orde serán incompatibles coas axudas establecidas nos programas de apoio a iniciativas de emprego de base tecnolóxica, de promoción do emprego autónomo, de integración laboral das persoas afectadas por diversidade funcional en centros especiais de emprego

e do de promoción do emprego autónomo das persoas afectadas por diversidade funcional, así como no programa de fomento do emprego en cooperativas e sociedades laborais, agás que se trate da axuda para a adquisición da condición de socio ou socia traballador/a dunha cooperativa de traballo asociado ou dunha sociedade laboral, convocados pola Consellería de Traballo.

4. A axuda á creación directa de emprego estable e a subvención por asistencia técnica para a contratación de persoal experto técnico de alta cualificación serán incompatibles coas establecidas nos diferentes programas de fomento da contratación por conta allea convocados pola Consellería de Traballo. Os ditos incentivos serán compatibles, de ser o caso, coas axudas ou bonificacións ás cotizacións á Seguridade Social.

Artigo 18º.-Exclusións.
Exclúense dos beneficios do programa establecido nesta orde:
a) Os empregos de carácter estable realizados con persoas desempregadas que, nos 24 meses anteriores á data de alta na Seguridade Social, prestasen servizos mediante un contrato indefinido en empresas ou grupos de empresas, nas cales participasen persoas ou entidades, que, pola súa vez, sexan promotoras da empresa solicitante.

b) Os promotores e promotoras que, nos tres meses inmediatamente anteriores á data de inicio da nova actividade, estivesen de alta como traballadores ou traballadoras autónomos/as en calquera réxime da Seguridade Social.

c) Así mesmo, serán excluídos os e as solicitantes que incorran nalgunha das prohibicións que aparecen recollidas no artigo 13.2º da Lei 38/2003, do 17 de novembro, xeral de subvencións.

Artigo 19º.-Obrigas das persoas ou entidades beneficiarias.
1. Son obrigas das persoas ou entidades beneficiarias das axudas e subvencións:
a) Estar ao día das súas obrigas tributarias estatais e autonómicas e da Seguridade Social, así como non ter pendente de pagamento ningunha outra débeda, por ningún concepto, coa Administración pública da comunidade autónoma, con anterioridade a ditarse a proposta de resolución de concesión e realizar a proposta de pagamento da subvención.

b) Realizar a actividade que fundamente a concesión da axuda ou subvención durante un tempo mínimo de tres anos, salvo cesamento por causas alleas á súa vontade, o que deberá acreditar de maneira que faga fe.

c) Comunicarlle ao órgano concedente calquera modificación das condicións tidas en conta para a concesión da subvención, así como dos compromisos e obrigas asumidos polas persoas ou entidades beneficiarias e, de ser o caso, a obtención concorrente de subvencións, axudas, ingresos ou recursos que

financien a actividade subvencionada. Esta comunicación deberá efectuarse tan pronto como se coñeza, en todo caso, con anterioridade á xustificación da aplicación dada aos fondos percibidos.

d) Adoptar as medidas axeitadas de difusión para darlle publicidade ao financiamento público das actuacións subvencionadas pola Consellería de Traballo, así como, de ser o caso, cofinanciadas polo Fondo Social Europeo, nos termos establecidos no Regulamento (CE) nº 1828, da Comisión, do 8 de decembro de 2006, polo que se fixan normas de desenvolvemento do Regulamento (CE) nº 1083/2006, do Consello, polo que se establecen as disposicións xerais relativas ao Fondo Europeo de Desenvolvemento Rexional, ao Fondo Social Europeo e ao Fondo de Cohesión e o Regulamento (CE) nº 1080/2006, do Parlamento Europeo e do Consello, relativo ao Fondo Europeo de Desenvolvemento Rexional (DOUE L 371, do 27-12-2006).

e) O sometemento ás actuacións de control, comprobación e inspección que efectuará a Consellería de Traballo, ás de control financeiro que correspondan, se é o caso, á Intervención Xeral da Comunidade Autónoma, ás previstas na lexislación do Tribunal de Contas e o Consello de Contas, ou a outros órganos da Administración do Estado ou da Unión Europea, e achegar canta información lle sexa requirida no exercicio das actuacións anteriores.

f) Aqueloutras obrigas establecidas no artigo 78 do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, conforme a redacción dada pola Lei 14/2004, do 29 de decembro, de medidas tributarias e de réxime administrativo.

2. As empresas beneficiarias destas subvencións deberán cumprir, respecto dos distintos tipos de axuda, as seguintes obrigas:

a) Subvencións á creación directa de emprego estable: as empresas beneficiarias, co fin de garantiren o mantemento dos postos de traballo estables creados que fosen obxecto de subvención, deberán presentar dentro do primeiro trimestre de cada ano unha relación da variación das altas e baixas do persoal adscrito.

Esta obriga manterase durante os tres anos seguintes a aquel en que se concedeu a axuda ou subvención.

Cando no período de tres anos, desde a data da incorporación á empresa, se produza o cesamento dalgún traballador ou traballadora, a empresa beneficiaria está obrigada a cubrir a vacante no prazo dun mes, polo menos, en tempo de dedicación igual ao anterior, debendo pertencer o novo traballador ou traballadora a algún dos colectivos de persoas beneficiarias deste programa, polo que se poida conceder unha subvención por importe igual ou superior ao da persoa que causase baixa, o que deberá serlle comunicado ao órgano que concedeu a axuda dentro

dos 20 días seguintes ao da substitución. Esta nova incorporación non dará lugar, en ningún caso, a unha nova axuda.

b) Subvencións para a contratación de persoal experto técnico de alta cualificación: as empresas deberán manter no seu cadro de persoal a persoa experta técnica contratada, como mínimo, polo tempo subvencionado, e se se produce o cesamento do traballador ou traballadora, a empresa beneficiaria está obrigada a cubrir a vacante no prazo dun mes, polo menos, en tempo de dedicación igual ao anterior, o que deberá serlle comunicado ao órgano que concedeu a axuda dentro dos 20 días seguintes ao da substitución. Esta nova incorporación non dará lugar, en ningún caso, a unha nova axuda.

Deberán presentar no prazo de dous meses desde a finalización do período subvencionado:

-Unha memoria das actividades realizadas polos expertos ou expertas.
-Recibos dos salarios e boletíns de cotización á Seguridade Social (TC2) dos expertos e expertas técnicos/as, correspondentes ao período subvencionado.

c) Subvención financeira: a persoa ou entidade beneficiaria da subvención acreditará, no primeiro trimestre natural de cada ano e ata a súa completa xustificación, mediante facturas, escrituras públicas ou contratos, así como os correspondentes xustificantes de pagamento, que o importe de préstamo subvencionado foi destinado a financiar os investimentos obxecto da subvención.

A persoa ou entidade beneficiaria, no prazo de 30 días desde a data en que teña coñecemento do pagamento efectivo da subvención, ten que presentar certificación expedida pola entidade financeira, acreditativa da amortización do principal do préstamo na contía subvencionada.

d) Axuda para o inicio e posta en marcha da actividade: as empresas deberán enviar unha breve memoria do desenvolvemento da actividade dentro do primeiro trimestre de cada ano e referida ao ano anterior. A dita obriga manterase durante os tres exercicios seguintes a aquel en que se concedeu a subvención.

Artigo 20º.-Modificación da resolución concesoria.
Toda alteración das condicións tidas en conta para a concesión de axudas ou subvencións, así como a obtención concorrente de subvencións e axudas outorgadas por outras administracións ou outros entes públicos ou privados, nacionais ou internacionais, poderá dar lugar á modificación da resolución de concesión e, eventualmente, á súa revogación.

Artigo 21º.-Revogación e reintegro.
Procederá a revogación das subvencións e axudas, así como o reintegro total ou parcial das cantidades percibidas e a exixencia do xuro de demora, nos casos e nos termos previstos no artigo 78 do texto

refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, conforme a redacción dada pola Lei 14/2004, do 29 de decembro, de medidas tributarias e de réxime administrativo, e no artigo 19 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.

A obriga de reintegro establecida no parágrafo anterior enténdese sen prexuízo do establecido no Real decreto lexislativo 5/2000, do 4 de agosto, polo que se aproba o texto refundido da Lei sobre infraccións e sancións na orde social.

Artigo 22º.-Seguimento e control.
As delegacións provinciais e a Dirección Xeral de Promoción do Emprego poderán comprobar, en todo momento, a aplicación das subvencións concedidas para os fins programados. Para estes efectos, as persoas ou entidades beneficiarias deberán cumprir as obrigas de comprobación que se establezan nesta orde e na resolución de concesión.

Artigo 23º.-Axudas baixo condicións de mínimis.
Os incentivos establecidos nesta orde quedan sometidos ao réxime de axudas de mínimis, establecidos no regulamento CE nº 1998/2006, da Comisión, do 15 de decembro de 2006, relativo á aplicación dos artigos 87 e 88 do Tratado CE ás axudas de mínimis (DOUE nº L 379, do 28 de decembro).

Polo tanto a axuda total de mínimis concedida a unha empresa non será superior a 200.000 euros durante calquera período de tres exercicios fiscais, ou a 100.000 euros no suposto dunha axuda concedida a unha empresa que opere no sector do transporte pola estrada.

Disposicións adicionais
Primeira.-Sen prexuízo das facultades que teñan atribuídas outros órganos da Administración do Estado ou da comunidade autónoma, a Consellería de Traballo levará a cabo a función de control, así como a avaliación e o seguimento deste programa.

Para realizar as ditas funcións poderanse utilizar cantos medios estean á disposición da Consellería de Traballo para comprobar o cumprimento dos requisitos exixidos nesta orde e demais normas vixentes que resulten de aplicación.

Ademais, o persoal técnico de emprego que realiza os labores de acompañamento e asesoramento colaborará nas actuacións de seguimento e avaliación das empresas cualificadas como ILE ou IER unha vez iniciada a súa actividade.

Segunda.-A Consellería de Traballo poderá requirir en todo momento a documentación orixinal que se considere necesaria para acreditar mellor o exacto cumprimento das condicións exixidas para os diferentes tipos de axuda previstas nesta orde, agás aquela que de acordo co artigo 35 f) da Lei 30/1992, do 26 de novembro, de réxime xurídico das administracións públicas e do procedemento administrativo común, xa se atope en poder da Administración actuante.

Terceira.-Apróbase a delegación de atribucións do conselleiro de Traballo nos delegados/as provinciais, no ámbito das súas respectivas provincias e no director xeral de Promoción do Emprego, para resolver a concesión ou denegación das axudas e subvencións previstas nesta orde, así como para autorizar, dispoñer, recoñecer a obriga e propoñer os correspondentes pagamentos, así como para resolver os procedementos de reintegro das subvencións indebidamente percibidas polos seus beneficiarios e beneficiarias, respecto das resolucións concesorias, das que traen causas, ditadas por delegación do conselleiro.

Cuarta.-A comprobación da condición de persoas afectadas por diversidade funcional realizaraa directamente o órgano xestor das axudas, agás que fose recoñecida por outras administracións distintas da propia da Comunidade Autónoma de Galicia.

Non obstante, de acordo co disposto no artigo 1.2º da Lei 51/2003, do 2 de decembro, de igualdade de oportunidades, non discriminación e accesibilidade universal das persoas con discapacidade, en todo caso consideraranse afectadas por unha minusvalidez igual ou superior ao 33 por cento as persoas pensionistas da Seguridade Social que teñan recoñecida unha pensión de incapacidade permanente no grao de total, absoluta ou grande invalidez e as persoas pensionistas de clases pasivas que teñan recoñecida unha pensión por xubilación ou de retiro por incapacidade permanente para o servizo ou inutilidade. Nestes supostos a acreditación do grao de minusvalidez realizarase conforme o previsto no Real decreto 1414/2006, do 1 de decembro, polo que se determina a consideración de persoa afectada por diversidade funcional para os efectos da Lei 51/2003, do 2 de decembro, de oportunidades, non-discriminación e accesibilidade universal das persoas con discapacidade. (BOE nº 300, do 16 de decembro).

Quinta.-Para os efectos do sinalado no artigo 10º alínea décima desta orde, terán a consideración de retornados/as aqueles e aquelas emigrantes que cumpran coa condición de que non transcorresen máis de dous anos entre a data de retorno e a data de alta no correspondente réxime da Seguridade Social.

Sexta.-A concesión das axudas e subvencións previstas nesta orde estará suxeita á existencia de crédito orzamentario.

O pagamento das axudas e subvencións reguladas nesta orde financiarase con cargo aos créditos das aplicacións orzamentarias que, mediante disposición complementaria, se determinen anualmente, logo da aprobación dos orzamentos xerais da comunidade autónoma para o exercicio correspondente.

Sétima.-No exercicio 2007 as axudas recollidas nesta orde financiaranse con cargo ás aplicacións orzamentarias: 16.02.322C.470.1, código proxecto 2003 00452, cun crédito de 2.000.000 de euros;

16.02.322C.470.4, código de proxecto 2007 00677, cun crédito de 3.000.000 de euros; 16.02.322C.470.4, código de proxecto 2007 00678, cun crédito de 4.000.000 de euros; 16.02.322C.470.4; código de proxecto 2007 00679, cun crédito de 7.651.519 euros; 16.02.322C.470.6; código de proxecto 2007 00749, cun crédito de 6.000.000 de euros 16.02.322Z.470.0, código de proxecto 2007 00692, cun crédito de 750.383 euros; 16.02.322Z.470.2, código de proxecto 2007 00672, cun crédito de 1.793.659 euros e 16.02.322Z.470.2, código de proxecto 2007 00700, cun crédito de 383.283 euros.

Estas contías están recollidas na Lei 14/2006, do 28 de decembro, de orzamentos xerais da Comunidade Autónoma de Galicia para o ano 2007, e constitúen o importe global das aplicacións para o financiamento desta orde, da orde pola que se establecen as bases reguladoras do programa para o fomento das transformacións dos contratos de carácter temporal en indefinidos e se procede á súa convocatoria para o ano 2007, da orde pola que se establecen as bases reguladoras do programa para a promoción do emprego autónomo e se procede á súa convocatoria para o ano 2007 e das demais ordes que establezan as bases das medidas de fomento do emprego, incentivos á contratación por conta allea e actuacións de apoio a persoas emprendedoras, autoemprego e economía social, incluídas nos programas orzamentarios 322C e 322Z.

Así mesmo, os ditos créditos poderán ser obxecto de modificacións como consecuencia da asignación ou da redistribución de fondos para o financiamento dos programas de fomento do emprego, coas limitacións que estableza a Conferencia Sectorial de Asuntos Laborais ou as disposicións aplicables ás axudas cofinanciadas polo Fondo Social Europeo.

Oitava.-As actuacións previstas nesta orde están cofinanciadas polo Fondo Social Europeo nun 70%, no Programa operativo plurirrexional de iniciativa empresarial e formación continua 2000ES051PO015, agás a axuda para o inicio e posta en marcha da actividade que está financiada con fondos propios da Comunidade Autónoma de Galicia. No suposto de que este tipo de axuda sexa incluído no novo marco aprobado pola Comisión Europea será obxecto de publicación no Diario Oficial de Galicia e de comunicación aos beneficiarios e ás beneficiarias a súa cofinanciación con fondos estructurais europeos.

Disposicións derradeiras
Primeira.-Facúltase o director xeral de Promoción do Emprego para que dite, no ámbito das súas competencias, as resolucións e aclaracións necesarias para o desenvolvemento e cumprimento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 27 de febreiro de 2007.
Ricardo Jacinto Varela Sánchez
Conselleiro de Traballo

© Xunta de Galicia
Información mantida pola Xunta de Galicia
Servizo prestado pola Consellería de Presidencia, AA.PP. e Xustiza
Correo electrónico: webdoga xunta.es